វីរបុសកីឡាប្រដាល់លោក ម៉ៃ ថៃសាន់ (Mike Tyson) ចេញបកស្រាយពីមូលហេតុដែរនាំឱ្យឈានដល់ការខាំស្លឹកត្រចៀក លោកអ៊ីវេនឌើ ហូលីហ្វៀល (Evander Holyfield) អំឡុងប៉ះគ្នាលើសង្វៀន កាលពីឆ្នាំ ១៩៩៧។ ២៨ ឆ្នាំក្រោយ ថៃសាន់ សារភាពថាដោយសារខ្លួនអន់ និងខឹងក្រុមការងារ ទើបបង្ករឿងអាម៉ាស់បែបនេះ។

លោក Mike Tyson បានខាំស្លឹកត្រចៀកលោក Holyfield អំឡុងការប្រកួតដណ្តើមខ្សែក្រវ៉ាត់ទម្ងន់ធ្ងន់ពិភពលោក ក្នុងជំនួបលើកទី២ បន្ទាប់ពីការជួបគ្នាលើកដំបូងកាលពីខែវិច្ឆិកា ឆ្នាំ ១៩៩៦ លោក Tyson របូតខ្សែក្រវ៉ាត់ទៅកាន់លោក Holyfield។ 

នៅការប្រកួតប៉ះគ្នាលើកទី២ ក្នុងឆ្នាំ ១៩៩៧ ដែលការប្រកួតទើបតែធ្វើឡើងបានចំនួន ៣ ទឹកប៉ុណ្ណោះ ដោយមើលឃើញពីការវាយចេញបានយ៉ាងល្អពីសំណាក់លោក Holyfield និងស្របពេលដែលលោក Tyson កំពុងតែចាប់ផ្តើមបាត់បង់ការផ្តោតអារម្មណ៍លើការប្រកួត រឿងនេះបង្កជាកំហឹងដែលនាំឱ្យឈានដល់ការខាំស្លឹកត្រចៀក។

ការខាំស្លឹកត្រចៀកភ្លាមៗ ធ្វើឱ្យលោក Holyfield បច្ចុប្បន្នមានវ័យ ៦២ឆ្នាំ ស្រែកខ្លាំងៗ និងយកដៃខ្ទប់ត្រចៀក ជាមួយការឈឺចាប់ ខណៈក៏មានឈាមហូមកស្របគ្នាចេញពីត្រចៀកខាងស្តាំរបស់លោកផងដែរ។ ក្រោយពីការពន្យាពេលការប្រកួត ដើម្បីត្រួតពិនិត្យទៅលើស្ថានភាពលោក Holyfield រួច ការប្រកួតក៏តម្រូវឱ្យចាប់ផ្តើមបន្ត ប៉ុន្តែលោក Mike Tyson ក៏ព្យាយាមចង់ខាំស្លឹកត្រចៀកខាងឆ្វេងបន្ថែមមួយទៀត។ ជាសំណាងល្អការខាំលើកទី២ ធ្វើឱ្យលោកមានត្រឹមស្លាក់ស្នាមបន្តិចប៉ុណ្ណោះ។

យ៉ាងណាក្រោយ ការខាំស្លឹកត្រចៀកលើកទី២ ដែលនាំឱ្យអាជ្ញាកណ្តាលការប្រកួតចាប់អារម្មណ៍ពីបំណងរបស់លោក Tyson ជាហេតុនាំឱ្យមន្ត្រីរៀបចំការប្រកួតសម្រេចបញ្ឈប់ការប្រកួត និងផ្តល់ជ័យជម្នះដល់លោក Holyfield តែម្តង។ អ្នកគាំទ្ររាប់លាននាក់លើពិភពលោក មិននឹកស្មាននូវរឿងដែលពួកគេបានឃើញអំឡុងទស្សនាការប្រកួតរវាងវីរបុរសប្រដាល់ទាំង ២ ឡើយ នៅកាលនោះ ហើយថែមចោទសួរពីមូលហេតុដែលនាំឱ្យលោក Tyson ធ្វើរឿងនោះថែមទៀត។

កាលពីឆ្នាំ ២០២០ តាមរយៈវីដេអូមួយបានបង្ហោះនៅលើបណ្តាញសង្គម YouTube របស់គេហទំព័រ GQ បានលើកយកពីសំណួររបស់អ្នកគាំទ្រ ដែលសួរទៅលោក Tyson ទាក់ទងទៅមូលហេតុដែលនាំមានការខាំស្លឹកត្រចៀក លោក ​Holyfield។ វីរបុរសប្រដាល់វ័យ ៥៨ឆ្នាំ បានឆ្លើយតបទាំងអស់សំណើចថា អំឡុងការប្រកួតនោះលោកបានជួបរឿងអាក់អន់ចិត្ត និងបាក់ទឹកចិត្ត ព្រមទាំងខឹងក្រុមការងារ ហើយភ្លាមនោះក៏ផ្ទុះខឹងចំពោះការយកក្បាលមកបុកពីសំណាក់លោក Holyfield ថែមទៀត ដោយមិនដឹងធ្វើអ្វី លោកក៏ខាំស្លឹកត្រចៀកគូប្រកួតរបស់លោកតែម្តង។

មកដល់ពេលនេះទាំងលោក Tyson និង Holyfield បានដាក់ចុះរឿងរ៉ាវដែលធ្លាប់កើតឡើងនៅពេលអតីត ហើយអ្នកទាំង ២ ក៏កំពុងតែសហការគ្នាដើម្បីផ្សព្វផ្សាយផលិតផលស្ករគ្រាប់​មានរូបរាងដូចទៅនឹងស្លឹកត្រចៀក ហើយរឿងនេះក៏ទទួលបានការចាប់អារម្មណ៍ពីសំណាក់មហាជនផងដែរ។ អតីតកីឡាប្រដាល់ទាំង ២ សុទ្ធសឹងតែចូលនិវត្តន៍ពីអាជីពដូចគ្នា ខណៈវ័យអ្នកទាំង ២ ក៏កាន់តែចាស់៕