.jpg)
.jpg)
កម្ពុជា-ចិន ពង្រឹងការផ្លាស់ប្តូរទស្សនាទាន និងបទពិសោធន៍ផ្នែកអភិបាលកិច្ចទឹក
- ថ្ងៃសុក្រ ទី១៨ ខែមេសា ឆ្នាំ២០២៥ ម៉ោង ៦:៥៩ នាទី ល្ងាច
អនុស្សរណៈនៃការយោគយល់គ្នារវាងក្រសួងធនធានទឹក និងឧតុនិយមកម្ពុជា និងក្រសួងធនធានទឹកចិន ត្រូវបានចុះហត្ថលេខា កាលពីថ្ងៃទី១៧ ខែមេសា នៅវិមានសន្តិភាពក្រោមអធិបតីភាពសម្តេចនាយករដ្ឋមន្ត្រី ហ៊ុន ម៉ាណែត និងលោកប្រធានាធិបតីចិន ស៊ី ជិនភីង។
អនុស្សរណៈនៃការយោគយល់ដែលចុះហត្ថលេខាដោយរដ្ឋមន្ត្រីធនធានទឹកកម្ពុជា លោក ថោ ជេដ្ឋានិងលោក វ៉ាង វិនពីង ឯកអគ្គរដ្ឋទូតចិនប្រចាំកម្ពុជា តំណាងរដ្ឋមន្ត្រីធនធានទឹកចិន លោក លី គ័រអ៊ីង សំដៅពង្រឹងនិងអភិវឌ្ឍន៍កិច្ចសហប្រតិបត្តិការដ៏ស្មោះត្រង់ និងយូរអង្វែងរវាងប្រទេសទាំងពីរលើវិស័យធនធានទឹក។
តាមរយៈអនុស្សរណៈនៃការយោគយល់គ្នានេះ ភាគីទាំងពីរ ឯកភាពគ្នាពង្រឹងការផ្លាស់ប្តូរទស្សនាទាន និងបទពិសោធន៍ផ្នែកអភិបាលកិច្ចទឹក ពង្រឹងកិច្ចសហប្រតិបត្តិការក្នុងការអភិវឌ្ឍប្រកបដោយចីរភាព និងការប្រើប្រាស់ធនធានទឹក ដោយផ្អែកលើសមភាព និងអត្ថប្រយោជន៍ទៅវិញទៅមក និងរួមគ្នាជំរុញការប្រើប្រាស់ធនធានទឹកយ៉ាងយកចិត្តទុកដាក់ និងប្រកបដោយសុវត្ថិភាព។
ជាមួយគ្នានេះដែរ កម្ពុជា-ចិន ប្តេជ្ញាកសាងសហគមន៍ដែលមានអនាគតរួមគ្នានៅក្នុងយុគសម័យថ្មី និងសច្ចភាព ដោយដោះស្រាយបញ្ហាប្រឈមរួមគ្នាទាក់ទងនឹងការគ្រប់គ្រង ការការពារធនធានទឹក និងការប្រើប្រាស់ធនធានទឹកប្រកបដោយនិរន្ដរភាពនិងបរិយាបន្ន នៅក្នុងបរិបទនៃការប្រែប្រួលអាកាសធាតុ៕
© រក្សាសិទ្ធិដោយ thmeythmey.com
