.jpg)
.jpg)
កម្ពុជា-ចិន សម្រេចទំហំពាណិជ្ជកម្មរួមគ្នាបានជាង៤០០០លានដុល្លារ ក្នុងត្រីមាសទី១
- ថ្ងៃសៅរ៍ ទី១៩ ខែមេសា ឆ្នាំ២០២៥ ម៉ោង ៨:៣៩ នាទី ព្រឹក
ប្រធានាធិបតីចិន លោក ស៊ី ជិនភីង ចាប់ដៃជាមួយសម្តេចនាយករដ្ឋមន្ត្រី ហ៊ុន ម៉ាណែត ក្នុងអំឡុងពេលបំពេញទស្សនកិច្ចផ្លូវការនៅកម្ពុជា នាថ្ងៃទី១៧-១៨ មេសា។ រូបភាព ៖ STPM
ភ្នំពេញ៖ ទំនាក់ទំនងពាណិជ្ជកម្មទ្វេភាគីរវាងកម្ពុជា-ចិន សម្រេចរួមគ្នាបានក្នុងទំហំទឹកប្រាក់ប្រមាណ ៤ ០៦៨ លានដុល្លារអាម៉េរិក នាត្រីមាសទី១។ ទំហំនេះ មានកំណើនក្នុងវង្វង់២៦ភាគរយ បើធៀបនឹងរយៈពេលដូចគ្នា កាលឆ្នាំ២០២៤។ នេះយោងតាមស្ថិតិជញ្ជីងពាណិជ្ជកម្មរបស់អគ្គនាយកដ្ឋាន និងរដ្ឋាករកម្ពុជា ដែលចេញផ្សាយ នាថ្ងៃទី១០ ខែមេសា។
ស្ថិតិដដែលបានបង្ហាញថា ក្នុងចំណោមទំហំពាណិជ្ជកម្មនេះ កម្ពុជាសម្រេចការនាំចេញទៅកាន់ទីផ្សារប្រទេសចិនបានត្រឹម៣៤៨លានដុល្លារប៉ុណ្ណោះ ធ្លាក់ចុះជិត៥ភាគរយ។ រីឯការនាំចូលពីប្រទេសវិញ មានទំហំរហូតដល់ ៣ ៧២០លានដុល្លារ កើន៣០,៨ភាគរយ។ ពោល ជញ្ជីងពាណិជ្ជកម្មទ្វេភាគីរវាងប្រទេសទាំង២ គឺកម្ពុជាមានអតុល្យភាពជាមួយចិន រហូតទៅដល់ ៣ ៣៧២លានដុល្លារអាម៉េរិក នៅក្នុងត្រីមាសទី១ ឆ្នាំ២០២៥។
ក្នុងពេលជាមួយគ្នានេះ ក្រៅពីចិនហើយនោះ កម្ពុជា ក៏មានអតុល្យភាពជញ្ជីងពាណិជ្ជកម្មជាមួយប្រទេសមួយចំនួនទៀតផងដែរ។ ក្នុងនោះ កម្ពុជាមានអតុល្យភាពជញ្ជីងពាណិជ្ជកម្មជាមួយថៃប្រមាណ៦៣៨លានដុល្លារ, ឥណ្ឌូណេស៊ី២៣៥លានដុល្លារ, ម៉ាឡេស៊ី១៧៥លានដុល្លារ, តៃវ៉ាន់១៦៨លានដុល្លារ, សិង្ហបុរី១៦០លានដុល្លារ, ហុងកុង៣៨លានដុល្លារ និងជាប្រទេសឥណ្ឌមានប្រមាណ៣៤លានដុល្លារ។
គួរជម្រាបថា ក្នុងត្រីមាសទី១ ទំនាក់ទំនងពាណិជ្ជកម្មរវាងកម្ពុជា ជាមួយបណ្តាប្រទេសដៃគូក្នុងពិភពលោក គឺសម្រេចបានក្នុងទំហំទឹកប្រាក់១៤ ៤៤៩លានដុល្លារ កើន១៥,៦ភាគរយ ធៀបនឹងត្រីមាសទី១ ឆ្នាំ២០២៤។ ក្នុងនោះ ការនាំចេញសរុបរបស់កម្ពុជាសម្រេចបាន ៦ ៨៧៥លានដុល្លារ កើន៩,៨ភាគរយ ខណៈការនាំចូលវិញមាន ៧ ៥៧៣លានដុល្លារ កើន២១,៥ភាគរយ។ នេះបើស្ថិតិជញ្ជីងពាណិជ្ជកម្មរបស់អគ្គនាយកដ្ឋាន និងរដ្ឋាករកម្ពុជា ដដែល៕
© រក្សាសិទ្ធិដោយ thmeythmey.com
Tag:
