ក្រោយរដ្ឋាភិបាល​ មាន​គម្រោង​រៀបចំ​ផែនការអភិវឌ្ឍន៍វិស័យទេសចរណ៍ខេត្តកំពង់ធំ រដ្ឋបាលខេត្ត​កំពង់ធំ និង​គណៈរដ្ឋមន្រ្តី បានចាប់​ផ្ដើម​​រៀបចំ​សិក្ខាសាលាពិគ្រោះយោបល់លើសេចក្តីព្រាងវិធានការគន្លឹះអភិវឌ្ឍន៍ទេសចរណ៍នៅប្រាសាទសំបូរព្រៃគុក និងតំបន់ជុំវិញ ឆ្នាំ២០២៥-២០២៨។ បើតាម​រដ្ឋបាលខេត្ត​កំពង់ធំ សេចក្តីព្រាងនេះ មាន​ទិសដៅជំរុញ​កំណើន​ទេសចរ និង​លើក​កម្ពស់​សេដ្ឋកិច្ច​នៅខេត្ត​កំពង់ធំ។

 កាលពីថ្ងៃទី២២ ខែមេសា លោក នួន ផារ័ត្ន អភិបាលខេត្តកំពង់ធំ និង លោក​ ណេប សាមុត រដ្ឋលេខាធិការទីស្តីការគណៈរដ្ឋមន្ត្រី និងជាប្រធានក្រុមការងារសិក្សា និងអនុវត្តគម្រោងលើកកម្ពស់ភាពទាក់ទាញទេសចរណ៍នៅប្រាសាទសំបូរព្រៃគុក និងតំបន់ជុំវិញ បាន​រួម​គ្នាដឹកនាំសិក្ខាសាលាពិគ្រោះយោបល់លើសេចក្តីព្រាងវិធានការគន្លឹះអភិវឌ្ឍន៍ទេសចរណ៍នៅប្រាសាទសំបូរព្រៃគុក និងតំបន់ជុំវិញ ឆ្នាំ២០២៥-២០២៨។ 

លោក នួន ផារ័ត្ន អភិបាលខេត្តកំពង់ធំ។ 

 ក្នុង​សិក្ខា​សាលា​នេះ លោក ណេប សាមុត បាន​លើក​ឡើងពី​ការ​​​ប្រែក្លាយប្រាសាទសំបូរព្រៃគុក និងតំបន់ជុំវិញ ឱ្យក្លាយជាគោលដៅទេសចរណ៍ដ៏ទាក់ទាញ ប្រកបដោយគុណភាព និរន្តរភាព និងបរិយាបន្ន រួមចំណែកដល់ការធ្វើពិពិធកម្មមូលដ្ឋានសេដ្ឋកិច្ចផ្ទៃក្នុង។ បើតាម​រដ្ឋលេខាធិការទីស្តីការគណៈរដ្ឋមន្ត្រីរូបនេះ ដើម្បីឱ្យមានភាពទាក់ទាញ និងភាពប្រកួតប្រជែងទេសចរណ៍តំបន់ប្រាសាទសំបូរព្រៃគុក គឺ​ត្រូវ​ប្រើប្រាស់សក្តានុពល និងធនធានវប្បធម៌ និងធម្មជាតិ ដែល​ចូលរួមលើកកម្ពស់ជីវភាពប្រជាជន។

សម្រាប់​លោក ណេប សាមុត​ ការ​ជំរុញ​ និង​ប្រែក្លាយជា​គោលដៅទេសចរណ៍នេះ អាច​បង្កើត និងបង្កើនឱកាសការងារ និងការបង្កើនប្រភពចំណូលជូនប្រជាពលរដ្ឋ ដែល​ទាមទារឱ្យមានផ្សព្វផ្សាយឱ្យបានទូលំទូលាយពីផលិតផល និងសេវាកម្មដែលមាននៅក្នុងតំបន់។ លោក ណេប សាមុត បន្តថា ការបញ្ជ្រាបការយល់ដឹងពីសក្តានុពលទេសចរណ៍ក្នុងតំបន់នេះឱ្យបានទូលំទូលាយ ក៏ជា​ការ​ទាក់ទាញភ្ញៀវទេសចរជាតិ និងអន្តរជាតិ មកទស្សនាឱ្យបានកាន់តែច្រើនជាងមុន និងមកច្រើនដងផងដែរ​។

លោក ណេប សាមុត រដ្ឋលេខាធិការទីស្តីការគណៈរដ្ឋមន្ត្រី និងជាប្រធានក្រុមការងារសិក្សា និងអនុវត្តគម្រោងលើកកម្ពស់ភាពទាក់ទាញទេសចរណ៍នៅប្រាសាទសំបូរព្រៃគុក និងតំបន់ជុំវិញ 

ខេត្តកំពង់ធំ មានសក្តានុពលទាក់ទាញខ្ពស់ទាំងផ្នែកវប្បធម៌ ប្រវត្តិសាស្ត្រ និងធម្មជាតិដ៏​សម្បូរបែប ជាពិសេសតំបន់ទេសចរណ៍ប្រាសាទសំបូរព្រៃគុក ដែលជាទីតាំងអតីតរាជធានី​ខ្មែរសម័យចេនឡា។ លោក នួន ផារ័ត្ន អភិបាល​ខេត្ត​កំពង់ធំ បញ្ជាក់ដូច្នេះ មុននឹងបន្ថែម​ថា តំបននេះ មានប្រាសាទចំនួន ៣២៧ បែងចែកជា ៣ផ្នែក មានប្រាសាទសំបូរ, ប្រាសាទ​តោ, និងប្រាសាទយាយព័ន្ធ។

«ការអភិវឌ្ឍប្រាសាទសំបូរព្រៃគុក និងតំបន់ជុំវិញ ជាគោលដៅទេសចរណ៍ដ៏លេចធ្លោ​សម្រាប់ខេត្តកំពង់ធំ ដើម្បីទាក់ទាញភ្ញៀវទេសចរ​ឱ្យចូលទស្សនាកម្សាន្ត​នៅគោលដៅ​អន្តរខេត្ត​នេះ មុននឹងទៅដល់ខេត្តជុំវិញ ផ្សារភ្ជាប់ជាមួយការលើកកម្ពស់សេដ្ឋកិច្ចមូលដ្ឋាន និងរួមចំណែកដល់ការកាត់បន្ថយភាពក្រីក្រ»។ ​​លោក នួន ផារ័ត្ន លើកឡើងបែបនេះ។

សូម​បញ្ជាក់ថា នៅ​ដើម​ឆ្នាំ​២០២៥នេះ រដ្ឋាភិបាល បានប្រកាសគម្រោង​រៀបចំផែនការ អភិវឌ្ឍន៍វិស័យទេសចរណ៍ខេត្តកំពង់ធំ សម្រាប់អនុវត្តក្នុងរយៈពេល ៣ ឬ៤ឆ្នាំ​។ ការរៀបចំ ផែនការនេះ មានគោលដៅ ​ប្រែក្លាយខេត្ត​ដែលមានសក្តានុពលខ្ពស់ខាងផ្នែក វប្បធម៌ ប្រវត្តិសាស្រ្ត និងធម្មជាតិ ឱ្យក្លាយទៅជាខេត្តគោលដៅកម្សាន្តអន្តរខេត្តទី១ មុននឹងភ្ញៀវ ទេសចរទៅដល់ខេត្តសៀមរាប ឬខេត្តព្រះវិហារ ឬក៏ដល់ភ្នំពេញ ឬជាខ្សែច្រវាក់គោលដៅ ទេសចរណ៍មួយ តាមទិសពីភ្នំពេញ ទៅសៀមរាប-អង្គរ ឬពីសៀមរាប-ភ្នំពេញ ឬក៏ភ្ជាប់ទៅ គោលដៅទេសចរណ៍ផ្សេងៗទៀត៕