.png)
.png)
.jpg)
.jpg)
កម្ពុជា រកឃើញអ្នកឆ្លងកូវីដ-១៩ ចំនួន៧នាក់ទៀត
- ថ្ងៃសុក្រ ទី២៣ ខែឧសភា ឆ្នាំ២០២៥ ម៉ោង ១២:០៣ នាទី រសៀល
អ្នកជំនាញសុខាភិបាលកំពុងយកសំណាងតេស្តរកកូវីដ-១៩ នាពេលកន្លងមក
កម្ពុជាប្រកាសរកឃើញអ្នកឆ្លងជំងឺកូវីដ-១៩ ចំនួន ៧ករណីទៀត នាថ្ងៃទី២៣ ខែឧសភា។ អ្នកកើតកូវីដ-១៩ ទាំង៧នាក់ គឺជាករណីឆ្លងក្នុងសហគមន៍។ នេះបើយោងតាមសេចក្តីជូនដំណឹងរបស់ក្រសួងសុខាភិបាល។
បច្ចុប្បន្ន ស្ថានភាពនៃការឆ្លងជំងឺកូវីដ-១៩ ហាក់កំរើកឡើងវិញ ដោយកម្ពុជា បន្តរកឃើញករណីឆ្លងកូវីដ-១៩ ថ្មីក្នុងសហគមន៍ជាបន្តបន្ទាប់នៅប៉ុន្មានថ្ងៃចុងក្រោយនេះ។ ការរកឃើញនូវករណីឆ្លងក្នុងសហគមន៍ថ្មីនេះ ជាក្តីព្រួយបារម្ភនៃការផ្ទុះឡើងវិញនូវជំងកូវីដ-១៩ ខណៈប្រទេសថៃមានអ្នកកើតជំងឺនេះឡើងវិញ កើនឡើងខ្ពស់គួរឱ្យកត់សម្គាល់។
គិតចាប់ពីថ្ងៃទី១ ខែមករា ដល់ថ្ងៃទី១៤ ខែឧសភា អ្នកកើតជំងឺ កូវីដ-១៩ នៅថៃ ចាប់ផ្ដើមកើនឡើងវិញ ដោយមានចំនួនអ្នកឆ្លងដល់ទៅ ៧១ ០៦៧នាក់ និងស្លាប់ ១៩នាក់។ នេះបើយោងតាមរបាយការណ៍របស់មជ្ឈមណ្ឌលព័ត៌មានជំងឺកូវីដ-១៩ របស់រដ្ឋាភិបាលថៃ។
ដើម្បីបង្ការការផ្ទុះរាលដាលជំងឺកូវីដ-១៩ ក្នុងសហគមន៍ ក្រសួងសុខាភិបាល បានជំរុញឱ្យពលរដ្ឋដែលអាយុចាប់ពី១២ឆ្នាំឡើង ទៅចាក់វ៉ាក់សាំងកូវីដ-១៩ នៅតាមមូលដ្ឋានសុខភាពសាធារណៈ។ ទន្ទឹមនឹងនេះដែរ នៅតាមមន្ទីរពេទ្យរដ្ឋមួយចំនួន មានជាអាទិ៍ មន្ទីរពេទ្យជាតិ តេជោសន្តិភាព ដែលស្ថិតក្នុងខណ្ឌព្រែកព្នៅ រាជធានីភ្នំពេញ បានពិនិត្យឡើងវិញ និងរៀបចំគ្រែថ្មី និងបរិក្ខាពេទ្យបន្ថែម ត្រៀមទទួលអ្នកជំងឺ ប្រសិនបើមានការផ្ទុះរាលដាលខ្លាំងនាពេលខាងមុខ។
នៅកម្ពុជា គិតត្រឹមថ្ងៃទី២៣ ខែឧសភា មានអ្នកឆ្លងកូវីដ-១៩ សរុប ១៣៩ ៣៧៨នាក់។ ក្នុងនោះ អ្នកជាសះស្បើយ ១៣៦ ២៩១នាក់ និងស្លាប់ ៣០៥៦។
អត្ថបទទាក់ទង
ដើម្បីបង្ការ ក៏ដូចជាធានាភាពស៊ាំសហគមន៍ និងទប់ស្កាត់ការរីករាលដាលនៃជំងឺកូវីដ-១៩ បំប្លែងថ្មី (JN.1 lineages) ក្រសួងសុខាភិបាលប្រាប់ឱ្យពលរដ្ឋដែលអាយុចាប់ពី១២ឆ្នាំឡើង ទៅចាក់វ៉ាក់សាំងកូវីដ-១៩ នៅតាមមូលដ្ឋានសុខភាពសាធារណៈ។ ការជំរុញនេះ ត្រូវបានធ្វើឡើងបន្ទាប់ពីកម្ពុជារកឃើញករណីឆ្លងជំងឺកូវីដ-១៩ ក្នុងសហគមន៍សាជាថ្មី កាលពីថ្ងៃទី១៧ ខែឧសភា៕
© រក្សាសិទ្ធិដោយ thmeythmey.com
Tag:
.gif)