.png)
.png)
.jpg)
.jpg)
ក្លិបអ្នកនិពន្ធវ័យក្មេង ពង្រឹងសមត្ថភាពយុវជនឱ្យស្រលាញ់សំណេរ និងនិពន្ធសៀវភៅ ចាប់ផ្ដើមហើយ
- ថ្ងៃសៅរ៍ ទី២១ ខែមិថុនា ឆ្នាំ២០២៥ ម៉ោង ១០:០០ នាទី ព្រឹក
សៀមរាប៖ ដើម្បីលើកកម្ពស់សំណេរ និងការនិពន្ធសៀវភៅឱ្យកាន់តែមានភាពសម្បូរបែបនោះ សារព័ត៌មានឌីជីថលថ្មីៗ (ThmeyThmey) និងអង្គការ អេដ អេ អាកស្យុង រួមទាំងសមាគមក្លិបទេសចរណ៍ខេត្តសៀមរាប បានផ្ដួចផ្ដើមគំនិត បង្កើតក្លិបបណ្តុះថ្នាលអ្នកនិពន្ធវ័យក្មេង ដើម្បីបណ្តុះពួកគេឲ្យចេះសរសេរ ផលិតសៀវភៅ និងការបោះពុម្ពផ្សាយ។ វគ្គបណ្ដុះបណ្ដាលអ្នកនិពន្ធវ័យក្មេងនៅខេត្តសៀមរាប បានចាប់ផ្ដើមនៅថ្ងៃទី២១ មិថុនា នាសណ្ឋាគារម៉េម័រ ស្ថិតនៅលើផ្លូវកំណាត់ផ្លូវជាតិលេខ៦ ក្នុងក្រុងសៀមរាប។
គោលបំណងនៃវគ្គបណ្ដុះបណ្ដាលរបស់ក្លិបអ្នកនិពន្ធវ័យក្មេងនេះ គឺចង់បង្កើតគំនិតច្នៃប្រឌិតឱ្យលើសពីការអានទៅដល់យុវជន ។ មូលហេតុអ្វី? នោះក៏ព្រោះតែយុវជនភាគច្រើនចូលចិត្តអាន តែមិនសូវចូលចិត្តសរសេរ។ មែនទែនទៅ ការអាន ងាយស្រួលជាងការសរសេរ ដូចពាក្យមួយឃ្លាថា «ការអាន គឺជាការទទួល តែការសរសេរ គឺជាការផ្តល់»។
ក្នុងន័យនេះ យុវជនដែលនិយមការអាន ពិតជាទទួលបាននូវចំណេះដឹងពីរឿងរ៉ាវនៅក្នុងសៀវភៅ ឬឯកសារនានា ជាពិសេសអារម្មណ៍សប្បាយរីករាយ ទុក្ខសោក មួរមៅ ខឹងសម្បារ ទៅតាមខ្លឹមសាររបស់អ្នកនិពន្ធសៀវភៅនីមួយៗ។ ប៉ុន្តែពួកគេមិនទាន់ដឹងឡើយថា ការរៀបចំសំណេរឱ្យបានល្អ រហូតដល់អ្នកអានជក់ចិត្តនេះ វាមានការលំបាកប៉ុណ្ណា? ត្រូវការចំណេះដឹងផ្នែកអក្សរសាស្រ្តខ្មែរ និងវេយ្យាករណ៍បែបណាខ្លះ? ការតាក់តែងឃ្លាសំណេរពីមួយកថាខណ្ឌ ទៅមួយកថាខណ្ឌទៀត ត្រូវការភាពបត់បែនតាមអត្ថន័យសាច់រឿង យ៉ាងម៉េចខ្លះ? ការចាប់ផ្ដើមឃ្លាពីចំណុចណាទៅចំណុចណាឱ្យបានល្អ យ៉ាងដូចម្ដេច? ទាំងអស់នេះ សុទ្ធតែជាចំណុចសំខាន់ និងលំបាកនៅក្នុងការតាក់តែងសំណេរ។ នេះមិនទាន់គិតដល់ការផ្ចង់អារម្មណ៍ និងអត់ធ្មត់ ក្នុងការសរសេរខ្លឹមសារឱ្យបានល្អផង។
ដោយសារតែឃើញយុវជនបច្ចុប្បន្ន មិនសូវចូលចិត្តសរសេរ ហើយប្រើប្រាស់សំណេរមិនទាន់ត្រឹមត្រូវនេះ ទើបក្រុមការងារសារព័ត៌មានឌីជីថលថ្មីៗ (ThmeyThmey) និងអង្គការ អេដ អេ អាកស្យុង សម្រេច បង្កើតក្លិបបណ្តុះថ្នាលអ្នកនិពន្ធវ័យក្មេងនេះ ដើម្បជួយតម្រង់ផ្លូវពួកគេឱ្យយល់កាន់តែច្បាស់ពីភាពចាំបាច់ក្នុងការសរសេរឱ្យបានច្រើន និងសរសេរឱ្យបានល្អ ច្រើនជាងការស្ដាប់ និងការអាន។ ម្យ៉ាងទៀតការសរសេរនឹងជួយឱ្យពួកគេរក្សាបាននូវគុណតម្លៃអក្សរសាស្រ្តខ្មែរ ,ចេះប្រើប្រាស់ពាក្យខ្មែរកាន់តែច្រើន និងល្អត្រឹមត្រូវ។ លើសពីនេះ ការចងក្រងសំណេរនៅក្នុងសៀវភៅ ក៏អាចក្លាយជាឯកសារសំខាន់សម្រាប់យុវជនជំនាន់ក្រោយទៀតផង។
សម្រាប់វគ្គបណ្ដុះបណ្ដាលរបស់ក្លិបអ្នកនិពន្ធវ័យក្មេងនេះ មានរយៈពេល៦ខែ ដែលអាចពង្រឹងសមត្ថភាពយុវជនឱ្យ អាចមានជំនាញសរសេរ និងផលិតសៀវភៅ។ វគ្គបណ្ដុះបណ្ដាលនេះ ទទួលបានការឧបត្ថម្ភពីមីក្រូហិរញ្ញវត្ថុ អម្រឹត ដែលតែងតែចូលរួមលើកកម្ពស់ការអាន និងការសរសេរនៅកម្ពុជា។ ជាមួយគ្នានេះ ក៏មានការគាំទ្រដោយភោជនីយដ្ឋាន ម៉ែ ឌី ផងដែរ៕
© រក្សាសិទ្ធិដោយ thmeythmey.com
