ជាតិ
ក្រសួងអាចពិភាក្សាគ្នានៅថ្ងៃចន្ទពីករណីឆេះរថយន្តក្រុងក្រុមហ៊ុនរិទ្ធិ មុន្នី ១គ្រឿងនៅបាត់ដំបង
× ភ្នំពេញ៖ នៅខេត្តបាត់ដំបង កើតមានករណីឆាបឆេះរថយន្តក្រុងពីរជាន់១គ្រឿងរបស់ក្រុមហ៊ុន រិទ្ធិ មុន្នី ដែលបណ្ដាលឲ្យស្រី្តម្នាក់បាត់បង់ជីវិត និងមនុស្សច្រើននាក់ទៀតបានរងរបួស។ នេះតាមគេហទំព័រអគ្គស្នងការដ្ឋាននគរបាលជាតិ។
ករណីឆាបឆេះរថយន្តក្រុងដឹកអ្នកដំណើរនេះ បានកើតឡើងនៅម៉ោង ១០ និង៤០នាទីយប់ថ្ងៃទី៦ខែសីហា ម្សិលមិញ នៅត្រង់ចំណុចហួសរង្វង់មូលរំសាយសក់ ក្រុងបាត់ដំបង។ វេបសាយ៍អគ្គស្នងការនគរបាលជាតិ បានស្រង់សំដីប្រភពដែលឃើញហេតុការណ៍យ៉ាងដូច្នេះថា៖«រថយន្តក្រុងដឹកអ្នកដំណើររបស់ក្រុមហ៊ុន រិទ្ធិ មុន្នី បើកចេញពីក្រុងបាត់ដំបងឆ្ពោះទៅទីក្រុងភ្នំពេញ ស្រាប់តែបានឃើញផ្សែងហុយចេញពីរថយន្តក្រុងនោះ ហើយបង្កជាអណ្ដាតភ្លើងភ្លាមៗផងដែរ។ អ្នកបើកបរក៏បានឈប់រថយន្តឲ្យអ្នកដំណើរដែលជិះនៅក្នុងនោះ នាំគ្នារត់ចុះចេញពីរថយន្ត ដោយអ្នកខ្លះពុំបានយករបស់របរចេញទាន់ឡើយ»។
បើតាមគេហទំព័ររបស់អគ្គស្នងការនគរបាលជាតិដដែល ពេលកំពុងកើតហេតុការណ៍នេះដែរ គេក៏ឃើញមានរថយន្តពន្លត់អគ្គិភ័យមកបាញ់ពន្លត់ផងដែរ ប៉ុន្តែនៅតែមិនអាចជួយបាន ហើយរថយន្តក្រុងនោះក៏ត្រូវឆាបឆេះទាំងស្រុង។
ទោះយ៉ាងណា ករណីឆេះរថយន្តក្រុង ដែលបណ្ដាលឲ្យស្លាប់ស្ត្រីម្នាក់ និងរងរបួសជាច្រើននាក់ ព្រមទាំងការខូចខាតសម្ភារផងនោះ សមត្ថកិច្ចមិនទាន់រកឃើញមូលហេតុនៃការឆេះនៅឡើយទេ។ ហើយរថយន្តក្រុង ដែលសល់តែគ្រោងឆ្អឹងមួយនេះ ត្រូវបានសមត្ថកិច្ចយកទៅរក្សាទុកនៅការិយាល័យចរាចរណ៍ក្រុងបាត់ដំបង ដើម្បីរង់ចាំក្រុមហ៊ុនចូលមកដោះស្រាយ។
ជុំវិញករណីនេះដែរ លោក វ៉ា ស៊ឹមសុរិយា អ្នកនាំពាក្យក្រសួងសាធារណការ និងដឹកជញ្ជូន បានប្រាប់សារព័ត៌មានថ្មីៗនៅថ្ងៃនេះថា លោកបានទទួលដំណឹងនេះដែរ តែមិនទាន់ស៊ីជម្រៅ ដោយសារថាថ្ងៃនេះ ជាថ្ងៃឈប់សម្រាក ដូច្នេះក្រសួងមិនទាន់មានចំណាត់ការអ្វីចំពោះករណីនេះទេ។ លោក វ៉ា ស៊ឹមសុរិយា ឲ្យរង់ចាំព័ត៌មានលម្អិតពីគ្រោះថ្នាក់នេះ នៅថ្ងៃច័ន្ទ ដែលមន្ត្រីក្រសួងប្រហែលជាពិភាក្សាគ្នាពីបញ្ហានេះ៕
© រក្សាសិទ្ធិដោយ thmeythmey.com