អន្តរជាតិ
ស៊ី ជិនពីង លត់ ដូណាល់ ត្រាំ លើវេទិកាសេដ្ឋកិច្ចពិភពលោកនៅស្វីស
× ប្រធានាធិបតីចិនលោក ស៊ី ជិនពីង បានយកវេទិកាសេដ្ឋកិច្ចពិភពលោកទីក្រុង Davos ព្រលះប្រធានាធិបតីអាមេរិកថ្មីយ៉ាងចាស់ដៃពាក់ព័ន្ធការ«ប៉ងធ្វើសង្គ្រាមពាណិជ្ជកម្ម និងអនុវត្តគោលនយោបាយគាំពារនិយម»។
មេដឹកនាំចិនដ៏មានឥទ្ធិពលរូបនេះបានប្រកាសចំពោះមុខបណ្តាមេដឹកនាំពិភពលោកនិងក្រុមអ្នកជំនួញថា «សកលភាពវូបនីយកម្មសេដ្ឋកិច្ច»មិនបង្កើតបញ្ហាពិភពលោកឡើយ តែអភិបាលកិច្ចនិងការគ្រប់គ្រងនយោបាយក្នុងប្រទេសទេដែលបង្កើតបញ្ហនេះឡើង។ ហើយប្រមុខរដ្ឋចិននេះក៏បានអំពាវនាវឲ្យប្រទេសនានាលើពិភពលោករួបរួមគ្នាដោះស្រាយបញ្ហាសេដ្ឋកិច្ចនិងបញ្ហាផ្សេងទៀត និងចៀសវាងការរត់គេចពីបញ្ហា។
សូមស្តាប់ការបកស្រាយរបស់លោក សៅ ផលនិស្ស័យ៖
ប្រទេសជាច្រើនជាលើពិភពលោកដែលបានទទួលប្រយោជន៍ពីចលនាសកលភាវូបនីយកម្មនិងពាណិជ្ជកម្មសេរី ហាក់មានសុទិដ្ឋិនិយមឡើងវិញ ក្រោយលឺសម្តីរបស់ប្រធានាធិបតីចិននៅក្នុងវេទិកាសេដ្ឋកិច្ចពិភពលោកនៅក្រុង Davos ប្រទេសស្វីសថ្ងៃអង្គារទី ១៧ មករា។
ប្រមុខរដ្ឋចិនលោក ស៊ី ជិនពីង បានឆក់យកឱកាសដ៏សំខាន់នៅស្វីសនេះ ប្រកាសប្រាប់ពិភពលោកថា ចិនមិនបោះបង់ចោលសេរីភាវូបនីយកម្មសេដ្ឋកិច្ច និងបន្តគាំទ្រ «ចរន្តសកលភាវូបនីយកម្ម» ទោះលោកខាងលិចដកថយក៏ដោយ។ លោកក៏បានអំពាវនាវយ៉ាងទទូចសុំឲ្យបណ្តាអភិជននយោបាយនិងអ្នកជំនួញនានាលើពិភពលោកទប់ស្កាត់ឲ្យបាននូវ«សង្គ្រាមពាណិជ្ជកម្ម» និងរារាំងរាល់គោលបំណងអនុវត្តឡើងវិញនូវគោលនយោបាយ«គាំពារនិយមពាណិជ្ជកម្ម»ដែលមានពីអតីតកាលនោះ។
វាបង្ហាញឲ្យឃើញកាន់តែច្បាស់ថា ចិនកំពុងដើរតួរជាអ្នកការពារពាណិជ្ជកម្មសេរី ខណៈដែលលោកខាងលិចជាពិសេសក្រុងវ៉ាស៊ីនតោនក្រោមអាណត្តិ ដូណាល់ ត្រាំ កំពុងព្យាយាមដកខ្លួនចេញពីវេទិកាពិភពលោកនោះ។
១.ពេលប្រទេសសេរីដកខ្លួនពីសាកលភាវូបនីយកម្ម មហាយក្សចិនប្រកាសខ្លួនធ្វើជាតួឯក
ថ្លែងបើកវេទិកាសេដ្ឋពិភពលោកក្រុង Davos លោក ស៊ី ជិនពីង ផ្តោតសំខាន់ចលនាប្រឆាំងចរន្តសាកលភាវូបនីយកម្ម។ ហើយមេដឹកនាំចិននេះបានអំពាវនាវជាថ្មីទៅកាន់ពិភពលោក ឲ្យរួមសាមគ្គីគ្នារិះរកដំណោះស្រាយបញ្ចប់បញ្ហាដែលពិភពលោកកំពុងជួបប្រទះ។
ក្នុងនាមជាមេដឹកនាំប្រទេសមហាអំណាចសេដ្ឋកិច្ចទី ២ពិភពលោក លោក ស៊ី ជិនពីង បញ្ជាក់ថា វាជាពេលវេលាដែលពិភពលោកត្រូវកាត់បន្ថយគម្លៀតរវាងអ្នកមាននិងអ្នកក្រ ក៏ដូចជាកែទម្រង់បទបញ្ញត្តិគ្រប់គ្រងហិរញ្ញវត្ថុ ដោយមិនចាំបាច់ត្រូវឈប់អនុវត្តគោលនយោបាយដែលមានស្រាប់ដែលបានបង្កើតការអភិវឌ្ឍនិងលូតលាស់នៃសេដ្ឋកិច្ចឡើយ។ ហើយលោក ស៊ី ជិនពីង បានប្តេជ្ញាចិត្តចំពោះមុខអ្នកចូលរួមក្នុងវេទិកាសេដ្ឋកិច្ចនេះថា មហាយក្សចិននៅតែគាំទ្រ និងការពារពាណិជ្ជកម្មសេរី ,ការវិនិយោគសកល និងការបន្តធ្វើសេរីភាវូបនីយកម្មសេដ្ឋកិច្ច។
កាយវិការរបស់ប្រធានាធិបតីចិន ជាសារមួយបង្ហាញទៅគ្រប់គ្នាថា ចិនកំពុងពង្រឹងតួនាទីខ្លួនដើម្បី ធ្វើជាតួអង្គសំខាន់ក្នុងការដោះស្រាយវិបត្តិនិងបញ្ហានានាលើពិភពលោកផង។ ហើយ មហាយក្សចិនមើលឃើញថាវាជាឱកាសមាសដែរ នៅពេលបណ្តាប្រទេសលោកខាងលិចនាំគ្នាបោលថយក្រោយរត់គេចពីចរន្តសាកលភាវូបនីយកម្មនោះ។
នាពេលបច្ចុប្បន្ន ចលនាប្រជាឧបាយ (Populist) ដែលមាននិន្នាការប្រឆាំងសកលភាវូបនីកម្ម និងគាំទ្រវិធានការគាំពានិយមកើនឡើងគួរឲ្យបារម្ភគ្រប់ទីកន្លែងលើពិភពលោក។ គេឃើញចលនានេះរីកធំធាត់នៅពាសពេញអឺរ៉ុប ក្រិក អ៊ីតាលី បារាំង អង់គ្លេស និងអាមេរិកផង។ ការជាប់ឆ្នោតរបស់សេដ្ឋី ដូណាល់ ត្រាំ និងការចាកចេញរបស់អង់គ្លេសពីសហភាពអឺរ៉ុបជាទឡ្ហីករណ៍ដ៏ជាក់ច្បាស់ដែលបង្ហាញថា សកលភាវូបនីយកម្មកំពុងដើរថយក្រោយ។
២.លោក ស៊ី ជិនពីង សំពង ប្រធានាធិបតីអាមេរិក ដូណាល់ មួយព្រនង់
ទោះជាមិននិយាយឈ្មោះ ដូណាល់ ត្រាំ ចំៗក៏ដោយ ប្រមុខរដ្ឋចិន ស៊ីជិនពីង មានគោលបំណងយកវេទិកាសេដ្ឋកិច្ចពិភពលោកនេះដើម្បីលត់ ប្រធានាធិបតីទី ៤៥ អាមេរិក ដែលចង់ធ្វើសង្គ្រាមពាណិជ្ជកម្មប្រឆាំងចិននិងដកខ្លួនចេញពីសេដ្ឋកិច្ចសកលនោះ។
ដូចគ្រប់គ្នាបានដឹងហើយ តាំងពីឃោសនាបោះឆ្នោត ដូណាល់ ត្រាំ បានចោទប្រកាន់ថា មហាយក្សចិនលួចការងារប្រជាជនអាមេរិកច្រើនជាងគេ ហើយលោកសន្យាចាត់វិធានការដើម្បីប្រឆាំងចិនដែរ។សេដ្ឋីអចលនទ្រព្យនេះបានប្រើប្រាស់វោហារស័ព្ទនយោបាយគំរាមអនុវត្តគោលនយោបាយគាំពារនិយម ដោយប្រើប្រាស់របាំងពាណិជ្ជកម្មនិងរូបីយវត្ថុជាដើមដែរ។ កម្រិតពន្ធសម្រាប់ទំនិញនាំចូលពីចិនដែលលោក ដូណាល់ ត្រាំ ស្នើឡើងគឺ ៤៥ ភាគរយឬខ្ពស់ជាងនេះផង។
យោងតាមទីភ្នាក់ងារព័ត៌មាន ចិន Xinhua លោក ស៊ី ជិនពីង បានអធិប្បាយប្រាប់បណ្តាអ្នកចូលរួមថា គ្មានពីអ្នកគេចពីពាណិជ្ជកម្មសេរីបានឡើយ ហើយអ្នករាល់គ្នានឹងខាតបង់ បើមានសង្គ្រាមពាណិជ្ជមែននោះ។
«ការប្រើប្រាស់នយោបាយគាំពារនិយមប្រៀបដូចជាចាក់សោរឃុំខ្លួនឯងក្នុងបន្ទប់ងងឹត ហាក់ដូចជាយើងកំពុងព្យាយាមគេចពីខ្យល់និងភ្លៀង។ ប៉ុន្តែវាក៏ដូចជាឃុំខ្លួនឯងពីពន្លឺថ្ងៃ និងខ្យល់ដែរ។ ហើយបង្កសង្គ្រាមពាណិជ្ជកម្មមិនចំណេញអ្វីឡើយ វាបង្កើតតែការខាតបង់និងគ្រោះថា្នក់ដល់ភាគីទាំងពីរប៉ុណ្ណោះ»។ នេះជាការបញ្ជាក់របស់លោក ស៊ី ជិនពីង នៅក្នុងវេទិកាសេដ្ឋកិច្ចពិភពលោកនេះ។
លើសពីនេះ ស៊ី ជិនពីង បានពន្យល់បន្ថែមថា វាជារឿងមិនសមហេតុផលឡើយដែលត្រូវបន្ទោសសកលភាវូបនីយកម្មចំពោះបញ្ហាគ្រប់យ៉ាងដែលពិភពលោកកំពុងជួបប្រទះនោះ។ គ្រប់យ៉ាងវាទាក់ទងការបរាជ័យនៃនយោបាយក្នុងស្រុកក៏ដូចជាអភិបាលកិច្ចប៉ុណ្ណោះ។ ប្រមុខរដ្ឋចិនរូបនេះបន្ថែមថា វាជាគ្រោះថ្នាក់ធំនៅពេលបណ្តាប្រទេសទាំងនោះមិនរកដំណោះស្រាយបញ្ចប់បញ្ហា បែរជានាំគ្នារត់គេចពីការពិតទៅវិញ។
«គ្មានហេតុផលអ្វីដែលត្រូវបន្ទោសសកលភាវូបនីយកម្មចំពោះបញ្ហាដែលកើតឡើងពេលបច្ចុប្បន្នឡើយ។ ប្រវត្តិសាស្ត្រមនុស្សជាតិយើងបង្ហាញថា បញ្ហាមិនមែនជារឿងគួរភ័យខ្លាចឡើយ។ អ្វីដែលយើងគួរបារម្ភគឺការរត់គេចពីបញ្ហាទៅវិញទេ»៕
© រក្សាសិទ្ធិដោយ thmeythmey.com