កីឡាជាតិ
ជាតិ
បញ្ហារាំងស្ទះក្នុងការអភិវឌ្ឍន៍វិស័យកីឡានឹងដាក់ឲ្យជជែកក្នុងមហាសន្និបាតរបស់ក្រសួងអប់រំ រូបភាពពី៖ ហ្វេសប៊ុកអគ្គនាយកដ្ឋានកីឡា
× បញ្ហាប្រឈមនិងការខ្វះខាតរបស់មន្ទីររាជធានី-ខេត្តទូទាំងប្រទេសកម្ពុជាដែលជាបញ្ហារាំងស្ទះដល់ការអភិវឌ្ឍន៍វិស័យកីឡាកម្ពុជានាពេលកន្លងមក។ ថ្នាក់ដឹកនាំកីឡានឹងយកបញ្ហានេះដាក់បញ្ចូលក្នុងអង្គមហាសន្និបាតប្រចាំឆ្នាំរបស់ក្រសួងអប់រំ យុវជន និងកីឡា នាខែមីនា ខាងមុខ ដើម្បីពិភាក្សាស្វែងរកដំណោះស្រាយ។ ការធ្វើបែបនេះក្នុងគោលបំណងដើម្បីជួយអភិវឌ្ឍន៍វិស័យកីឡាកម្ពុជាឲ្យកាន់តែរីកចម្រើនទាំងបរិមាណ និងគុណភាព។
ដើម្បីជួយអភិវឌ្ឍន៍វិស័យកីឡាកម្ពុជាឲ្យមានការរីកចម្រើនទាំងបរិមាណ និងគុណភាព ដើម្បីត្រៀមចូលរួមប្រកួតប្រជែងក្នុងព្រឹត្តិការណ៍ជាតិ និងអន្តរជាតិ ជាពិសេសការធ្វើម្ចាស់ផ្ទះកីឡាស៊ីហ្គេមលើកទី៣២ឆ្នាំ២០២៣។ អនុរដ្ឋលេខាធិការក្រសួងអប់រំ យុវជន និងកីឡាលោក ស៊ាន បូរ៉ាត បានជំរុញឲ្យអគ្គនាយកដ្ឋានកីឡារៀបចំឯកសារពាក់ព័ន្ធនឹងបញ្ហាប្រឈមរបស់មន្ទីអប់រំកាយ និងកីឡារាជធានី-ខេត្តទាំង២៥ ដើម្បីដាក់ពិភាក្សាស្វែងរកដំណោះស្រាយក្នុងមហាសន្និបាតរបស់ក្រសួងអប់រំ យុវជន និងកីឡា នាថ្ងៃទី២៣-២៥ ខែមីនា ខាងមុខនេះ។
ការជំរុញនេះបន្ទាប់ពីលោក អ៊ុក សិទ្ធិជាតិ អគ្គនាយកនៃអគ្គនាយកដ្ឋានកីឡាបានអានរបាយការណ៍ពីបញ្ហាប្រឈមដែលលើកឡើងដោយមន្ទីរអប់រំកាយ និងកីឡាទាំង២៥រាជធានី-ខេត្ត ក្នុងថ្ងៃបិទសិក្ខាសាលាបូកសរុបការងារអនុវិស័យការអប់រំកាយ និងកីឡាប្រចាំឆ្នាំ២០១៦ និងលើកទិសដៅឆ្នាំ២០១៧ កាលពីថ្ងៃទី២៣ ខែកុម្ភៈ នៅភោជនីយដ្ឋានទន្លេបាសាក់២។
យោងតាមរបាយរបស់អគ្គនាយកដ្ឋានកីឡាបញ្ហាប្រឈមទាំងនោះរួមមាន កញ្ចប់ថវិកាមិនទាន់ឆ្លើយតបទៅនឹងផែនការសកម្មភាព, កង្វះហេដ្ឋារចនាសម្ព័ន្ធកីឡាសម្រាប់ហ្វឹកហាត់ និងប្រកួត, កង្វះធនធានកីឡាករ និងគ្រូបង្វឹកដែលមានគុណភាព, កង្វះលិខិតបទដ្ឋានស្តីពីការគ្រប់គ្រង និងអនុវត្តលើអនុវិស័យអប់រំកាយ និងកីឡា និងកង្វះកម្មវិធីអនុវត្តន៍អប់រំកាយ និងកីឡានៅតាមបណ្តាខេត្តមួយចំនួន។
ដើម្បីចូលរួមចំណែកក្នុងការអភិវឌ្ឍន៍វិស័យកីឡានៅតាមបណ្តាខេត្តអគ្គនាយកនៃអគ្គនាយកដ្ឋានកីឡា លោក អ៊ុក សិទ្ធិជាតិ បានឲ្យក្រសួងអប់រំបង្កើនល្បឿននៃការជួសជុល កែលម្អ និងកសាងទីលានកម្រិតស្តង់ដានៅតាមខេត្ត និងបង្កើនការបណ្តុះបណ្តាលជំនាញដល់គ្រូបឋម និងគ្រូទទួលបន្ទុកកីឡានៅតាមសាលារៀន។ សហការជាយមួយសហព័ន្ធបើកវគ្គបំប៉នជំនាញដល់មន្ត្រីដឹកនាំ គ្រូបង្វឹក អាជ្ញាកណ្តាលនៅតាមរាជធានី-ខេត្ត ជាពិសេសរៀបចំសិក្ខាសាលារៀងរាល់ឆ្នាំ ដើម្បីពិនិត្យបញ្ហាឲ្យកាន់តែស៊ីជម្រៅ និងជាក់លាក់។
ទន្ទឹមនឹងការលើកឡើងពីបញ្ហាប្រឈម និងការដាក់សំណូមពរ លោកអគ្គនាយកនៃអគ្គនាយកដ្ឋានកីឡារូបនេះ ក៏លើកពីសម្បត្តិរបស់រាជធានី-ខេត្តផងដែរដូចជា ការអនុញ្ញាតដាក់កម្មវិធីអប់រំកាយ និងកីឡាក្នុងកម្មវិធីសិក្សារបស់គ្រឹះស្ថានសិក្សា, អនុញ្ញាតឲ្យសិស្សមានទេពកោសល្យទៅបន្តការហ្វឹកហាត់កីឡា, ចូលរួមរៀបចំការប្រកួតពានរង្វាន់សម្តេច ហ៊ុន សែន, រៀបចំប្រកួតជើងឯកប្រចាំឆ្នាំ, បណ្តុះបណ្តាលធនធានមនុស្សតាមរយៈបញ្ជូនកីឡាករទៅហ្វឹកហាត់នៅក្រៅប្រទេស និងសហការជាមួយអង្គភាពពាក់ព័ន្ធ។
ក្នុងថ្ងៃបិទអង្គសិក្ខាសាលានោះដែរលោក ស៊ាន បូរ៉ាត បានដាក់ចេញវិធានការ៥ចំណុច គឺទី១ស្នើឲ្យអង្គសិក្ខាសាលាដាក់ជាធាតុចូលក្នុងមហាសន្និបាតរបស់ក្រសួងអប់រំ យុវជន និងកីឡា, ទី២អគ្គនាយកដ្ឋានកីឡាត្រូវធ្វើកិច្ចសន្យាប្រតិភូកម្មជូនសហព័ន្ធកីឡាជាតិ, ទី៣សហព័ន្ធកីឡាជាតិត្រូវអនុវត្តតាមការណែនាំ និងកិច្ចសន្យាទៅតាមផែនការដែលបានដាក់ចេញ, ទី៤ការិយាល័យកីឡារាជធានី-ខេត្ត ត្រូវពង្រឹងការស្ថិតក្រោមដែនសមត្ថកិច្ចរបស់ខ្លួន និងទី៥ការិយាល័យរាជធានី-ខេត្តត្រូវលើកផែនការថវិកាបញ្ចូលទៅក្នុងថវិការបស់មន្ទីរសាមី៕
Tag:
ស៊ាន បូរ៉ាត
អ៊ុក សិទ្ធិជាតិ
អគ្គនាយកដ្ឋានកីឡា
© រក្សាសិទ្ធិដោយ thmeythmey.com