អន្តរជាតិ
មន្ត្រីចិន៦នាក់ដែលងោកពេលប្រជុំ ត្រូវបក្សកុំម្មុយនីស្តពិន័យឲ្យសុំទោសជាសាធារណៈ
× គ្រាន់តែអង្គុយស្ងាប និងងោកមួយស្របក់ប៉ុណ្ណោះ មន្ត្រីចិន៦នាក់នៅខេត្ត Hubei ត្រូវបានការិយាល័យបក្សកុំម្មុយនីស្តប្រចាំខេត្ត ធ្វើការដាក់ពិន័យឲ្យធ្វើស្វ័យរិះគន់ និងសុំទោសជាសាធារណៈ។ នេះបើតាមការផ្សាយរបស់បណ្តាញសារព័ត៌មានរដ្ឋរបស់ចិន។
កាលពីពេលថ្មីៗកន្លងមក រូបថតរបស់មន្ត្រីចិនដែលអង្គុយងោកនាកិច្ចប្រជុំថ្នាក់មូលដ្ឋាននៅខេត្ត Hubei ប្រទេសចិន ត្រូវបានចែកចាញពេញបណ្តាញព័ត៌មាន និងបណ្តាញសង្គមនៅចិន។ ករណីនេះ បានកើតឡើង ស្របពេលដែលលោកប្រធានាធិបតី ស៊ី ជិនពីង បើកយុទ្ធនាការទូលំទូលាយក្នុងការប្រយុទ្ធប្រឆាំងអំពើពុករលួយ ភាពហ៊ឺហារ និងការធ្វេសប្រហែលនៅពេលបំពេញកាតាព្វកិច្ចរបស់មន្ត្រី។
ក្រោយករណីនេះ បានកើតឡើង ការិយាល័យវិន័យរបស់បក្សកុំម្មុយនីស្តដែលមានទីស្នាក់ការនៅក្រុង Xiangyang ខេត្ត Hubei បានសម្រេចដាក់ពិន័យមន្ត្រីអង្គុយងោកទាំង៦រូប ឲ្យសរសេរពាក្យស្វ័យរិះគន់ និងធ្វើការសុំទោសជាធារណៈ។
យោងតាមការផ្សាយរបស់កាសែត The Global Times មន្ត្រីទាំង៦នាក់ ដែលត្រូវបានគេថតជាប់រូបអង្គុយស្ងាប និងងោក នោះ បានចូលចិត្តសិក្ខាសាលាមួយ ទាក់ទងនឹងការពង្រឹងការងារមន្ត្រីរដ្ឋការ ជាពិសេសមន្ត្រីដែលខ្ជិល និងស្ទក់៕
Tag:
វិន័យ
មន្ត្រីចិន
កុំម្មុយនីស្ត
© រក្សាសិទ្ធិដោយ thmeythmey.com