បរាជ័យ តែឈ្នះទឹកចិត្តអ្នកគាំទ្រ ធ្វើឲ្យគ្រូប្រេស៊ីល មានកម្លាំងចិត្តកាន់តែខ្លាំង

កីឡាជាតិ

ជាតិ

បរាជ័យ តែឈ្នះទឹកចិត្តអ្នកគាំទ្រ ធ្វើឲ្យគ្រូប្រេស៊ីល មានកម្លាំងចិត្តកាន់តែខ្លាំង

23, Mar 2017 , 7:19 pm

រូបភាព

ដោយ: ទេព ពិទូរ្យ

នាជំនួបមិត្តភាពអន្តរជាតិដែលក្រុមបាល់ទាត់ជម្រើសជាតិកម្ពុជាចាញ់ឥណ្ឌាក្នុងលទ្ធផល ៣-២ កាលពីល្ងាចម្សិលមិញនៅពហុកីឡដ្ឋានជាតិអូឡាំពិកនោះ ទម្រង់លេងថ្មីរបស់ កម្ពុជា ប្រែប្រួលច្រើន ហើយទទួលបានការចាប់អារម្មណ៍ខ្លាំង ពីអ្នកគាំទ្ររាប់ម៉ឺននាក់។ ការផ្តល់កម្លាំងចិត្តបែបនេះ បានជំរុញឲ្យលោក Leonardo Vitorino សន្យាប្រឹងប្រែងកាន់តែខ្លាំងដើម្បីការរីកចម្រើនបាល់ទាត់កម្ពុជានាពេលអនាគត។

«យើងអាចបង្កើតឱកាសបានច្រើន ទោះយើងធ្វើមិនបានសម្រេច ប៉ុន្តែក្នុងទម្រង់លេងនេះខ្ញុំអាចសន្យាបានថា យើង [ក្រុមជម្រើសជាតិកម្ពុជា] នឹងរីកចម្រើនជាងនេះទៀតនាថ្ងៃអនាគត»។ នេះជាការលើកឡើងរបស់គ្រូបង្វឹកថ្មីក្រុមជម្រើសជាតិកម្ពុជាលោក Leonardo Vitorino នាសន្និសីទសារព័ត៌មានក្រោយបញ្ចប់ការប្រកួត។

អតីតគ្រូបង្វឹកក្លិប Lanexang United ឈ្នះពាន Lao Premier League ហើយទទួលបានកៅអីជាប្រវត្តិសាស្ត្រក្នុងព្រឹត្តិការណ៍ AFC Cup បានបន្ថែមថា៖«បើនិយាយពីការប្រកួតគឺយើងគ្រប់គ្រងបាល់បានច្រើនជាង ហើយយើងក៏បានបង្កើតឱកាសជាច្រើន ទោះបីនៅតង់ទី២យើងបានធ្លាក់ទម្រង់លេងតិចតួច ប៉ុន្តែយើងនៅតែលេងបានល្អ»។

ក្រោមការដឹកនាំលើកដំបូងរបស់គ្រូបង្វឹកប្រេស៊ីលនេះ ទម្រង់លេងរបស់ក្រុមជម្រើសជាតិកម្ពុជា មានការខុសប្លែកយ៉ាងខ្លាំង តាមរយៈការលេងបាល់ខ្លីៗពីក្រោមរហូតដល់តំបន់ខាងលើ ដើម្បីព្យាយាមទាញកម្លាំងរបស់កីឡាករឥណ្ឌា។ បើទោះបីជាចាញ់ក្រុមឥណ្ឌាពិតមែន តែការប្រកួតនេះទទួលបានការគាំទ្រយ៉ាងច្រើនពីអ្នកគាំទ្ររបស់កម្ពុជាទាំងមូល។

នៅថ្ងៃទី២៨ ខែមីនា ឆ្នាំ២០១៧ ខាងមុខ កម្ពុជា និងឥណ្ឌា នឹងបើកយុទ្ធនាការរៀងៗខ្លួនដើម្បីដណ្តើមយកកៅអីសម្រាប់ព្រឹត្តិការណ៍ AFC Asian Cup ឆ្នាំ២០១៩ នៅប្រទេសអារ៉ាប់រួមអេមីរ៉េត។ ឥណ្ឌាស្ថិតនៅក្នុងពូល A ជាមួយគៀហ្ស៊ីស្ថាន មីយ៉ាន់ម៉ា និងម៉ាកាវ ខណៈកម្ពុជានៅក្នុងពូល C ជាមួយហ្សកដានី វៀតណាម និងអាហ្វហ្គានីស្ថាន៕