ជាតិ
បទយកការណ៍ / បទសម្ភាសន៍
នយោបាយជាតិ
លោក ជុន ច័ន្ទបុត្រ៖«ខ្ញុំចង់ឆ្លើយបំភ្លឺនៅតុលាការ! ប្រហែលមានការភាន់ច្រឡំ»
× អនុប្រធានវិទ្យុអាស៊ីសេរី លោក ជុន ច័ន្ទបុត្រ ដែលមានឈ្មោះផ្លូវការថា ហួត ឃីនវុទ្ធី បានទទួលដីកាកោះហៅសាកសួរក្នុងសំណុំរឿងបន្លំខ្លួនចូលពន្ធនាគារពីតុលាការហើយនៅរសៀលថ្ងៃទី២២មេសានេះ។ លោក ជុន ច័ន្ទបុត្រ មិនទាន់ដឹងភ្លាមថាលោកត្រូវអនុវត្តតាមនីតិវិធីច្បាប់យ៉ាងនៅឡើយទេ ដោយរង់ចាំសេចក្តីសម្រេចពីការិយាល័យកណ្តាលនៃវិទ្យុអាស៊ីសេរីនៅសហរដ្ឋអាមេរិក។ ប៉ុន្តែលោក ជុន ច័ន្ទបុត្រ បានប្រាប់លោក លាង ដឺលុច អ្នកកាសែតនៃសារព័ត៌មានថ្មីៗនៅក្នុងបទសម្ភាសតាមទូរសព្ទមួយនៅរសៀលថ្ងៃទី២២មេសានេះថា លោកចង់នៅឆ្លើយបំភ្លឺការចោទប្រកាន់នេះ ដោយសារលោកសង្ស័យថា អាចមានការភាន់ច្រឡំណាមួយនៅក្នុងរបាយការណ៍របស់ពន្ធនាគារ។
លោក លាង ដឺលុច៖ លោក ជុន ច័ន្ទបុត្រ លោកបានទទួលដីកាពីសាលាដំបូងរាជធានីដែលកោះហៅលោកសាកសួរក្នុងសំណុំរឿងបន្លំខ្លួនចូលពន្ធនាគារ។ តើលោកនឹងចូលខ្លួនតាមការដីកាកោះនេះដែរឬទេ?
លោក ជុន ច័ន្ទបុត្រ៖ ខ្ញុំមិនទាន់មានការសម្រេចចិត្តយ៉ាងណានៅឡើយទេ ដោយហេតុថាបញ្ហានេះបានទៅផុតពីដៃខ្ញុំហើយ។ បានន័យវាជាបញ្ហាផ្លូវច្បាប់ ដូច្នេះខ្ញុំត្រូវរង់ចាំការសម្រេចរបស់ការិយាល័យកណ្តាលរបស់វិទ្យុអាស៊ីសេរីនៅវ៉ាស៊ីនតោន ថាតើយើងត្រូវរកមេធាវី ហើយមេធាវីអាចចូលឆ្លើយជំនួស ឬមេធាវីអាចសុំពន្យាលពេលចូលឆ្លើយបំភ្លឺ?
លោក លាង ដឺលុច៖ តាមពិតសំណុំរឿងនេះបានកើតឡើងក្លាយជាប្រធាននៃការផ្សព្វផ្សាយព័ត៌មានជាច្រើនថ្ងៃមកហើយ។ បានន័យថាការិយាល័យកណ្តាលរបស់វិទ្យុអាស៊ីសេរីពិតជាបានដឹងរឿងនេះ។ តើកន្លងមកការិយាល័យកណ្តាលរបស់វិទ្យុអាស៊ីសេរីមានជំហរបែបណាចំពោះករណីរបស់លោក?
លោក ជុន ច័ន្ទបុត្រ៖ ជំហររបស់អាស៊ីសេរី គឺគេឲ្យខ្ញុំនៅធ្វើការធម្មតា។ ពីព្រោះកន្លងមក ក៏មានតែពាក្យចោទប្រកាន់ក្រៅផ្លូវការ។ តែឥឡូវនេះ មានដីកាកោះផ្លូវការពីតុលាការ ដូច្នេះខ្ញុំចាំការពិភាក្សាជាមួយការិយាល័យកណ្តាលនៅវ៉ាស៊ីនតោន ព្រោះថាពេលនេះវាយប់នៅឡើយនៅទីនោះ។
លោក លាង ដឺលុច៖ ដីកាកោះនេះ ធ្វើឲ្យលោកបារម្ភអ្វីទេ?
លោក ជុន ច័ន្ទបុត្រ៖ ខ្ញុំមិនបារម្ភអ្វីទេ ប៉ុន្តែវាធ្វើឲ្យខ្ញុំភ្ញាក់ផ្អើលទៅវិញ នៅពេលដែលរឿងនេះបានក្លាយជាប្រធានបទក្តៅនៅលើទំព័រមុខនៃសារព័ត៌មាន។ គេថាខ្ញុំបន្លំចូលពន្ធនាគារ។ តាមពិតខ្ញុំឥតមានបានបន្លំអ្វីទេ ខ្ញុំគិតថាអាចមានការភាន់ច្រឡំត្រង់ណានៅក្នុងរបាយការណ៍របស់ពន្ធនាគារទៅក្រសួងមហាផ្ទៃ បានជាគេឲ្យខ្ញុំបំភ្លឺ។
លោក លាង ដឺលុច៖ ប៉ុន្តែទោះយ៉ាងណាក៏ដោយ លោកនឹងអនុវត្តតាមសេចក្តីសម្រេចរបស់ការិយាល័យកណ្តាលរបស់វិទ្យុអាស៊ីសេរី?
លោក ជុន ច័ន្ទបុត្រ៖ ខ្ញុំនឹងធ្វើតាមសេចក្តីសម្រេចនោះ ប៉ុន្តែគេក៏សួរចិត្តយើងដែរ។ ឆន្ទៈរបស់ខ្ញុំ គឺខ្ញុំចង់បំភ្លឺ។ ខ្ញុំឆ្លងកាត់បារាស់ចំនួន៣ ទម្រាំចូលដល់ក្នុងបន្ទប់មន្ទីរឃុំឃាំង។ រូបថតដែលគេផ្សព្វផ្សាយ ហើយឃើញខ្ញុំពាក់មួកនោះ គឺនៅបារាស់ទីមួយ។ ខ្ញុំពាក់មួក ព្រោះក្តៅ ហើយវ៉ែនតាខ្ញុំជាវ៉ែនតាម្ញ៉ូបដែលប្រែពណ៌តាមពន្លឺថ្ងៃ។ ទៅដល់បារ៉ាស់ទី២ គេឲ្យខ្ញុំដោះមួក។ ខ្ញុំមិនបានបន្លំទេ អ្នកណាក៏ស្គាល់ខ្ញុំ។ ដល់បារាស់ទី៣ ទើបគេឆែកម្តងទៀតមុនចូលបន្ទប់មន្ទីរឃុំឃាំង។ នៅទីនោះហើយដែលគេឲ្យយើងចុះឈ្មោះបញ្ជីវត្តមាននោះ។ បើគេ (តុលាការ) ឲ្យខ្ញុំបំភ្លឺ ខ្ញុំនឹងឆ្លើយយ៉ាងដូច្នេះទាំងអស់។ ខ្ញុំជឿថា យុត្តិធម៌ប្រាកដជាមាន៕
© រក្សាសិទ្ធិដោយ thmeythmey.com