អន្តរជាតិ
ហ្វីលីពីនពង្រាយសន្តិសុខជាង៤ម៉ឺននាក់ការពារសន្និសីទកំពូលអាស៊ានលើកទី៣០ រូបភាព៖ Philippine Star
× រដ្ឋាភិបាលហ្វីលីពីនក្នុងនាមជាប្រធានអាស៊ានប្តូរវេនត្រៀមខ្លួនរួចហើយដើម្បីទទួលមេដឹកនាំអាស៊ានទាំង ៩ផ្សេងទៀតរួមជាទាំងប្រតិភូជាន់ខ្ពស់សំខាន់ៗជាច្រើនដែលនឹងមកចូលរួមកិច្ចប្រជុំកំពូលអាស៊ានលើកទី ៣០។ ដើម្បីរក្សាសន្តិសុខសុវត្ថិភាពប្រតិភូដែលមកចូលរួមក្នុងកិច្ចប្រជុំថ្នាក់តំបន់នេះហ្វីលីពីនសម្រេចពង្រាយកងសន្តិសុខ ៤១០០០នាក់នៅរដ្ឋធានីម៉ានីលចាប់ពីថ្ងៃ២៦ ដល់ថ្ងៃ ២៩មេសា សប្តាហ៍នេះ។
កិច្ចប្រជុំកំពូលអាស៊ានលើកទី ៣០ និងកិច្ចប្រជុំពាក់ព័ន្ធនឹងត្រូវរៀបចំឡើងនៅសប្តាហ៍នេះ ចាប់ពីថ្ងៃ ២៦ដល់ថ្ងៃ ២៩ នៅទីក្រុងម៉ានីលប្រទេសហ្វីលីពីន។ កិច្ចប្រជុំថ្នាក់តំបន់ដ៏សំខាន់នេះនឹងមានចូលរួមពីសំណាក់ប្រមុខរដ្ឋប្រមុខរដ្ឋាភិបាលអាស៊ានទាំង ១០ រួមទាំងបណ្តាប្រតិភូជាន់ខ្ពស់ជាច្រើនផ្សេងទៀតដែរ។
អ្វីដែលគួរឲ្យកត់សម្គាល់ ក្នុងនាមជាប្រធានអាស៊ានឆ្នាំ ២០១៧ នេះ ហ្វីលីពីនផ្តោតសំខាន់ខ្លាំងលើការរក្សាសន្តិសុខ និងសណ្តប់ធ្នាប់ជូនថ្នាក់ដឹកនាំនិងប្រតិភូបរទេសដោយសារតែប្រទេសនេះប្រឈមមុខបញ្ហាសន្តិសុខច្រើនប៉ុន្មានខែចុងក្រោយជាពិសេសក្រុមភេរវជន។
យោងតាមសារព័ត៌មាន CNN ហ្វីលីពីន រដ្ឋាភិបាលបានសម្រេចពង្រាយកងកម្លាំងប៉ូលិស ២៦០០០នាក់ រួមជាមួយកងទ័ព ១៥០០០នាក់ផ្សេងទៀតទៅទូទាំងរដ្ឋធានីម៉ានីលដើម្បីរក្សាសន្តិសុខនិងទប់ស្កាត់បញ្ហាភេរវកម្មជាដើមផង។
ជារួម កិច្ចប្រជុំសំខាន់ៗក្រោមក្របខណ្ឌអាស៊ានចំនួន ១៣៨ ត្រូវរៀបចំនៅហ្វីលីពីននៅក្នុងឆ្នាំ ២០១៧នេះ ហើយក្នុងចំណោមនោះកិច្ចប្រជុំទាំងនោះមានពីរភាគបីត្រូវរៀបចំនៅក្រុងម៉ានីល។ ដូច្នេះហើយប្រតិភូអន្តរជាតិនិងមេដឹកនាំបរទេសភាគច្រើនត្រូវធ្វើដំណើរទៅកាន់ក្រុងម៉ានីល និងស្នាក់នៅទីនោះក្នុងអំឡុងពេលប្រជុំ។
បើតាមមន្ត្រីហ្វីលីពីន ក្រុងម៉ានីលនឹងស្ថិតក្រោមការរឹតបន្តឹងសន្តិសុខខ្លាំងសប្តាហ៍នេះព្រោះ ក្រៅពីមានកិច្ចប្រជុំកំពូលអាស៊ាន មេដឹកនាំអាស៊ានពីររូបលោកក៏នឹងឆ្លៀតបំពេញទស្សនកិច្ចផ្លូវការនៅហ្វីលីពីនផង ពាក់ព័ន្ធការរៀបចំខ្លួនដែរ ក្នុងនោះមានប្រធានាធិបតីឥណ្ឌូណេស៊ីលោក ចូកូ វីដូដូ និងមហាក្សត្រព្រុយណេព្រះចៅ Hassanal Bolkiah។ ប្រតិភូប្រទេសអាស៊ានផ្សេងទៀតប្រហែល ពីរពាន់នាកក៏នឹងមានវត្តមាននៅហ្វីលីពីនដែរនៅសប្តាហ៍នេះ។
ស្វាគមន៍មេដឹកនាំអាស៊ាន អគ្គរដ្ឋទូត Marciano A. Paynor Jr ដែលជាអ្នកទទួលបន្ទុករៀបចំពិធីការនិងកិច្ចប្រជុំពាក់ព័ន្ធនានាក្នុងក្របខណ្ឌអាស៊ានបានលើកឡើងថា សន្តិសុខជារឿងសំខាន់បំផុតសម្រាប់ហ្វីលីពីន ពេលដែលប្រទេសនេះរៀបចំកិច្ចប្រជុំធំៗ។
«យើងមិនអាចផ្តោតតែលើបញ្ហាសន្តិសុខផ្ទៃក្នុងនោះទេ។ ដូចយើងបានដឹងហើយថា នៅបណ្តាទីក្រុងធំៗរបស់អឺរ៉ុបមានក្រុងឡុងដ៍, ប៉ារីស, និងព្រុចសែល សុទ្ធតែរងគ្រោះដោយសារការវាយប្រហារភេរវជន។ យើងនៅសំណាងជាងប្រទេសទាំងនោះ។ យើងមិនចង់ឲ្យរឿងបែបនោះកើតឡើងឡើយ ជាពិសេសពេលដែលយើងមានភ្ងៀវមកចូលរួមប្រជុំច្រើនឆ្នាំនេះទៀត»។ នេះជាការបញ្ជាក់របស់មន្ត្រីជាន់ខ្ពស់ហ្វីលីពីនរូបនេះ។
សូមទាញការចាប់អារម្មណ៍បន្តិចដែរថ្មីៗនេះសន្តិសុខនៅហ្វីលីពីនទាំងមូលកាន់តែដុនដាបខ្លាំង ដោយសារក្រុមភេរវជន Abu Sayyaf ចាប់ផ្តើមអុកឡុកកាន់តែខ្លាំង។ កាលពីនៅយប់ថ្ងៃ ១៧មេសា គេឃើញមានការបំផ្ទុះគ្រាប់បែកពីរគ្រាប់នៅក្រុង Tacurong ធ្វើឲ្យមនុស្សប្រាំពីរនាក់រងរបួសផង។ គេវាយតម្លៃថា ករណីបំផ្ទុះគ្រាប់នេះអាចពាក់ព័ន្ធក្រុមឧទ្ទាមរណសិរ្សរំដោះម៉ូស្លីម Moro ( Moro Islamic Liberation Front)។ ចំណែកកាលពីថ្ងៃ ១១ មេសា ក្រុមទាហានរដ្ឋាភិបាលបានប៉ះទង្គិចគ្នាជាមួយក្រុម Abu Sayyaf និងបណ្តាញក្រុមភេរវជនរដ្ឋឥស្លាមឬដែស្ហ (Daesh) នៅក្រុង Bohol ផង រហូតបណ្តាលឲ្យមនុស្សយ៉ាងហោចណាស់១០នាក់ស្លាប់ក្នុងនោះមានទាហានរដ្ឋភិបាលផងដែរ។
ដោយឡែកពាក់ព័ន្ធការរៀបចំសន្តិសុខទទួលកិច្ចប្រជុំនេះដែរ មេប៉ូលិសហ្វីលីពីនលោកRonald Dela Rosa បានថ្លែងប្រាប់អ្នកសារព័ត៌មានថា លោកសង្ឃឹមមុតមាំលើសមត្ថភាពនិងវិជ្ជាជីវៈរបស់មន្ត្រីប៉ូលិសនិងកងកម្លាំងយោធារបស់ហ្វីលីពីនក្នុងការរក្សាសន្តិសុខជូនប្រតិភូអាស៊ាន។ហើយភ្នាក់ងារពាក់ព័ន្ធវាយតម្លៃជាមុនថា គ្មានការគំរាមកំហែងសន្តិសុខ ឬគម្រោងភេរវកម្មណាមួយកើតមានឡើងឡើយក្នុងរយៈពេលនៃកិច្ចប្រជុំនេះ។
ទោះជាមានការវាយតម្លៃដូច្នេះក្តី រដ្ឋមន្ត្រីមហាផ្ទៃហ្វីលីពីន Catalino Cuy បានអះអាងថា ហ្វីលីពីនមិនព្រងើយកន្តើយចំពោះបញ្ហាសន្តិសុខជាពិសេសការគំរាមកំហែងដែលអាចកើតមានឡើងឡើយ។ ស្ថាប័នរបស់លោកនៅតែត្រៀមលក្ខណៈពេញលេញដើម្បីត្រួតពិនិត្យនិងឃ្លាំមើលយ៉ាងយកចិត្តទុកដាក់បំផុតចំពោះស្ថានការណ៍ជារួមនៅក្រុងម៉ានីល។
នៅខែវិច្ឆិកាខាងមុខនេះ ហ្វីលីពីននឹងបន្តរៀបចំកិច្ចប្រជុំអាស៊ានលើកទី ៣១និងកិច្ចប្រជុំពាក់ព័ន្ធនៅ Clark។ វេទិកាកិច្ចប្រជុំនេះនឹងប្រមូលផ្តុំប្រមុខរដ្ឋចំនួន ២២រូបក្នុងនោះមានទាំងប្រធានាធិបតីអាមេរិកលោក ដូណាល់ ត្រាំ និងអគ្គលេខាធិការអង្គការសហប្រជាជាតិលោក Anttonio Guterresថែមទៀតផង៕
Tag:
ហ្វីលីពីន
កិច្ចប្រជុំកំពូលអាស៊ានលើកទី៣០
© រក្សាសិទ្ធិដោយ thmeythmey.com