អន្តរជាតិ
១៩នាក់ស្លាប់ដោយការបំផ្ទុះនាការប្រគំតន្ត្រីរបស់ Ariana Grande នៅមែនឆេសស្ទ័រ ការបំផ្ទុះនៅមែនឆេសស្ទ័រ។ រូបថតNews Pictures Zuma
× មនុស្សយ៉ាងតិច១៩នាក់ស្លាប់ និងជាច្រើននាក់ទៀតបានរបួសក្នុងការផ្ទុះមួយកន្លែងប្រគំតន្ត្រីរបស់តារាចម្រៀងអាមេរិក Ariana Grande ក្នុងទីក្រុង Manchester របសអង់គ្លេសនៅរាត្រីថ្ងៃទី២២ ខែឧសភា។ ប៉ូលិសអង់គ្លេស ចាត់ទុកការផ្ទុះនេះជាហេតុការណ៍ភេរវកម្ម ហើយជនសង្ស័យម្នាក់កំពុងរត់គេចខ្លួន។
ប៉ូលិសចក្រភពអង់គ្លេសនិយាយថា ពួកគេបានទទួលការរាយការណ៍ពីហេតុការណ៍ផ្ទុះចេញពីកន្លែងប្រគំតន្ត្រី Manchester Arena ដែលអាចផ្ទុកទស្សនិកជនដល់ទៅជាងពីរម៉ឺននាក់។ ប៉ុន្តែមូលហេតុនៃការផ្ទុះនៅមិនទាន់ដឹងនៅឡើយ បើទោះជាប៉ូលិសសន្និដ្ឋានថាអាចជាសកម្មភាពភេរវកម្មក្ដី។ គេដឹងថា ការផ្ទុះនេះកើតឡើងក្រោយការបញ្ចប់ការប្រគំតន្ត្រីរបស់តារាចម្រៀង Ariana Grande ។
ប្រសិនជាសកម្មភាពភេរវកម្មមែននោះ ហេតុការណ៍នេះជាការវាយប្រហារដ៏ធំបំផុតនៅចក្រភពអង់គ្លេស ចាប់តាំងពីការវាយប្រហារក្នុងខែកក្កដា ឆ្នាំ២០០៥មក ដែលពេលនោះមនុស្ស៥២នាក់ត្រូវបានសម្លាប់។ ការផ្ទុះយប់ថ្ងៃទី២២ ខែឧសភានេះ ក៏កើតមានតែប៉ុន្មានសប្ដាហ៍មុនការបោះឆ្នោតមុនអាណត្តិមកដល់ដែរ។
Catherine Macfarlane សាក្សីម្នាក់ដែលចូលរួមទស្សនាការប្រគំតន្ត្រីបានប្រាប់ទីភ្នាក់ងារ Reuters ថា មនុស្សម្នាជាច្រើនដែលមានទាំងក្មេងៗផង បានរត់សំដៅច្រកចេញរបស់អាគារ ដើម្បីគេចពីហេតុការណ៍ផ្ទុះនេះ។ ចំណែករបាយការណ៍បឋមបង្ហាញ មនុស្សយ៉ាងហោចណាស់៥០នាក់ បានរងរបួស។
ដោយឡែក តារាចម្រៀងល្បីឈ្មោះ Ariana Grande មិនរងរបួសអ្វីឡើយ។ នេះបើយោងតាមអ្នកនាំពាក្យរបស់តារាចម្រៀងអាមេរិកវ័យ២៣ឆ្នាំនេះ៕
© រក្សាសិទ្ធិដោយ thmeythmey.com