ជាតិ
ច្បាប់បោះឆ្នោត មិនឲ្យបក្សនយោបាយ គំរាមកំហែង បំភ័យ និងប្រើហិង្សា ទៅលើបក្សផ្សេង
× ច្បាប់បោះឆ្នោតជ្រើសក្រុមប្រឹក្សាឃុំ សង្កាត់ ដែលបានវិសោធនកម្មថ្មី និងបានចូលជាធរមានកាលពីចុងឆ្នាំ ២០១៥ បានហាមប្រាម គណបក្សនយោបាយ ឬបេក្ខជនទាំងអស់ មិនឲ្យគំរាមកំហែង ឬប្រើហិង្សាទៅលើបក្សនយោបាយ ឬបេក្ខជនបក្សផ្សេងនោះទេ។
ជំពូកទី ៧ នៃច្បាប់បោះឆ្នោតជ្រើសរើសក្រុមប្រឹក្សាឃុំ សង្កាត់ ដែលនិយាយពី ការឃោសនា បោះឆ្នោត បានកំណត់នៅក្នុងមាត្រា ៧១ ថា គណបក្សនយោបាយ និងបេក្ខជនទាំងអស់ ត្រូវចៀសវាង ប្រព្រឹត្តអំពើគំរាមកំហែង ឬបំភិតបំភ័យ ឬអំពើហិង្សា ទៅលើប្រជាពលរដ្ឋ ទៅលើគណបក្សនយោបាយ ឬបេក្ខជនដទៃទៀតឡើយ។
មាត្រាដដែលបន្តថា គ្រប់គណបក្សនយោបាយ បេក្ខជន ឬអ្នកគាំទ្រទាំងអស់ មិនត្រូវនិយាយដោយផ្ទាល់មាត់ ឬដោយប្រយោល ឬសរសេរជាលាយលក្ខណ៍អក្សរក្នុងន័យ អសីលធម៌ ប្រមាថ ទៅលើបេក្ខជន អ្នកគាំទ្រ ឬលើបុគ្គលណាមួយនោះទេ។
នៅក្នុងជំពូកទី ២ នៃមាត្រា ៩ នៃច្បាប់បោះឆ្នោតឃុំ សង្កាត់ ក៏បានផ្តល់អំណាចឲ្យគណៈកម្មាធិការជាតិរៀបចំការបោះឆ្នោតជាអ្នកធានា និងការពារកុំឲ្យមានការគំរាមកំហែង។ មាត្រា ៩ ចែងយ៉ាងនេះថា៖« គ.ជ.ប ជាអ្នកធានាឲ្យជនគ្រប់រូប មានសិទ្ធិចូលរួមប្រកបដោយសុវត្ថិភាព និងគ្មានការភ័យខ្លាច ឬការបំភិតបំភ័យក្នុងដំណើរការបោះឆ្នោត»៕
Tag:
បោះឆ្នោតឃុំ សង្កាត់
ច្បាប់
© រក្សាសិទ្ធិដោយ thmeythmey.com