អន្តរជាតិ
ណាតូសម្រេចចូលរួមសម្ព័ន្ធអន្តរជាតិកម្ចាត់ភេរវជន IS ស៊ីរីនិងអ៊ីរ៉ាក់ ផ្គាប់ចិត្ត ដូណាល់ ត្រាំ
× អគ្គលេខាធិការបក្សសម្ព័ន្ធយោធាណាតូ នឹងចូលរួមប្រយុទ្ធប្រឆាំងភេរវជនដែស្ហ (Daesh)ឬក្រុមរដ្ឋឥស្លាមជាមួយសម្ព័ន្ធអន្តរជាតិដឹកនាំដោយអាមេរិក។ការប្រកាសនេះធ្វើឡើងមុនជំនួបកំពូលមេដឹកនាំសមាជិកណាតូនៅទីក្រុងព្រុចសែលដែលប្រធានាធិបតី ដូណាល់ ត្រាំ ក៏មានវត្តមានក្នុងនោះផង។ ថ្វីបើមានការសម្រេចចិត្តដូច្នេះក្តី បងធំអឺរ៉ុបមួយចំនួនបារម្ភពីការចូលរួមដោយផ្ទាល់របស់ណាតូក្នុងសង្គ្រាមប្រឆាំងភេរវកម្មនេះ។
ចុងក្រោយបក្សសម្ព័ន្ធយោធាណាតូដែលលោក ដូណាល់ ត្រាំ ធ្លាប់ហៅថាជាអង្គការហួសសម័យនោះបានសម្រេចចិត្តចូលរួមក្នុងប្រតិបតិ្តការសឹកប្រឆាំងភេរវជនក្រុមរដ្ឋឥស្លាមដឹកនាំដោយសហរដ្ឋអាមេរិក។ នេះបើតាមការប្រកាសរបស់ប្រមុខអង្គការណាតូលោក Jens Stoltenbergនៅថ្ងៃព្រហស្បតិ៍ទៅ ២៥ ឧសភា ប៉ុន្មានម៉ោងប៉ុណ្ណោះ មុនជំនួបកំពូលជាមួយលោក ដូណាល់ ត្រាំ។
យោងតាមទីភ្នាក់ងារព័ត៌មាន AFP លោក Jens Stoltenberg បានថ្លែងដូច្នេះថា៖« វាជាការផ្ញើសារនយោបាយដ៏ធំមួយដែលបញ្ជាក់ពីការប្តេជ្ញាចិត្តរបស់ណាតូក្នុងការកម្ចាត់ភេរវកម្ម»។
ប៉ុន្តែអគ្គលេខាធិការអង្គការណាតូរូបនេះបានបញ្ជាក់បន្ថែមថា ការចូលរួមនេះមិនមែនមានន័យថា កងទ័ពណាតូនឹងដើរតួនាទីជាទ័ពច្បាំងកម្ចាត់ក្រុមដែស្ហឬក្រុមផ្សេងទៀតនៅស៊ីរីនិងអ៊ីរ៉ាក់ដោយផ្ទាល់ឡើយ។ ណាតូនឹងដើរតួនាទីសំខាន់ក្នុងការគាំទ្រការប្រមែរប្រមូលព័ត៌មានចារកម្ម និងបង្កើនការបំពាក់បំប៉នសមត្ថភាពកងទ័ពតាមរយៈការផ្តល់ការហ្វឹកហ្វឺននៅអ៊ីរ៉ង់ផងដែរ។
ទោះជាបែបណាក្តី ការប្រកាសចូលរួមកម្ចាត់ភេរវកម្មជាមួយសម្ព័ន្ធអន្តរជាតិដឹកនាំដោយក្រុងវ៉ាស៊ីនតោន បង្ហាញឃើញកាន់តែច្បាស់ពីការប្រែងប្រែនផ្គាប់ចិត្តប្រធានាធិបតីអាមេរិក ដូណាល់ ត្រាំ ដែលធ្លាប់ទិតៀនណាតូចាស់ដៃនិងហៅអង្គការនេះថាជាអង្គការហួសសម័យផងនោះ។
សមាជិកណាតូ ទាំង ២៨ ចូលរួមក្នុងសម្ព័ន្ធអន្តរជាតិប្រឆាំងក្រុមដែស្ហដែលមានសមាជិកសរុបច្រើនជាង ៦០ប្រទេសនោះរៀងៗខ្លួនមិនមែនចូលរួមជាលក្ខណៈសមហភាពជ្រកក្រោមបក្សសម្ព័ន្ធណាតូឡើយ បើទោះជាកន្លងមកមានសម្ពាធខ្លាំងក្តី។
អ្វីដែលគួរឲ្យកត់សម្គាល់ ការប្រកាសនេះក៏វាកើតឡើងប៉ុន្មានម៉ោងមុនពេលលោក ដូណាល់ ត្រាំ ចូលរួមកិច្ចប្រជុំជាមួយប្រមុខរដ្ឋប្រមុខរដ្ឋាភិបាលរដ្ឋសមាជិកណាតូនៅក្រុងព្រុចសែលដែរ។ ហើយគេបានដឹងច្បាស់ថា គោលនបំណងសំខាន់របស់លោកមកចូលរួមប្រជុំគឺរម្លឹកឲ្យសម្ព័ន្ធមិត្តណាតូកាន់តែសកម្មក្នុងការដោះស្រាយបញ្ហាសន្តិសុខជាពិសេសចលនាភេរវកម្មតែម្តង។ មួយវិញទៀតលោក ដូណាល់ ត្រាំ ក៏ប្រឹងប្រែងដាក់សម្ពាធឲ្យរដ្ឋណាតូគិតគូរដល់ការបង្កើនការចំណាយលើវិស័យការពារជាតិឲ្យគ្រប់តាមកំណត់ ពីរភាគរយនៃផលិតផលក្នុងស្រុកសរុប កុំទោរទន់ពឹងលើតែអាមេរិកពេក។
ខណៈដែលណាតូ ព្រមឯកភាពចូលរួមសង្គ្រាមប្រឆាំងភេរវកម្មដឹកនាំដោយក្រុងវ៉ាស៊ីនតោន សមាជិកណាតូដូចជាបារាំង និងអាល្លឺម៉ង់ដែលជាបងធំអឺរ៉ុបនោះបានបង្ហាញក្តីកង្វល់ចំពោះអនាគតនៃបក្សសម្ព័ន្ធយោធានេះ។ បារាំងនិងអាល្លឺម៉ង់យល់ថា ការលូកលាន់ក្នុងបញ្ហាភេរវកម្មកាន់តែជ្រៅនៅមជ្ឈិមបូព៌ា អាចនឹងធ្វើឲ្យណាតូផុងខ្លួនក្នុងសង្គ្រាមងើបក្បាលមិនរួចផងនៅពេលអនាគត។
Tag:
ណាតូ
ដូណាល់ ត្រាំ
Jen Stoltenberg
© រក្សាសិទ្ធិដោយ thmeythmey.com