អន្តរជាតិ
អូស្ត្រាលី ថា អាមេរិកប្រឹងទប់ស្កាត់កូរ៉េខាងជើង ព្រោះបារម្ភកូរ៉េខាងត្បូងនិងជប៉ុនផលិតនុយក្លេអ៊ែរដែរ រដ្ឋមន្ត្រីការបរទេសអូស្ត្រាលី ជូលី ប៊ីស្ហប (រូបភាព Xinhua)
× តាំងពីដើមមក អាមេរិក ប្រឹងប្រែងយ៉ាងខ្លាំង និងប្រើប្រាស់ស្ទើរគ្រប់មធ្យោបាយទៅហើយក្នុងការរារាំងកូរ៉េខាងជើងពីការអភិវឌ្ឍកម្មវិធីនុយក្លេអ៊ែរ ព្រោះអាចនាំឲ្យមានការប្រណាំងប្រជែងសព្វាវុធក្នុងតំបន់។ បើតាមប្រមុខការទូតអូស្ត្រាលី ជូលី ប៊ីស្ហប (Julia Bishop) អាមេរិកបារម្ភថា បើបន្តឲ្យកូរ៉េខាងជើងអភិវឌ្ឍនុយក្លេអ៊ែរ ឬមីស៊ីលទៀតនោះ ប្រទេសក្នុងតំបន់ខ្លះដូចជាកូរ៉េខាងត្បូង និងជប៉ុន អាចចាប់ផ្ដើមកម្មវិធីនុយក្លេអ៊ែរស្រដៀងគ្នានេះ ដើម្បីទុកការពារខ្លួនមិនខាន។
កម្មវិធីនុយក្លេអ៊ែកូរ៉េខាងជើង អាចបណ្ដាលឲ្យតំបន់អាស៊ីប៉ាស៊ីហ្វិកធ្លាក់ចូលក្នុងសម័យកាលរត់ប្រណាំងសព្វាវុធមិនខាន។ នេះជាការព្រួយបារម្ភរបស់មន្ត្រីរដ្ឋបាលប្រធានាធិបតី ដូណាល់ ត្រាំ ប្រាប់ទៅកាន់រដ្ឋមន្ត្រីការបរទេសអូស្ត្រាលី លោកស្រី ជូលី ប៊ីស្ហប ។ ដោយសារបញ្ហានេះ ទើបអាមេរិកប្រឹងប្រែងប្រើគ្រប់វិធីទាំងអស់ ទាំងការដាក់ទណ្ឌកម្ម ទាំងការសម្ញែងអាវុធទំនើប សំដៅបង្ខំឲ្យកូរ៉េខាងជើងបោះបង់កម្មវិធីនុយក្លេអ៊ែរចោល។
មកទល់ពេលនេះ កូរ៉េខាងជើង បានសាកល្បងនុយក្លេអ៊ែចំនួន៥លើករួចមកហើយ ព្រមទាំងបានបាញ់មីស៊ីលជាច្រើនលើកថែមទៀត។ របបដឹកនាំក្រុងព្យុងយ៉ាងអះអាងថា កម្មវវិធីនុយក្លេអ៊ែររបស់ខ្លួន ជារឿងចាំបាច់បំផុតដើម្បីការពារខ្លួនពីការឈ្លានពានរបស់អាមេរិក។ អាមេរិកបារម្ភថា កម្មវិធីនុយក្លេអ៊ែរនេះ នឹងបង្ខំឲ្យកូរ៉េខាងត្បូង ឬជប៉ុន បង្ខំចិត្តផលិតអាវុធប្រល័យលោកដែរមិនខាន។
លោកស្រី ប៊ីស្ហប និយាយថា អគ្គរដ្ឋទូតអាមេរិកប្រចាំអង្គការសហប្រជាជាតិ Nikki Haley បានប្រាប់លោកស្រីពីការបារម្ភនេះ អំឡុងពេលជួបពិភាក្សាគ្នានៅឯក្រុង New York នាពេលថ្មីៗនេះ។ ក្នុងកិច្ចសម្ភាសជាមួយកាសែត The Australian រដ្ឋមន្ត្រីការបរទេសអូស្ត្រាលី និយាយដែរថា ពេលកូរ៉េខាងជើងត្រូវទទួលស្គាល់ជារដ្ឋមាននុយក្លេអ៊ែរ កូរ៉េខាងត្បូង ឬជប៉ុន ច្បាស់នាំគ្នាធ្វើតាម ព្រោះមានជម្រើសតិចតួចដើម្បីការពារខ្លួន។
យ៉ាងណាក្ដី កូរ៉េខាងជើងប្រកាសដាច់ខាតហើយថា ខ្លួនមិនបោះបង់កម្មវិធីនុយក្លេអ៊ែរចោលឡើយ ទោះជាអាមេរិកគំរាមផង អង្អែលខ្នងផងក្ដី។ រដ្ឋបាលលោក ត្រាំ បានបញ្ជូនសព្វាវុធឧបទ្វីបកូរ៉េ និងបានបន្តដាក់ទណ្ឌកម្មឯកតោភាគី ក្នុងន័យបង្ខំឲ្យកូរ៉េខាងជើងដើរចូលតុចរចាវិញ។ ជាមួយគ្នានោះ អាមេរិកក៏បានបន្ទន់ឥរិយាបថបន្តិច ដោយបង្ហាញចង់ចរចាដែរ បើកូរ៉េខាងជើងព្រមបោះបង់នុយក្លេអ៊ែរនោះ។ ប៉ុន្តែកូរ៉េខាងជ៉ងនៅតែមានះរឹងរូសដដែល។
ក្រុងវ៉ាស៊ីនតោន ក៏មិនភ្លេចចាប់ដៃជាមួយចិនក្នុងការដាក់សម្ពាធលើកូរ៉េខាងជើងដែរ។ ប៉េកាំង ដែលជាសម្ព័ន្ធមិត្តជិតស្និទ្ធ និងជាដង្ហើមការទូតដ៏សំខាន់របស់ព្យុងយ៉ាងតាំងពីយូរមកនោះ ហាក់បង្កើនសម្ពាធខ្លាំងលើមិត្តចាស់របស់ខ្លួននារយៈពេលចុងក្រោយនេះ។ ក្រោមមូលហេតុអនុវត្តតាមសេចក្ដីរបស់ក្រុមប្រឹក្សាសន្តិសុខ ចិនឈប់នាំចូលធ្យូងថ្មពីកូរ៉េខាងជើង ហើយការនាំចូលធញ្ញជាតិមកកាន់ចិនក្នុងឆ្នាំនេះក៏ថយចុះដែរ៕
Tag:
អូស្ត្រាលី
អាមេរិក
កូរ៉េខាងត្បូង
ជប៉ុន
កូរ៉េខាងជើង
Julia Bishop
© រក្សាសិទ្ធិដោយ thmeythmey.com