ព័ត៌មានជាតិ
ខ្មែរក្រហម
កំណាព្យ
ONE Championship
ចំណេះដឹងទូទៅ
ពន្យល់ពាក្យ
នយោបាយ
សេដ្ឋកិច្ច
សង្គម
ព័ត៌មានកីឡាជាតិ
វិទ្យុ
ព័ត៌មានសុខភាព
រូបត្លុក
ពីនេះ ពីនោះ
ព័ត៌មានអន្តរជាតិ
នយោបាយ
សិល្បៈ
COVID-19
សេដ្ឋកិច្ច
សង្គម
វប្បធម៌
FIFA
កីឡាអន្តរជាតិ
សង្រ្កាន្តឆ្នាំថ្មី
អត្ថបទពាណិជ្ជកម្ម
បទយកការណ៍/សម្ភាស
ជាតិ
បទយកការណ៍ / បទសម្ភាសន៍
ឯកអគ្គរដ្ឋទូតកូរ៉េ៖«កូរ៉េបោះទុននៅកម្ពុជា ចង់ឲ្យកម្ពុជារួមចំណេញជាមួយគ្នា»
11, Oct 2017 ,
11:18 am
រូបភាព
×
ដោយ:
លាង ដឺលុច (Leang Delux)
ផ្សាយឡើងវិញ៖
សាធារណរដ្ឋកូរ៉េក៏ចាប់អារម្មណ៍បោះទុននៅកម្ពុជា ដូចជប៉ុន និងចិនដែរ។ ឯកអគ្គរដ្ឋទូតកូរ៉េប្រចាំកម្ពុជា លោក Kim Won-Jin បានប្រាប់សារព័ត៌មានថ្មីៗថា គោលការណ៍វិនិយោគរបស់ប្រទេសកូរ៉េនៅក្រៅប្រទេស គឺការរីកចម្រើនរួមគ្នា ចំណេញដូចគ្នា និងការចែករំលែកបទពិសោធន៍ និងចំណេះដឹងជាមួយពលរដ្ឋនៃប្រទេសដែលកូរ៉េបោះទុន។ នៅកម្ពុជា កូរ៉េចាប់អារម្មណ៍លើវិស័យជាច្រើន ប៉ុន្តែលោកឯកអគ្គរដ្ឋទូត Won-jin កំពុងគាំទ្រការបង្កើតមជ្ឈមណ្ឌលកសិផលមួយដើម្បីនាំផ្លែឈើកម្ពុជាចេញទៅប្រទេសរបស់លោក។
សូមលោកអ្នកអានបទសម្ភាសរវាងលោក លាង ដឺលុច នាយកប្រតិបត្តិនៃសារព័ត៌មានថ្មីៗ និងលោកឯកអគ្គរដ្ឋទូតកូរ៉េ Kim Won-jin ដូចតទៅ៖
លោក លាង ដឺលុច៖
លោកឯកអគ្គរដ្ឋទូត! តើក្នុងរយៈពេលដែលលោកកំពុងបំពេញបេសកកម្មការទូតនៅកម្ពុជាជិត៣ឆ្នាំមកនេះ តើមានវិនិយោគិនកូរ៉េថ្មីណាខ្លះមកបណ្តាក់ទុននៅកម្ពុជា?
លោក Kim Won-jin៖
កម្ពុជាមានទាំងគុណសម្បត្តិ និងគុណវិបត្តិសម្រាប់ការវិនិយោគ ដូចនៅប្រទេសដទៃទៀតដែរ។ បញ្ហាហេដ្ឋារចនាសម្ព័ន្ធ ផ្លូវថ្នល់ និងអគ្គិសនី អាចជាគុណវិបត្តិ ប៉ុន្តែកំណើនសេដ្ឋកិច្ច៧ភាគរយជារៀងរាល់ឆ្នាំ គឺជាគុណសម្បត្តិមួយ។ នេះបានន័យថា ទីផ្សារកម្ពុជាកាន់តែធំឡើងៗ។ ជាទូទៅ វិនិយោគិនកូរ៉េដែលមកបោះទុននៅកម្ពុជា ពួកគេមានគោលដៅ៣។ ទី១ ការវិនិយោគណាមួយ ត្រូវតែផ្តល់ផលប្រយោជន៍ឲ្យគ្នាទៅវិញទៅមក។ ទី២ គឺការបង្កើតការងារកាន់តែច្រើនដល់ពលរដ្ឋកម្ពុជា និងទី៣ យើងមិនចង់ឲ្យសហគ្រាសកូរ៉េយកលុយចេញទៅប្រទេសកូរ៉េទាំងអស់នោះទេ គឺត្រូវរួមចំណែកបង្កើនផលិតផលក្នុងស្រុកសរុបរបស់ពលរដ្ឋកម្ពុជា។ ស្ថានទូតកូរ៉េ កំពុងយកចិត្តទុកដាក់លើវិស័យជាច្រើននៅកម្ពុជា ប៉ុន្តែវិស័យកសិកម្មជាវិស័យសំខាន់។ យើងបានកំពុងរៀបចំមជ្ឈមណ្ឌលកសិផលដើម្បីនាំចេញផ្លែឈើកម្ពុជាទៅប្រទេសកូរ៉េ។ ការវិនិយោគលើកសិផល ត្រូវការពេលវេលាយូរ និងដើមទុនច្រើន។ ក្នុងពេលនេះ ស្ថានទូតកូរ៉េកំពុងគាំទ្រគម្រោងបង្កើតតំបន់សេដ្ឋកិច្ចពិសេសមួយដែលអនុញ្ញាតឲ្យសហគ្រាសកូរ៉េអាចបង្កើតរោងចក្រតម្លើងរថយន្ត និងម៉ូតូផងដែរ។ ពេលនោះយើងនឹងបង្កើតការងារថែមទៀតសម្រាប់ពលរដ្ឋកម្ពុជា។ ម្យ៉ាងវិញទៀត កម្ពុជាស្ថិតនៅចំនុចកណ្តាលនៃតំបន់អាស៊ាន នេះជាគុណសម្បត្តិខ្លាំងមែនទែន។
លោក លាង ដឺលុច៖
តើលោកអាចប្រាប់អ្នកអានសារព័ត៌មានថ្មីៗយើងបានទេអំពីទំហំនៃការផ្លាស់ប្តូរពាណិជ្ជកម្មរបស់កម្ពុជា និងកូរ៉េ?
លោក Kim Won-jin៖
នៅក្នុងឆ្នាំ២០១៦ ទំហំនៃការផ្លាស់ប្តូរពាណិជ្ជកម្មរវាងប្រទេសទាំងពីរបានឈានដល់ ៨០០ លានដុល្លារ។ ហើយការនាំចេញពីកូរ៉េ ចូលមកកម្ពុជាមានតម្លៃ ៥៧០លានដុល្លារ ដែលច្រើនជាងតម្លៃនៃការនាំចេញពីកម្ពុជាចូលទៅកូរ៉េដែលមានតែ ២៣០លានដុល្លារ។ តួលេខនេះបានបង្ហាញពីអតុល្យភាពរវាងការនាំចេញពីកម្ពុជាចូលទៅកូរ៉េ និងការនាំចេញពីកូរ៉េចូលមកកម្ពុជា។ ហេតុដូច្នេះហើយ ខ្ញុំចង់ឲ្យការនាំចេញពីកម្ពុជាចូលទៅកូរ៉េ មានកំណើនជាងនេះ។ យើងត្រូវគិតពីឧត្តមភាពនៃការប្រកួតប្រជែង ថាតើកម្ពុជាអាចមានផលិតផលអ្វីខ្លះដែលមានភាពប្រកួតប្រជែងខ្លាំង?
លោក លាង ដឺលុច៖
ចុះតើជំនួយរបស់សាធារណរដ្ឋកូរ៉េមកកម្ពុជា មានទំហំប៉ុណ្ណាហើយមកដល់ពេលនេះ?
លោក Kim Won-jin៖
ជំនួយមានពីរប្រភេទ គឺជំនួយឥតសំណង និងជំនួយដែលមានសំណង។ មកដល់ត្រឹមឆ្នាំ២០១៦ ជំនួយទាំងពីរប្រភេទនេះមានទំហំ ៦០០លានដុល្លារ។ កម្ពុជាគឺជាប្រទេសដៃគូអាទិភាពរបស់កូរ៉េសម្រាប់ការផ្តល់ជំនួយ (ODA)។ មុននឹងផ្តល់ជំនួយមកកម្ពុជា រដ្ឋាភិបាលកូរ៉េត្រូវមើលផែនការអភិវឌ្ឍជាតិរបស់កម្ពុជា ដើម្បីយើងអាចដឹងអំពីវិស័យអាទិភាព។ អ្វីដែលកូរ៉េកំពុងយកចិត្តទុកដាក់ចំពោះកម្ពុជា គឺការអភិវឌ្ឍជនបទ បណ្តុះបណ្តាលធនធានមនុស្ស វិស័យដឹកជញ្ជូន និងវិស័យសុខាភិបាល។
លោក លាង ដឺលុច៖
ពលរដ្ឋខ្មែរបានឮច្រើនអំពីស្ថាប័ន Koica របស់ប្រទេសកូរ៉េ។ សូមលោកឯកអគ្គរដ្ឋទូតផ្តល់ការពន្យល់លំអិតបន្តិចអំពីអាណត្តិរបស់ Koica នៅកម្ពុជា។
លោក Kim Won-jin៖
Koica គឺជាស្ថាប័នមួយរបស់រដ្ឋាភិបាលកូរ៉េ ហើយវាស្ថិតនៅក្នុងឱវាទនៃស្ថានទូតកូរ៉េ។ Koica ធ្វើការងារលើការផ្តល់ជំនួយឥតសំណងរបស់កូរ៉េមកកម្ពុជា។ ប្រទេសធំៗមួយចំនួនដូចជាសហរដ្ឋអាមេរិកជាដើម ដែលកំពុងផ្តល់ជំនួយដល់កម្ពុជា មិនដែលមានប្រវត្តិជាប្រទេសទទួលជំនួយពីគេទេ។ ប៉ុន្តែកូរ៉េធ្លាប់ជាប្រទេសក្រីក្រ ហើយមានពិសោធន៍ទទួលជំនួយពីប្រទេសធំៗដែរ។ កម្ពុជាមានស្ថានភាពស្រដៀងនឹងកូរ៉េដែរ។ ដូច្នេះខ្ញុំគិតថា យើងកំពុងផ្តល់ជំនួយដល់កម្ពុជា យើងចង់ឲ្យកម្ពុជាអាចក្លាយជាប្រទេសដែលផ្តល់ជំនួយចំពោះប្រទេសក្រីក្រដែរ។
លោក លាង ដឺលុច៖
សំណួរចុងក្រោយរបស់ខ្ញុំសម្រាប់លោកឯកអគ្គរដ្ឋទូត គឺថា តើសាធារណរដ្ឋកូរ៉េ មាននយោបាយប្រកួតប្រជែងយ៉ាងណានៅក្នុងទីផ្សារអាស៊ាន ទន្ទឹមនឹងប្រទេសអភិវឌ្ឍក្នុងតំបន់ផ្សេងទៀតដូចជាចិន និងជប៉ុន?
លោក Kim Won-jin៖
ការពិត យើងប្រកួតប្រជែងផង ហើយយើងក៏សហការគ្នាដែរ។ យើងដឹងថា ប្រទេសចិន គឺជាប្រទេសធំដែលកំពុងបោះទុនច្រើននៅក្នុងទីផ្សារអាស៊ាន និងនៅកម្ពុជាផងដែរ។ ចំណែកប្រទេសជប៉ុនវិញ ជប៉ុនមានប្រវត្តិយកចិត្តទុកដាក់យូរហើយចំពោះតំបន់អាស៊ាន ដោយបានបណ្តាក់ទុនច្រើនលើវិស័យឧស្សាហកម្ម និងផលិតកម្មក្នុងទីផ្សារនេះ។ ហើយថ្មីៗនេះ នៅភ្នំពេញក៏មានភោជនីយដ្ឋានជប៉ុនច្រើន និងសណ្ឋាគារផងដែរ។ នៅក្នុងធនាគារអេស៊ីលីដា ដែលជាធនាគារធំមួយរបស់កម្ពុជា គឺជនជាតិជប៉ុនដែលជាម្ចាស់ភាគហ៊ុនធំ។
ដូចប្រទេសចិន និងជប៉ុនដែរ សាធារណរដ្ឋកូរ៉េក៏ចាប់អារម្មណ៍លើតំបន់អាស៊ាន និងកម្ពុជាដូចគ្នាដែរ។ ចំនួនបណ្តាក់ទុនរបស់កូរ៉េ នៅតំបន់អាស៊ានមានទំហំ ៤០០០លានដុល្លារ។ កូរ៉េបានបណ្តាក់ទុនច្រើនជាងគេនៅក្នុងប្រទេសចិន បន្ទាប់មកគឺនៅអាស៊ានតែម្តង។ បានន័យថា អាស៊ានស្ថិតនៅចំណាត់ថ្នាក់ទី២ ដែលស្ថិតនៅខ្ពស់ជាងនៅសហភាពអឺរ៉ុបទៀត។
លោក លាង ដឺលុច៖
ចុះតើកូរ៉េមានគោលនយោបាយប្រកួតប្រជែងបែបណាខ្លះនៅលើទីផ្សារអាស៊ាន នៅចំពោះមុខចិន និងជប៉ុន?
លោក Kim Won-jin៖
ទីមួយយើងផ្តល់ភាពស្និទ្ធស្នាល ទីពីរយើងផ្តល់ភាពទុកចិត្តគ្នា។ យើង កូរ៉េ យើងមិនដែលចង់ដណ្តើមទីផ្សារអាស៊ានតែម្តងហ្នឹងទេ។ ទីផ្សារប្រកួតប្រជែងរបស់កូរ៉េនៅអាស៊ាន គឺវិស័យព័ត៌មានវិទ្យា (IT) និងផ្នែកអេឡិចត្រូនិក។ ផលិតផល LG និង Sumsung មានគុណភាពល្អជាងរបស់ជប៉ុន។ ហើយក្នុងចំណោមគ្រឿងសំអាង និងផលិតផលប្រើប្រាស់ប្រចាំថ្ងៃ មានផលិតផលល្អៗច្រើន។ ប្រទេសកូរ៉េ នៅពេលយើងសម្រេចវិនិយោគនៅតំបន់អាស៊ីអាគ្នេយ៍ ក៏ដូចជានៅប្រទេសកម្ពុជា យើងតែងតែតាំងចិត្តថា យើងដើរជាមួយគ្នា ហើយឲ្យមានគោលដៅជាមួយគ្នា និងមានពិសោធន៍ជាមួយគ្នា។ បានន័យថា យើងចង់រកលុយជាមួយគ្នា ហើយយើងទទួលបានជោគជ័យជាមួយគ្នាដោយមានការផ្ទេរបច្ចេកវិទ្យា ដើម្បីឲ្យមានចំណែកកំណើនសេដ្ឋកិច្ចនៅប្រទេសកម្ពុជា។ នេះជាគុណសម្បត្តិរបស់ប្រទេសកូរ៉េ៕
សូមចុចត្រង់នេះដើម្បីអានថ្មីៗជាភាសាអង់គ្លេស (Cambodianess.com)
Tag:
ស្ថានទូតកូរ៉េ
Kim Won-jin
អាស៊ាន
ទំនាក់ទំនងការទូតកម្ពុជាកូរ៉េ
© រក្សាសិទ្ធិដោយ thmeythmey.com
អត្ថបទពេញនិយម
ថ្ងៃ១៧ មេសា កាល៤៩ឆ្នាំមុន កងទ័ពខ្មែរក្រហមដណ្តើមបានទីក្រុងភ្នំពេញ
2 ថ្ងៃ
តើពាក្យ«បច្ច័យ»មានន័យច្បាស់លាស់ដូចម្តេច?
3 ថ្ងៃ
សមត្ថកិច្ចខេត្តកែប ធ្វើកិច្ចសន្យាអាជីវករ២រូប ឱ្យឈប់ទារលុយពីភ្ញៀវទេសចរដែលអង្គុយតាមឆ្នេរ
7 ថ្ងៃ
«បុរាណ»និង«បូរាណ» មានអត្ថន័យដូចគ្នា
7 ថ្ងៃ
«ភេរវកម្ម» មិនមែន «ភេវរកកម្ម» ឬ «ភារវកម្ម» ឡើយ
5 ថ្ងៃ
អត្ថបទពេញនិយមបន្ថែម