កីឡាជាតិ
ជាតិ
កីឡាករ ធឿន ធារ៉ា ផ្តួលថៃឲ្យសន្លប់រហូតសែងចេញពីសង្វៀន Max Muay Thai
× អ្នកលេងគុនខ្មែរ ធឿន ធារ៉ា បានផ្តួលកីឡាករថៃ Iklang Muaythaisamchaigym ឲ្យសន្លប់រហូតសែងចេញពីសង្វៀននាការប្រកួតមិត្តភាពអន្តរជាតិក្នុងព្រឹត្តិការណ៍ Max Muay Thai Ulimate 2017 កាលពីយប់ថ្ងៃទី២៥ ខែមិថុនា ម្សិលមិញ។
អ្នកលេងគុនខ្មែរមកពីក្លិបក្រសួងកសិកម្ម ធឿន ធារ៉ា បានប្រើកែងឆ្វេងផ្តួលកីឡាករថៃ Iklang Muaythaisamchaigym ឲ្យសន្លប់ត្រឹមទឹកទី២រហូតប្រើគ្រែស្នែងសែងចេញពីសង្វៀនប្រកួត។ ការផ្តួលថៃរហូតក្រោកលេងរួចនេះ ធ្វើឡើងនាការប្រកួតមិត្តភាពអន្តរជាតិក្នុងព្រឹត្តិការណ៍ Max Muay Thai Ulimate 2017 នៅលើទឹកដីនៃប្រទេសថៃ។
នេះមិនមែនជាលើកទី១នោះទេសម្រាប់ ធារ៉ា ដែលផ្តួលកីឡាករថៃឲ្យសន្លប់ដោយប្រើកែងដ៏មុតស្រួចរបស់គេ។ ជាក់ស្តែងកាលពីថ្ងៃទី១២ ខែកុម្ភៈ កន្លងទៅ ធារ៉ា បានផ្តួលកីឡាករថៃ Petchtongchai Sor.seubsak ដោយប្រើកែងឲ្យសន្លប់ត្រឹមទីកទី២ផងដែរ នាព្រឹត្តិការណ៍ Max Muay Thai នេះ។
នាការប្រកួតដ៏ស្វិតស្វាញដោយប្រើរយៈពេលមួយទឹកកន្លះ កីឡាករ ធឿន ធារ៉ា បានប្រើជើងស្តាំធាក់កីឡាករថៃឲ្យដួលអុកគូទជាការស្វាគមន៍នៅដើមទឹកទី១។ មួយជើងរបស់ ធារ៉ា បានធ្វើឲ្យថៃ ក្តៅស្លឹកត្រចៀកសម្រុកចូលទាត់ជើងក្រោមធ្វើឲ្យ ធារ៉ា ដួលភ្លាមៗដើម្បីជាការសងសឹក។ នៅពាក់កណ្តាលទឹកទី១ ថៃ បានបន្តដើរចូលដើម្បីដាក់សម្ពាធលើ ធារ៉ា តែផ្ទុយទៅវិញបែរជាត្រូវមួយកែងស្តាំរបស់ ធារ៉ា ពេញទំហឹងរហូតធ្វើឲ្យរូបគេបាត់បង់ការគ្រប់គ្រង។ ឆ្នៀតឱកាសនោះ ធារ៉ា បានសម្រុកចូលប្រើកែងឆ្វេង-ស្តាំទៅលើផ្ទៃមុខរហូតឲ្យអាជ្ញាកណ្តាលរាប់កីឡាករថៃ នៅចុងទឹកទី១។
នៅទឹកទី២ ធារ៉ា បានបន្តចូលប្រើកែង និងបោះជង្គង់ឆ្វេងស្តាំយ៉ាងច្រើន ឯកីឡាករថៃបានព្យាយាមគេច និងប្តូរកណ្តាប់ដៃផងដែរ តែនៅតែមិនអាចទប់ជាមួយនឹងផ្លែកែង និងជង្គង់ដ៏ធ្ងន់របស់ ធារ៉ា។ ការប្រើកែង និងជង្គង់ចំគោលដៅរបស់ ធារ៉ា បានធ្វើឲ្យថៃ ហាក់ថមថយកម្លាំងក្នុងការវាយតប។ ភាពទន់ជ្រាយរបស់ ថៃ ជាហេតុធ្វើឲ្យមានចន្លោះប្រហោង និងជាឱកាសដ៏ល្អសម្រាប់ ធារ៉ា ក្នុងការកែងឆ្វេងបុកកាណូតទៅលើផ្ទៃមុខ ដើម្បីផ្តួលថៃឲ្យសន្លប់ទៅពាក់កណ្តាលទឺកទី២នេះតែម្តង៕
Tag:
ប្រដាល់គុនខ្មែរ
ធឿន ធារ៉ា
Muay Thai
© រក្សាសិទ្ធិដោយ thmeythmey.com