ជាតិ
វៀតណាម ចង់ភ្ជាប់ទំនាក់ទំនងជាមួយកម្ពុជា ឲ្យកាន់តែស៊ីជម្រៅ ជំនួបរវាងសម្តេច ហ៊ុន សែន នាយករដ្ឋមន្រ្តីនិងជាប្រធានគណបក្សប្រជាជនកម្ពុជា ជាមួយលោក ង្វៀន ហ៊្វូជុង អគ្គលេខាធិការបក្សកុម្មុយនីស្តវៀតណាម នៅវិមានសន្តិភាព នាថ្ងៃទី២0 ខែកក្កដា ឆ្នាំ២0១៧។ រូបភាពពីទំព័រហ្វេសប៊ុកសម្តេច ហ៊ុន សែន
× ភ្នំពេញ៖ រហូតមកដល់ពេលនេះ ទំនាក់ទំនងការទូតរវាងកម្ពុជានិងវៀតណាម មានរយៈពេល៥០ឆ្នាំមកហើយ ដោយប្រទេសទាំងពីរបានឆ្លងកាត់ការតស៊ូ និងការសហការយ៉ាងជិតស្និទ្ធ ដើម្បីស្វែងរកសន្តិភាព និង ស្ថិរភាព។ នេះជាការលើកឡើងរបស់លោក ង្វៀន ហ៊្វូជុង អគ្គលេខាធិការបក្សកុម្មុយនីស្តវៀតណាម ក្នុងជំនួបជាមួយសម្តេច ហ៊ុន សែន នាយករដ្ឋមន្ត្រីនិងជាប្រធានគណបក្សប្រជាជនកម្ពុជា នៅវិមានសន្តិភាព នាថ្ងៃទី២0 ខែកក្កដា ឆ្នាំ២0១៧។
សម្តីរបស់លោក ង្វៀន ហ៊្វូជុង ខាងលើ ត្រូវបានដកស្រង់និងយកទៅចុះផ្សាយនៅលើទំព័រហ្វេសប៊ុករបស់សម្តេច ហ៊ុន សែន។ បើតាមទំព័រហ្វេសប៊ុករបស់សម្តេច ហ៊ុន សែន ដដែល លោក ង្វៀន ហ៊្វូជុង បានស្នើឡើងយ៉ាងដូច្នេះថា៖«សុំឲ្យប្រទេសទាំងពីរជំរុញការតភ្ជាប់ឲ្យកាន់តែស៊ីជម្រៅ តាមរយៈស្ថាប័នរដ្ឋ វិស័យអប់រំ យុវជន និងវិស័យសេដ្ឋកិច្ច ជាដើម ដោយធ្វើយ៉ាងណា ពង្រីកទំហំពាណិជ្ជកម្មទ្វេភាគីឲ្យកើនឡើងដល់ ៥ពាន់លានដុល្លារ នាឆ្នាំ២០២៥ខាងមុខ»។
នៅក្នុងជំនួបនោះ សម្តេច ហ៊ុន សែន ក៏បានស្នើទៅភាគីវៀតណាមវិញផងដែរ ដោយសុំឲ្យជួយជំរុញភ្ញៀវទេសចរ មកកម្ពុជា ឲ្យបានកាន់តែច្រើន។ ជាងនេះទៀត សម្តេច ហ៊ុន សែន ថែមទាំងជំរុញឲ្យមានកិច្ចសហការរវាងស្ថាប័ននិងអាជ្ញាធរខេត្ត ដែលជាប់ព្រំដែនកម្ពុជា-វៀតណាម ដើម្បីទប់ស្កាត់រាល់អំពើឧក្រិដ្ឋឆ្លងដែននានា ដែលអាចនឹងកើតមានឡើងនៅតាមព្រំដែននៃប្រទេសទាំងពីរ។
សូមបញ្ជាក់ថា លោក ង្វៀន ហ៊្វូជុង រួមទាំងគណៈប្រតិភូវៀតណាម បានមកធ្វើទស្សនកិច្ចផ្លូវការនៅកម្ពុជាចំនួន៣ថ្ងៃ គឺចាប់ពីថ្ងៃទី២0 ដល់ថ្ងៃទី២២ ខែកក្កដា ឆ្នាំ២0១៧។ ក្នុងដំណើរទស្សនកិច្ចរបស់ លោក ង្វៀន ហ៊្វូជុង ប្រទេសវៀតណាម បានផ្តល់ជំនួយ២៥លានដុល្លារ ដល់ប្រទេសកម្ពុជា ដើម្បីចំណាយលើការសាងសង់អគាររដ្ឋបាល នៅក្នុងរដ្ឋសភា៕
Tag:
កម្ពុជា-វៀតណាម
មិត្តភាព
© រក្សាសិទ្ធិដោយ thmeythmey.com