ជាតិ
អាជ្ញាធរសៀមរាប៖ សំណង់មុខសណ្ឋាគារសុខាធ្វើឲ្យខូចសណ្តាប់ធ្នាប់ និងសង់លើផ្លូវបុរាណ រូបភាព៖ រដ្ឋបាលខេត្តសៀមរាប
× សៀមរាប៖ រដ្ឋបាលខេត្តសៀមរាប ដែលមានការចូលរួមពីកងកម្លាំងចម្រុះ បានចុះរុះរើសំណង់ខុសច្បាប់មួយកន្លែង ស្ថិតនៅភូមិដូនប៉ា សង្កាត់ស្លក្រាម ក្រុងសៀមរាប ឬនៅខាងមុខសណ្ឋាគារសុខា សៀមរាប។ ការចុះរុះរើនេះ គឺមានការសហការបានយ៉ាងល្អពីប្រជាពលរដ្ឋជាម្ចាស់ផ្ទះ ក្រោយអាជ្ញាធរបានពន្យល់ពីភាពមិនស្របច្បាប់របស់ពួកគេ។
ក្នុងវីដេអូ ដែលបង្ហោះក្នុងហ្វេសប៊ុករដ្ឋបាលខេត្តសៀមរាប លោក សូរ ប្លាតុង អភិបាលក្រុងសៀមរាប និងជាអ្នកដឹកនាំកម្លាំងចុះរុះរើ បានឲ្យដឹងថា ផ្ទះដែលសង់ខុសច្បាប់ទាំងនោះមានចំនួន ១៩ខ្នង។ លោកបន្តថា សំណង់ទាំងនេះ គឺត្រូវបានប្រជាពលរដ្ឋទន្ទ្រានកាន់កាប់ដោយខុសច្បាប់ អំឡុងពេលយុទ្ធនាការជ្រើសរើសក្រុមប្រឹក្សា ឃុំសង្កាត់ អាណត្តិទី៤កន្លងទៅ ទោះមានការហាមឃាត់ពីអាជ្ញាធរមូលដ្ឋានបែបណាក្តី។
តាមការពន្យល់របស់លោក សូរ ប្លាតុង សំណង់ខុសច្បាប់ទាំងនោះ ស្ថិតក្នុងបុរីសណ្ឋាគារ ទេសចរណ៍ និងត្រូវបានរាជរដ្ឋាភិបាលកាត់ចេញតាមរយៈស.ជ.ណ លេខ ១៥៨។ យ៉ាងណា តាមការបញ្ជាក់របស់លោកអភិបាលក្រុង ទីតាំងខាងលើ ជាអតីតផ្លូវបុរាណ ដែលជាប្រព័ន្ធការពារក្រុងដ៏សំខាន់សម្រាប់រំដោះចរាចរណ៍ក្នុងខេត្ត។
ក្រោយការរុះរើសំណង់ចេញកាលពីថ្ងៃទី២០ កក្កដា រដ្ឋបាលខេត្តបានធ្វើការឈូសឆាយដីដើម្បីធ្វើផ្លូវ ចៀសវាងមានការរំលោភនៅពេលក្រោយ។ លោក សូរ ប្លាតុង បានប្រាប់ដល់ពលរដ្ឋកុំឲ្យចាញ់កលអ្នកញុះញង់ ឬឈ្មួញកណ្តាល ហើយមុនសាងសង់អ្វីត្រូវសួរព័ត៌មានទៅអាជ្ញាធរមូលដ្ឋានជាមុនសិន ចៀសវាងការខាតបង់ប្រយោជន៍ណាមួយ៕
Tag:
សូរ ប្លាតុង
សណ្ឋាគារសុខា
© រក្សាសិទ្ធិដោយ thmeythmey.com