ជាតិ
បទយកការណ៍ / បទសម្ភាសន៍
រថយន្ត
លោក ឃុន ចាន់ថា សង្ឃឹមយ៉ាងមុតមាំថាឧស្សាហកម្មរថយន្តនៅកម្ពុជា នឹងបន្តរីកធំធាត់
× លោក ឃុន ចាន់ថា នាយកគ្រប់គ្រងផ្នែកលក់ និងទីផ្សាររថយន្តប្រណីត Mercedes-Benz នៃក្រុមហ៊ុន Star Auto Cambodia បានបង្ហាញសុទ្ធិដ្ឋិនិយមខ្ពស់ ចំពោះការបន្តរីកចម្រើននៃឧស្សាហកម្មរថយន្តនៅកម្ពុជា។ ការអះអាងដូច្នេះ គឺសំអាងលើកំណើននៃការលក់រថយន្តប្រភេទ ទំនើបប្រណីតMercedes-Benz របស់ក្រុមហ៊ុន Star Auto ពិសេសកំណើនក្រោយការបោះឆ្នោតជ្រើសរើសក្រុមប្រឹក្សាឃុំ សង្កាត់។ ក្នុងកិច្ចសម្ភាស រវាងលោក ឃុន ចាន់ថា នាយកគ្រប់គ្រងផ្នែកលក់ និងទីផ្សាររថយន្តប្រណីត Mercedes-Benz មកពីក្រុមហ៊ុន Star Auto Cambodia ជាមួយ ប៉ុស្តិ៍អូតូ កាលពីពេលកន្លងទៅ លោក ឃុន ចាន់ថា បានគូសបញ្ជាក់ដូច្នេះថា៖«យើងនៅតែមានសង្ឃឹមមុតមាំថា ឧស្សាហកម្មរថយន្ត នឹងនៅតែបន្តរីកធំធាត់ និងអភិវឌ្ឍ»។
ក្រៅតែពីកំណើនលក់ អតិថិជនកាន់តែច្រើន បានអញ្ជើញទៅទស្សនារថយន្តដោយផ្ទាល់នៅអគារតាំងបង្ហាញរថយន្ត ស្ថិតលើបណ្តោយផ្លូវ៦០ម៉ែត្រ ខណៈរោងជាងជួសជុលរបស់ក្រុមហ៊ុននៅបន្តកើនឡើង។ នេះបើតាម លោក ចាន់ថា ដែលបន្តថា ក្រុមហ៊ុន Star Auto បានវិនិយោគនៅក្នុងប្រទេសកម្ពុជា ដោយផ្តោតលើរយៈពេលវែង ហើយមានឆន្ទៈដើម្បីអភិវឌ្ឍប្រកបដោយភាពអត់ធ្មត់ទៅលើទីផ្សារ ក៏ដូចជាក្រុមបុគ្គលិកផ្នែកលក់ និងផ្នែកសេវាកម្មក្រោយការលក់របស់យើង និងដល់អតិថិជនទូទៅរបស់ខ្លួន។
សូមអញ្ជើញអានកិច្ចសម្ភាសរវាង លោក ឃុន ចាន់ថា នាយកគ្រប់គ្រងផ្នែកលក់ និងទីផ្សាររថយន្តប្រណីត Mercedes-Benz មកពីក្រុមហ៊ុន Star Auto Cambodia និងប៉ុស្តិ៍អូតូ ៖
ប៉ុស្តិ៍អូតូ៖ នាពេលថ្មីនៅនេះនៅទីផ្សារអឺរ៉ុប ក្រុមហ៊ុនដើមរបស់ Mercedes-Benz បានប្រកាសប្រមូលយករថយន្តថ្មីៗ ដែលបានលក់ចេញទៅហើយរាប់លានគ្រឿង ចូលទៅក្រុមហ៊ុនវិញ ដើម្បីជួសជុលកែតម្រូវ។ នៅក្នុងទីផ្សារកម្ពុជាវិញ តើក្រុមហ៊ុន Star Auto Cambodia មានវិធានការយ៉ាងណាដែរ?
លោក ឃុន ចាន់ថា ៖ ទោះបីជាយ៉ាងណា ម្ចាស់រថយន្ត Mercedes-Benz ទាំងឡាយគួរតែយករថយន្តរបស់ខ្លួន មកចុះឈ្មោះជាមួយនឹងក្រុមហ៊ុន Star Auto។ ប្រសិនជាក្រុមហ៊ុន Mercedes-Benz តម្រូវឲ្យប្រមូលរថយន្តដែលបានលក់ចេញហើយ យកទៅពិនិត្យបច្ចេកទេសឡើងវិញ នោះ យើងអាចទាក់ទងជាមួយម្ចាស់រថយន្តទាំងនោះបាន ដោយឲ្យពួកគាត់ ទទួលបានការជួសជុលរថយន្តដោយឥតគិតថ្លៃ។ គោលដៅរបស់យើង មិនមែនជួសជុលរថយន្តតែម្តងប៉ុណ្ណោះនោះទេ។ គោលដៅរបស់យើង គឺត្រូវថែទាំ និងជួសជុលរថយន្តឲ្យបានត្រឹមត្រូវ ដើម្បីឲ្យម្ចាស់រថយន្ត និងគ្រួសាររបស់ពួកគាត់រីករាយ ទទួលយកបទពិសោធន៍ក្នុងការធ្វើដំណើរប្រកបដោយគុណភាព សុវត្ថិភាព និងផាសុកភាពនៅថ្ងៃនេះ និងនៅថ្ងៃស្អែក។ ខ្ញុំក៏សូមរំឭកទៅដល់ម្ចាស់រថយន្តយីហោផ្សេងៗទៀត ដែលប្រើប្រាស់រថយន្តមួយទឹក គួរយករថយន្តរបស់ខ្លួនទៅសាកសួរព័ត៌មាន ឬយកទៅចុះបញ្ជីនៅក្រុមហ៊ុនដើម ដែលមានមូលដ្ឋាននៅស្រុកខ្មែរយើងនេះដែរ។ ម្ចាស់យីហោដើមទាំងនោះ គេក៏អាចជួយអតិថិជនបានផងដែរ ក្នុងករណីមានបញ្ហាអ្វីមួយ ដែលជាកម្សោយរបស់រថយន្ត ហើយត្រូវបានគេរកឃើញវិញ រួចក៏ផ្តល់ដំណោះស្រាយថ្មីជូននោះ។
ប៉ុស្តិ៍អូតូ៖ កម្ពុជាទើបតែបញ្ចប់ការបោះឆ្នោតជ្រើសរើសក្រុមប្រឹក្សាឃុំ-សង្កាត់ កាលពីពេលថ្មីនេះ។ តើកាបោះឆ្នោតនេះ ជះឥទ្ធិពលយ៉ាងណាខ្លះចំពោះទីផ្សាររថយន្តប្រណីតទំនើប ជាពិសេសអតិថិជនរបស់ ក្រុមហ៊ុន Star Auto របស់លោក?
លោក ឃុន ចាន់ថា ៖ នៅមុនពេលបោះឆ្នោត ចំណាប់អារម្មណ៍លើការជាវរថយន្តមិនមានកំណើនគួរឲ្យកត់សម្គាល់នោះទេ។ ក៏ប៉ុន្តែបន្ទាប់ពីការបោះឆ្នោតរួចរាល់ ក្រុមហ៊ុន Star Auto បានលក់រថយន្តចេញ បានច្រើនគ្រឿងជាងមុន។ នៅពេលនេះ ទោះបីជាស្ថិតក្នុងអំឡុងពេលឈប់សម្រាក់ ឬរដូវក្តៅយ៉ាងណាក្តី អតិថិជនដែលអញ្ជើញចូលមកអគារតាំងបង្ហាញរថយន្ត និងរោងជាងជួសជុលរបស់ក្រុមហ៊ុនយើង នៅតែមានចំនួនច្រើន និងបន្តកើនឡើងជាដដែល។ យើងនៅតែមានសង្ឃឹមមុតមាំថា ឧស្សាហកម្មរថយន្ត នឹងនៅតែបន្តរីកធំធាត់ និងអភិវឌ្ឍ។ ក្រុមហ៊ុន Star Auto បានវិនិយោគនៅក្នុងប្រទេសកម្ពុជា ដោយផ្តោតលើរយៈពេលវែង ហើយយើងមានឆន្ទៈ ដើម្បីអភិវឌ្ឍប្រកបដោយភាពអត់ធ្មត់ទៅលើទីផ្សារ ក៏ដូចជាក្រុមបុគ្គលិកផ្នែកលក់ និងផ្នែកសេវាកម្មក្រោយការលក់របស់យើង និងដល់អតិថិជនទូទៅរបស់យើង។
ប៉ុស្តិ៍អូតូ៖ ក្នុងនាមលោកជាតំណាងឲ្យក្រុមហ៊ុនលក់រថយន្តថ្មីៗដ៏ប្រណិតនៅកម្ពុជា តើលោកមានមតិផ្តាំផ្ញើយ៉ាងណា ដល់ម្ចាស់រថយន្តថ្មីទំនើបទាំងអស់នោះ អាចប្រើប្រាស់រថយន្តរបស់ពួកគាត់បានល្អ និងយូអង្វែង?
លោក ឃុន ចាន់ថា ៖ យោបល់របស់យើងសម្រាប់បណ្តាម្ចាស់យានយន្ត គឺគួរតែធ្វើការថែទាំរថយន្តដោយមានការត្រួតពិនិត្យពីអ្នកជំនាញឲ្យបានត្រឹមត្រូវ។ មធ្យោបាយដែលល្អបំផុតដើម្បីចៀសវាងការជួសជុលដែលមិនចាំបាច់ ហើយខាតពេល គឺការពិនិត្យថែទាំឲ្យបានទៀងទាត់ ហើយត្រឹមត្រូវ។ ការថែទាំរថយន្ត មិនមែនគ្រាន់តែប្តូរប្រេងម៉ាស៊ីន ឬលាងសម្អាតប៉ុណ្ណោះនោះទេ ប៉ុន្តែត្រូវមើលលើការថែទាំសម្បកកង់ ផ្លិតទឹក (ដៃជូតកញ្ចក់) ហ្វ្រាំង ប្រេងប្រអប់លេខ និងប្រេងហ្វ្រាំង គួរតែត្រូវបានត្រួតពិនិត្យ និងប្តូរឲ្យបានទៀងទាត់ផងដែរ។ ភ្លើងសញ្ញា និងចង្កៀង ក៏គួរតែត្រូវបានត្រួតពិនិត្យ ដើម្បីចៀសនូវហានិភ័យផ្សេងៗផង។ ការចំណាយប្រាក់បន្តិចបន្តួច ទៅលើការថែទាំរថយន្តឲ្យបានទៀងទាត់ អាចជួយសន្សំសំចៃប្រាក់បានច្រើន ហើយក៏ជាមធ្យោបាយមួយ ក្នុងការធានាឲ្យបានថា រថយន្តរបស់យើង ពិតជាមានសុវត្ថិភាពក្នុងការបើកបរថែមទៀតផង។ ទង្វើរបៀបនេះ ប្រៀបដូចជាការមានវេជ្ជបណ្ឌិតប្រចាំគ្រួសារដូច្នេះដែរ ជម្រើសល្អបំផុត គឺការស្វែងរកកន្លែងជួសជុលរថយន្តល្អមួយ ដែលអាចជឿទុកចិត្ត ក្នុងការថែរក្សារថយន្តរបស់អ្នក ឲ្យរត់បានយ៉ាងល្អ គ្មានការបារម្ភនឹងគ្រោះថ្នាក់ ដែលអាចកើតមានឡើង ដោយការធ្វេសប្រហែសជាយថាហេតុ។
ប៉ុស្តិ៍អូតូ ៖ នៅក្នុងទីផ្សារដែលមិនមានការគ្រប់គ្រងត្រឹមត្រូវដូចសព្វថ្ងៃនេះ ម្ចាស់រថយន្តត្រូវប្រឈមនឹងជម្រើសជាច្រើន សម្រាប់ការជួសជុលរថយន្ត រហូតដល់ថ្នាក់ពិបាកក្នុងការសម្រេចថា តើត្រូវទៅកន្លែងមួយណា? ជាអកុសល ការសម្រេចចិត្តភាគច្រើន ត្រូវបានធ្វើឡើងដោយផ្អែកទៅលើ «តម្លៃប៉ាន់ស្មាន» របស់ជាងខ្វះជំនាញ?
លោក ឃុន ចាន់ថា ៖ សម្រាប់រូបខ្ញុំ ខ្ញុំចង់ជូនជាជម្រើសថា តើអ្នកចង់ជួសជុលរថយន្តអស់ប្រាក់តិច ឬចង់ជួសជុលវាឲ្យត្រូវ ចំកន្លែងពីអ្នកជំនាញត្រឹមត្រូវ? នេះគឺជាការសម្រចចិត្តដ៏លំបាក សម្រាប់មនុស្សជាច្រើន។ រោងជួសជុលត្រឹមត្រូវរបស់ Star Auto ត្រូវបានបង្កើតឡើងស្របទៅតាមស្តង់ដារសាកលរបស់ក្រុមហ៊ុន Mercedes-Benz (MB) ដូចគ្នាទៅនឹងឯបរទេសតែម្តង ដោយមានបំពាក់នូវម៉ាស៊ីនកុំព្យូទ័រសម្រាប់ត្រួតពិនិត្យរថយន្ត ឧបករណ៍ជួសជុលដែលត្រូវបានតម្រូវដោយក្រុមហ៊ុន MB ការប្រើប្រាស់គ្រឿងបន្លាស់ថ្មីពិតប្រាកដរបស់ក្រុមហ៊ុន MB ព្រមទាំងមានអ្នកបច្ចេកទេសជាច្រើន ដែលទទួលបានការបណ្តុះបណ្តាលត្រឹមត្រូវពីក្រុមហ៊ុន Mercedes-Benz។ នៅពេលដែលខ្ញុំចង់ប្រាប់ម្ចាស់រថយន្តទាំងឡាយពីរឿងនេះ ហើយពេលដែលខ្ញុំប្រាប់ពួកគាត់ថា ពួកគាត់អាចជួសជុលអ្វីក៏បាន អាស្រ័យលើកំហូចនៃរថយន្តនីមួយៗ ព្រោះរោងជាងយើង អាចជួសជុលបានគ្រប់ប្រភេទនៃបញ្ហា ការឆ្លើយតបដំបូងរបស់ពួកគាត់ គឺ «ប្រហែលជាជាថ្លៃណាស់ហើយ! អត់ទៅទេ»។ គោលការណ៍របស់ក្រុមហ៊ុន Star Auto គឺតែងតែផ្តល់ឲ្យអតិថិជន ត្រួតពិនិត្យមើលការវាយតម្លៃលម្អិតសិន មុនពេលចាប់ផ្តើមធ្វើការជួសជុល ព្រោះក្រុមអ្នកជំនាញរបស់យើង គាត់អាចឆែកដឹងពីបញ្ហាទាំងអស់។ តារាងតម្លៃនៃការជួសជុល ត្រូវបានផ្តល់ឲ្យអតិថិជនដោយមិនគិតថ្លៃ។ គ្រាន់តែសាកសួរ ឬយកមកពិនិត្យសិនសោះ គឺវាមិនមានអស់ប្រាក់នោះឡើយ ដូច្នេះហើយបានជាយើង លើកទឹកចិត្តឲ្យម្ចាស់រថយន្ត ប្រៀបធៀបតម្លៃនៃការជួសជុល និងគុណភាព ក៏ដូចជាវិជ្ជាជីវៈរបស់យើង ទៅនឹងកន្លែងណាមួយ ដែលអតិថិជនគិតថា គេជួសជុលបាន ហើយថោក។
ប៉ុស្តិ៍អូតូ៖ ដោយមានរថយន្តមួយទឹកច្រើនលើសលុប ត្រូវបានអ្នកប្រើប្រាស់ក្នុងស្រុក ទិញយកមកប្រើជាបន្តបន្ទាប់នៅកម្ពុជា។ តើលោកមានមតិផ្តាំផ្ញើយ៉ាងណា ដើម្បីជាមធ្យោបាយ អាចជួយដល់ម្ចាស់រថយន្តមួយទឹកទាំងនោះ អាចរក្សាគុណភាពដើម្បីប្រើប្រាស់បាន?
លោក ឃុន ចាន់ថា ៖ ប្រសិនជាអ្នកមានរថយន្តជជុះ ឬរថយន្តដែលមិនត្រឹមត្រូវតាមស្តង់ដាខ្ញុំសូមណែនាំឲ្យពួកគាត់ យករថយន្តរបស់ពួកគាត់ទៅចុះបញ្ចីរថយន្តជាមួយនឹងអ្នកលក់ស្របច្បាប់។ រថយន្តទំនើបៗមានប្រព័ន្ធអេឡិចត្រូនិកច្រើន និងបណ្តាញអគ្គិសនីក៏ច្រើនជាងមុន ហើយក៏មានប្រព័ន្ធកាន់តែស្មុគស្មាញខ្លាំងផងដែរ។ ប្រសិនជាក្រុមហ៊ុនដើម ជូនដំណឹងអំពីការប្រមូលយករថយន្តមកវិញ នោះក្រុមហ៊ុន លក់រថយន្តស្របច្បាប់ទាំងនោះ នឹងដឹងពីរបៀបទាក់ទងទៅពួកគាត់ នេះគឺជាផ្នែកមួយនៃការចូលរួមចំណែកទទួលខុសត្រូវរបស់ពួកគេដែរ (ក្រុមហ៊ុនដើម)។ សូមចង់ចាំថា ការប្រមូលយករថយន្តមកពិនិត្យឡើងវិញ នឹងផ្តល់ការពិនិត្យឬប្តូរគ្រឿងបន្លាស់ ដោយមិនមានគិតថ្លៃអ្វីឡើយ។ ដូច្នេះ ហេតុអ្វីបានជាម្ចាស់រថយន្តដែលមិនបានទិញរថយន្តពីក្រុមហ៊ុនចែកចាយស្របច្បាប់ នៅស្ទាក់ស្ទើរនឹងសុវត្ថិភាពនៃរថយន្តរបស់ខ្លួនទៀត ជាពិសេសពាក់ព័ន្ធនឹងសុវត្ថិភាពរបស់ខ្លួនផងដែរនោះ។ ក្រុមហ៊ុនដើមគេណែនាំដោយឲ្យយករថយន្តចូលវិញហើយ នៅស្ងៀមធ្វើអីទៀត គួរតែប្រញាប់ទៅចុះឈ្មោះឲ្យបានមុនគេ ព្រោះគេអត់យកលុយទេ៕
Tag:
ឃុន ចាន់ថា
Star Auto
រថយន្ត
Mercedes-Benz
© រក្សាសិទ្ធិដោយ thmeythmey.com