ជាតិ
នយោបាយជាតិ
រូបពីហ្វេសប៊ុកលោក សុខ ទូច (កណ្ដាល)
×![]()
ភ្នំពេញ៖ នៅថ្ងៃសុក្រទី ១១ ខែសីហា សប្តាហ៍ក្រោយ លោក សុខ ទូច នឹងចូលកាន់តំណែងជាប្រធានរាជបណ្ឌិត្យសភាកម្ពុជា។ មុនចូលកាន់តំណែងជាផ្លូវការ លោក សុខ ទូច សន្យាជំរុញវិស័យកសិកម្មនៅកម្ពុជា ក្នុងទិសដៅជួយដល់ជីវភាពរបស់ប្រជាពលរដ្ឋ។
ការងាររៀបចំរចនាសម្ព័ន្ធ និងលក្ខន្តិកៈថ្មី គឺជាកិច្ចការដែលលោក សុខ ទូច នឹងរៀបចំឡើងវិញ នៅពេលចូលកាន់តំណែងជាប្រធានរាជបណ្ឌិត្យសភាជាផ្លូវការ។ ក្រៅពីការងារទាំងនេះលោក សុខ ទូច ក៏បានកំណត់យកការងារលើវិស័យកសិកម្មជាអទិភាព ដើម្បីជួយដោះស្រាយបញ្ហាប្រជាពលរដ្ឋផង។ ផែនការមេដែលលោក សុខ ទូច ត្រៀមដោះស្រាយនោះ មានចំនួន៣ចំណុច គឺការជំរុញឲ្យប្រជាពលរដ្ឋចិញ្ចឹមសត្វគោអូស្ត្រាលី , ការរៀបចំឧទ្យានជាតិនៅខេត្តព្រះវិហារ និងការរកដំណោះស្រាយចំពោះបញ្ហាសេវាប្រាក់កម្ចី ពីគ្រឹះស្ថានមីក្រូហិរញ្ញវត្ថុ។
ថ្លែងប្រាប់សារព័ត៌មានថ្មីៗ លោក សុខ ទូច ដែលនឹងកាន់តំណែងប្រធានរាជបណ្ឌិត្យសភាជាផ្លូវការនៅថ្ងៃទី១១ សីហា នោះបានអត្ថាធិប្បាយយ៉ាងដូច្នេះ៖
ក្រុមការងារស្រាវជ្រាវរបស់រាជបណ្ឌិត្យសភា នឹងជួបរដ្ឋមន្ត្រីក្រសួងធនធានទឹក និងឧតុនិយមលោក លឹម គានហោ នៅថ្ងៃទី១០ សីហា ដើម្បីពិភាក្សាពីបញ្ហាជួយលើកកម្ពស់វិស័យកសិកម្មនៅកម្ពុជាផងដែរ។ ការជួបពិភាក្សានោះ គឺផ្ដោតទៅលើការអនុវត្តការងាររបស់ក្រសួង និងការរកចំណុចរួមក្នុងការជួយដោះស្រាយបញ្ហាប្រជាកសិករ។ នេះបើតាមលោក សុខ ទូច ដែលបានប្ដេជ្ញាថា លោកនឹងរៀបចំឲ្យស្ថាប័នរាជបណ្ឌិត្យសភា ក្លាយជាកន្លែងផ្តល់គំនិតដ៏ល្អសម្រាប់អភិវឌ្ឍប្រទេស។
កាលពីថ្ងៃទី៣ សីហា លោក សុខ ទូច បានជួបពិភាក្សាជាមួយលោក ជា ចាន់តូ អគ្គទេសាភិបាលធនាគារជាតិ ដើម្បីសិក្សាអំពីបញ្ហាប្រឈម និងរកដំណោះស្រាយ ចំពោះការដាក់ពិដានការប្រាក់ ១៨ភាគរយ សម្រាប់ធនាគារ និងមីក្រូហិរញ្ញវត្ថុ ក្នុងគោលដៅជួយដល់ប្រជាកសិករ និងអាជីវករខ្នាតតូច និង មធ្យមដែលប្រើប្រាស់កម្ចីឥណទាននេះ។ ក្រៅពីនេះក្រុមការងាររាជបណ្ឌិត្យសភា ក៏បានជួបរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន សិក្សារកដំណោះស្រាយទីផ្សារកសិករផលរបស់ប្រជាពលរដ្ឋផងដែរ៕
Tag:
សុខ ទូច
កសិកម្ម
សត្វគោ
© រក្សាសិទ្ធិដោយ thmeythmey.com
