អន្តរជាតិ
នយោបាយអន្តរជាតិ
អាស៊ានបង្ហាញជំហររួមលើបញ្ហាកូរ៉េខាងជើង តែផ្ទុយគ្នាលើជម្លោះសមុទ្រចិនខាងត្បូង រដ្ឋមន្ត្រីការបរទេសនៃរដ្ឋសមាជិកអាស៊ាន (រូបភាពពីហ្វេសប៊ុក ASEAN)
× រដ្ឋមន្ត្រីការបរទេសនៃរដ្ឋសមាជិកអាស៊ានទាំង១០ បានបង្ហាញជំហរស្របគ្នាលើបញ្ហានុយក្លេអ៊ែរនៅឧបទ្វីបកូរ៉េ ដោយបានថ្កោលសកម្មភាពរបស់កូរ៉េខាងជើង និងបានស្នើឲ្យមានការដោះស្រាយបញ្ហាដោយសន្តិវិធី។ ប៉ុន្តែក្នុងកិច្ចប្រជុំដែលចាប់ផ្ដើមតាំងពីថ្ងៃទី៣ ខែសីហា រដ្ឋអាស៊ានទាំង១០ នៅតែខ្វែងគំនិតលើជម្លោះដែនទឹកនៅសមុទ្រចិនខាងត្បូងរវាងចិន និងរដ្ឋអាស៊ាន៤ ។ គេមិនទាន់ឃើញអាស៊ានចេញសេចក្ដីការណ៍ណាមួយលើបញ្ហានេះឡើយ។
នៅថ្ងៃទី៥ ខែសីហា រដ្ឋមន្ត្រីការបរទេសមកពីរដ្ឋអាស៊ានទាំង១០ បានជួបប្រជុំគ្នានៅរដ្ឋធានីម៉ានីល ក្នុងកិច្ចប្រជុំលើកទី៥០របស់ខ្លួន។ បន្ទាប់ពីបញ្ចប់កិច្ចប្រជុំរបស់ខ្លួន រដ្ឋមន្ត្រីទាំង១០ប្រទេស មិនបានចេញសេចក្ដីថ្លែងការណ៍ណាមួយពាក់ព័ន្ធបញ្ហានៅសមុទ្រចិនខាងត្បូង ដោយទំនងជារដ្ឋសមាជិកអាស៊ានខ្លះដែលជាប់ទាក់ទងជម្លោះនេះបានរក្សាជំហររឹងត្អឹងរបស់ខ្លួន។ ប៉ុន្តែសមាជិកទាំង១០ប្រទេស ក៏បានចេញសេចក្ដីថ្លែងការណ៍រួមថ្កោលទោសកូរ៉េខាងជើងដែរ។
យោងតាមសេចក្ដីថ្លែងការណ៍រួម រដ្ឋមន្ត្រីការបរទេសអាស៊ានបានបង្ហាញការព្រួយបារម្ភចំពោះការកើនឡើងភាពតានតឹងនៅឧបទ្វីបកូរ៉េ ដែលកើតចេញពីការបាញ់មីស៊ីលរបស់កូរ៉េខាងជើង។ អាស៊ានចាត់ទុកសកម្មភាពរបស់កូរ៉េខាងជើងជាការគំរាមសន្តិភាព សន្តិសុខ និងស្ថិរភាពតំបន់ និងពិភពលោកទាំងមូល។ ក្នុងន័យនេះ អាស៊ានទទូចឲ្យកូរ៉េខាងជើងអនុវត្តឲ្យបានពេញលេញសេចក្ដីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ។
សូមបញ្ជាក់ នេះគឺជាសេចក្ដីថ្លែងការណ៍រួមដោយឡែករបស់រដ្ឋមន្ត្រីការបរទសអាស៊ានស្ដីពីស្ថានការណ៍នៅឧបទ្វីប ដែលខុសពីលើកមុនៗបញ្ហានេះតែងត្រូវបានបញ្ចូលក្នុងសេចក្ដីថ្លែងការណ៍បញ្ចប់កិច្ចប្រជុំរបស់ប្រធានអាស៊ាន។ ការព្រួយបារម្ភរបស់អាស៊ានធ្វើឡើង ខណៈដែលរដ្ឋមន្ត្រីការបរទេសកូរ៉េខាងជើង Ri Yong-ho ក៏មានវត្តមានក្នុងរដ្ឋធានីម៉ានីលដែរ ដើម្បីចូលរួមកិច្ចប្រជុំវេទិកាតំបន់អាស៊ាននៅថ្ងៃទី៧ ខែសីហា រួមជាមួយបណ្ដាដៃគូអាស៊ានច្រើនទៀត។
ដោយឡែក កិច្ចប្រជុំរដ្ឋមន្ត្រីការបរទេសអាស៊ានមិនបានចេញសេចក្ដីថ្លែងការណ៍អ្វីលើបញ្ហានៅសមុទ្រចិនខាងត្បូងឡើយ។ បើតាមមន្ត្រីអ្នកការទូតដែលចូលរួមកិច្ចប្រជុំ វៀតណាមដែលជាភាគីជម្លោះនៃសំណុំរឿងនេះ បានទាមទារឲ្យមានដាក់បញ្ចូលចំណុចច្រើនដែលថ្កោលសកម្មភាពរបស់ចិននៅសមុទ្រចិនខាងត្បូង ជាពិសេសការកសាងកោះសិប្បនិម្មិតតែម្ដង។ ឯហ្វីលីពីនដែលធ្លាប់មានជំហររឹងរូសនោះ មិនបានទាមទារអ្វីទេ ដ្បិតទំនាក់ទំនងទ្វេភាគីជាមួយចិនកំពុងល្អូកល្អឺនខ្លាំង។
គេរំពឹងថា អាស៊ានអាចនឹងបញ្ចូលបញ្ហាសមុទ្រចិនខាងត្បូងនេះទៅក្នុងសេចក្ដីថ្លែងការណ៍បញ្ចប់កិច្ចប្រជុំតែម្ដង។ បញ្ហាសមុទ្រចិនខាងត្បូងនៅតែជារឿងរសើបក្នុងកិច្ចប្រជុំអាស៊ាន ដោយរដ្ឋមានជម្លោះដូចជាវៀតណាម ហ្វីលីពីន ឥណ្ឌូណេស៊ី និងម៉ាឡេស៊ី ជាដើម តែងចង់ឲ្យអាស៊ានបង្ហាញជំហររួមតទល់ចិន ប៉ុន្តែសមាជិកអាស៊ានដែលមិនជាប់ពាក់ព័ន្ធជម្លោះនេះ មិនចង់មានរឿងជាមួយចិនទេ៕
Tag:
អាស៊ាន
កូរ៉េខាងជើង
សមុទ្រចិនខាងត្បូង
© រក្សាសិទ្ធិដោយ thmeythmey.com