ជម្លោះរវាងអគ្គនាយករងពន្ធដារ និងក្រុមមេធាវី ត្រូវបានស្នើឲ្យយោគយល់គ្នាកម្រិតខ្ពស់បំផុត

ជាតិ

នយោបាយជាតិ

ជម្លោះរវាងអគ្គនាយករងពន្ធដារ និងក្រុមមេធាវី ត្រូវបានស្នើឲ្យយោគយល់គ្នាកម្រិតខ្ពស់បំផុត

07, Aug 2017 , 9:16 pm

រូបភាព

លោក វ៉ាន់ ពុទ្ធិពល (ឆ្វេង) និងលោក លី ច័ន្ទតុលា។ រូបថត ហ្វេសប៊ុករបស់លោកទាំងពីរ

ដោយ: អុឹង ចំរើន (Ung Chamroeun)

សំណេរនៅលើហ្វេសប៊ុករបស់អគ្គនាយករងពន្ធដារ និងនាំឲ្យមានការសម្បាពីក្រុមមេធាវីប្រហែលជាមិនមានភាគបន្តនោះឡើយ។ លោក គង់ វិបុល ប្រតិភូរដ្ឋាភិបាលទទួលបន្ទុកអគ្គនាយកដ្ឋានពន្ធដារ និងលោក សួន វិសាល ប្រធានគណៈមេធាវីនៃព្រះរាជាណាចក្រកម្ពុជា អមដោយអ្នកនាំពាក្យ និងសមាជិកក្រុមប្រឹក្សាមេធាវី បានជួបពិភាក្សាគ្នា កាលពីវេលាថ្ងៃត្រង់ ថ្ងៃចន្ទ ទី៧ ខែសីហា ដើម្បីបញ្ចប់ជម្លោះ ដែលចេញពីការប្រើពាក្យថា «គោ» របស់លោក វ៉ាន់ ពុទ្ធិពល។

ជម្លោះបានកើតឡើងកាលពីថ្ងៃទី៣ ខែសីហា ដោយលោក វ៉ាន់ ពុទ្ធិពល អគ្គនាយករងពន្ធដារ បានធ្វើបទបង្ហាញស្តីពី «កាតព្វកិច្ចបង់ពន្ធ» របស់សមាជិកគណៈមេធាវី។ ក្នុងបទបង្ហាញដែលមានការចូលពីមេធាវីជាង២០០នាក់ លោក វ៉ាន់ ពុទ្ធិពល និងក្រុមមេធាវី បានជជែក និងឆ្លើយឆ្លងគ្នាយ៉ាងតឹងសរសៃក ។

ស្ថានភាពកាន់តែធ្ងន់ធ្ងរឡើង ក្រោយពីលោក វ៉ាន់ ពុទ្ធិពល បានសរសេរនៅលើគណនីហ្វេសប៊ុករបស់ខ្លួនក្នុងខ្លឹមសារថា៖«ថ្ងៃនេះថ្នាក់លើបានប្រើឲ្យទៅប្រមូលគោបញ្ចូលក្រោលដើម្បីថែរក្សាឲ្យគត់មត់។ គោមួយចំនួនធំបានចូលក្រោលត្រឹមត្រូវ វៀរលែងតែអាពាល អាត្នោត និងអាទែក វាធ្លាប់តែនៅធ្វើព្យុះធ្វើភ្លៀងនៅខាងក្រៅ ដើរជាន់ដំណាំ ស៊ីដំណាំអ្នកស្រុក កៀរមិនព្រមចូលក្រោល។ មិនត្រឹមតែកៀច វាចង់ជល់ហើយធាក់ខ្ញុំទៀត។ សុំសួរប្រិយមិត្ត តើអា ៣ ក្បាលហ្នឹង សមនឹងចាក់កន្លុះឲ្យតឹង ហើសំពងនឹងទំពក់រនាស់ឲ្យបាក់លោងទេ»?

សំណេរក្តៅៗ ក្រោយការធ្វើបទបង្ហាញ បានធ្វើនាំឲ្យលោកមេធាវី លី ច័ន្ទតុលា សួរសំណួរភ្លាមៗទៅកាន់ លោក វ៉ាន់ ពុទ្ធិពល តាមរយៈ Inbox ដើម្បីឲ្យដឹងថា សំណេរសំដៅលើមេធាវីយ៉ាងណា។ ក្រោយ ទទួល (Accept) លោក ច័ន្ទតុលា ជាមិត្ត (Friend) ក្នុងហ្វេសប៊ុក លោក ពុទ្ធិពល ឆ្លើយតបវិញថា លោកមិនបានសរសេរពាក្យ «មេធាវី» ឡើយ ដោយនេះគ្រាន់តែជាទស្សនៈរបស់ខ្លួនក្នុងបរិការកំណែទម្រង់រដ្ឋបាលសារពើពន្ធប៉ុណ្ណោះ។

ទោះបីជាយ៉ាងណាក៏ដោយ ក្រុមមេធាវីជាង៦០នាក់ មិននៅស្ងៀមឡើយ ហើយបានចាត់ទុកសំណេរលោក ពុទ្ធិពល ថា ជាការប្រមាថជាសាធារណៈ និង បានដាក់ពាក្យបណ្តឹងទៅកាន់សាលាដំបូងរាជធានីភ្នំពេញកាលពីថ្ងៃទី៤ខែសីហាកន្លងមក។ នៅក្នុងពាក្យបណ្តឹងដែលមានលោកមេធាវីលោក លី ច័ន្ទតុលា ជាតំណាង បានទាមទារជំងឺចិត្តម្នាក់ៗ ៤០ លានរៀលពីលោក វ៉ាន់ ពុទ្ធិពល ហើយមេធាវីប្តឹងមានចំនួនជាង៦០នាក់។

ទាក់ទងទៅនឹងជម្លោះនេះ លោក សួន វិសាល ប្រធានគណៈមេធាវី បានបញ្ជាក់ប្រាប់សារព័ត៌មានអេឡិចត្រូនិកថ្មីៗកាលពីថ្ងៃអាទិត្យថា លោកនឹងតាមដានជម្លោះនេះដោយយកចិត្តទុកដាក់។ លោកបានបញ្ជាក់យ៉ាងច្បាស់ថា ជម្លោះនេះ គឺជាជម្លោះរវាងបុគ្គលមេធាវី និងបុគ្គលមន្ត្រីពន្ធដារ ពោល គឺមិនមែនជាជម្លោះរវាងគណៈមេធាវី និងមន្ត្រីពន្ធដារទេ។ តែគណៈមេធាវីត្រូវតែតាមដាន និងយកចិត្តទុកដាក់ចំពោះរឿងនេះទៅតាមនិតិវិធីផ្លូវច្បាប់។

ជំនួបដែលដឹកនាំដោយលោក គង់ វិបុល និង សួន វិសាល បានពិភាក្សាលើរបៀបវារៈចំនួន២គឺ កាតព្វកិច្ចបង់ពន្ធចំពោះមេធាវី និងសំណេរហ្វេសប៊ុករបស់លោក វ៉ាន់ ពុទ្ធិពល។

ចំពោះកាតព្វកិច្ចបង់ពន្ធ លោក គង់ វិបុល យល់ព្រមចំពោះការពន្យាការចេញលិខិតអញ្ជើញស្ថាប័នមេធាវីទៅចុះបញ្ជីពន្ធ ដោយយោងតាមផលវិបាកមួយចំនួន។ រីឯសំណេរលើហ្វេសប៊ុករបស់លោក វ៉ាន់ ពុទ្ធិពល ត្រូវបានចាត់ទុកថា ជារឿងបុគ្គល។

«ថ្នាក់ដឹកនាំស្ថាប័នទាំងពីរស្នើសុំឲ្យភាគីទាំងពីរបញ្ចប់វិវាទដោយសន្តិវិធី និងយោគយល់ក្នុងកម្រិតខ្ពស់បំផុត»។ នេះបើតាមសំណេរក្នុងសេចក្តីប្រកាសព័ត៌មានរបស់គណៈមេធាវីនៃព្រះរាជាណាចក្រកម្ពុជា នៅថ្ងៃទី៧ ខែសីហា ឆ្នាំ២០១៧ ។

រឿងនេះ ក៏មិនអាចបន្តវែងឆ្ងាយទៀតនោះដែរ បើទោះបីជាលោក វ៉ាន់ ពុទ្ធិពល នៅតែការពារថា សំណេររបស់ខ្លួនមិនមែនក្នុងន័យដៀមដាមស្ថាប័នមេធាវីក៏ដោយ ប៉ុន្តែលោកក៏បានសុំការអភ័យទោសពីអ្នកប្រកបវិជ្ជាជីវៈមេធាវីទាំងអស់ ប្រសិនប៉ះពាល់ដោយករណីណាមួយ។

លោក វ៉ាន់ ពុទ្ធិពល បានលុបសំណេររបស់ខ្លួនចេញពីហ្វេសប៊ុក រីឯលោក លី ច័ន្ទតុលា ក៏មិនមានការសរសេរអ្វីថ្មីបន្ថែមនោះឡើយ។ ជម្លោះបាននាំឲ្យលោក ពុទ្ធិពល និងលោក ច័ន្ទតុលា ក្លាយជាមិត្តនៅលើហ្វេសប៊ុក ដូច្នេះក្រោយការសម្របសម្រួល គេរំពឹងថា អ្នកទាំងពីរប្រហែលជាមិន Unfriend គ្នាវិញនោះឡើយ៕