ជាតិ
នយោបាយជាតិ
លោក សួង សុភ័ណ្ឌ ចេញពីCNRP ទៅធ្វើជាអនុប្រធានគណបក្សអំណាចខ្មែរ
× ភ្នំពេញ៖ អតីតបេក្ខជនតំណាងរាស្ត្រគណបក្សសង្គ្រោះជាតិ មណ្ឌលប៉ៃលិន លោក សួង សុភណ្ឌ បានសម្រេចចូលរួមជាមួយគណបក្សអំណាចខ្មែរ ដែលដឹកនាំលោក សួន សេរីរដ្ឋា។ លោក សួង សុភ័ណ្ឌ កាន់តំណែងជាអនុប្រធានគណបក្សអំណាចខ្មែរ។
លោក សួង សុភ័ណ្ឌ ដែលធ្លាប់ប្ដឹងសម្ដេច ហ៊ុន សែន កន្លងមកនោះ បានបញ្ជាក់ថា មូលហេតុដែលលោកចូលរួមជាមួយគណបក្សអំណាចខ្មែរ ដោយសារទី១ គណបក្សនេះ មិនដែលប្រព្រឹត្តិអំពើអាក្រក់ ទី២ ទស្សនៈលោកស្រដៀងគ្នានិងលោក សួន សេរីរដ្ឋា និងទី៣ គណបក្សអំណាចខ្មែរ មិនមែនជារបស់លោក សួន សេរីរដ្ឋា ផ្ដាច់មុខ ពោលគឺគណបក្សតូចមួយនេះ មានគោលនយោបាយច្បាស់លាស់ដែលបើកសិទ្ធិឲ្យសមាជិកបក្សផ្សេងៗផ្លាស់ប្ដូរ និងដឹកនាំបក្សបាន។
ថ្លែងចំពោះមុខអ្នកសារព័ត៌មាន នៅស្តូបវិញ្ញាណក្ខន្ធជនរងគ្រោះនៅកោះពេជ្រ នាព្រឹកថ្ងៃទី៨ សីហានេះ លោក សួង សុភ័ណ្ឌ បានបញ្ជាក់ដូច្នេះថា៖ «នៅពេលនេះខ្ញុំបានសម្រេចចិត្តយកគណបក្សអំណាចខ្មែរ ដែលមានលោក សួន សេរីរដ្ឋា ជាប្រធានគណបក្ស ប៉ុន្តែមិនមែនគណបក្សអំណាចខ្មែរជារបស់លោក សួន សេរីរដ្ឋា ទេ ។ មូលហេតុដែលខ្ញុំត្រឡប់ចូលរួមនយោបាយវិញដោយសារខ្ញុំពិចារណាឃើញថា គណបក្សប្រជាជនក៏មិនមែនជាគណបក្សលេខ១បាន ហើយគណបក្សសង្គ្រោះជាតិក៏មិនទៀងថា ទៅកាន់ការងារគណបក្សលេខ១បាន ហើយគណបក្សតូចៗ កំពុងប្រឈមមុខការរំលាយ។ ដូច្នេះខ្ញុំយល់ថា ខ្ញុំជាកម្លាំងយ៉ាងសំខាន់មួយ ក្នុងចលនានយោបាយយុវជនជំនាន់ថ្មី ដូច្នេះខ្ញុំត្រូវចូលទៅរុញកម្លាំងចលករគណបក្សមួយថ្មី»។
ជាមួយគ្នានេះលោក សួន សេរីរដ្ឋា ប្រធានគណបក្សអំណាចខ្មែរ បានប្រាប់សារព័ត៌មានថ្មីៗថា គណបក្សលោកបានសម្រេចឲ្យលោក សួង សុភ័ណ្ឌ កាន់តំណែងជាអនុប្រធានគណបក្ស ជំនួសលោកស្រី លីណា តាន់ ដែលបានលាលែងពីតំណែង។ បើតាមលោក សួន សេរីរដ្ឋា មូលហេតុដែលគណបក្សលោកសម្រេចប្រគល់តួនាទីអនុប្រធានដល់លោក សួង សុភ័ណ្ឌ ដោយសារតែសម្លឹងឃើញពីសមត្ថភាព និងទេពកោសល្យរបស់លោក សុភ័ណ្ឌ ក្នុងការចូលរួមសកម្មភាពនយោបាយជាមួយគណបក្សសង្គ្រោះជាតិកន្លងមក។
«យើងសម្លឹងឃើញថា គាត់(សួង សុភ័ណ្ឌ)មានប្រវត្តិការងារល្អ ហើយមានចក្ខុវិស័យគោលនយោបាយច្បាស់លាស់ ដែលតែងតែសកម្មក្នុងការដឹកនាំយុវជនតស៊ូមតិរកយុត្តិធម៌ក្នុងសង្គម ដូចជាអ្នកបុរីកីឡា បឹងកក់ និងតាមបណ្ដាខេត្តមួយចំនួនទៀត ។ ជាពិសេសគាត់មានសមត្ថភាព និងទេពកោសល្យដឹកនាំយុវជនក្នុងសកម្មភាពនយោបាយ ដែលសមស្របនឹងគោលនយោបាយគណបក្សយើង ដែលត្រូវការកម្លាំងយុវជនវ័យជនក្មេងឲ្យចូលរួមធ្វើនយោបាយជាមួយគ្នា។ ដូច្នេះយើងគិតតួនាទីអនុប្រធាននេះវាសក្តិសមសម្រាប់គាត់»។ នេះជាការបញ្ជាក់របស់លោក សួន សេរីរដ្ឋា ដែលបានបន្ថែមថា លោក សួង សុភ័ណ្ឌ នឹងត្រូវប្រកាសចូលកាន់តំណែងជាអនុប្រធានគណបក្សជាផ្លូវការ នៅថ្ងៃទី១៦ សីហាខាងមុខ។
អតីតបេក្ខជនតំណាងរាស្ត្រគណបក្សសង្គ្រោះជាតិ មណ្ឌលប៉ៃលិន លោក សួង សុភ័ណ្ឌ ចាកចេញពីគណបក្សសង្គ្រោះជាតិ កាលពីខែមីនាកន្លងមក ដោយសារតែមិនពេញចិត្តការដឹកនាំរបស់លោក កឹម សុខា ដែលឡើងកាន់តំណែងជាប្រធានគណបក្សសង្គ្រោះជាតិ ជំនួសលោក សម រង្ស៊ី ។ មូលហេតុដែលលោក សួង សុភ័ណ្ឌ ចាកចេញពីគណបក្សប្រឆាំង ដោយសារលោកសង្ស័យថា លោក កឹម សុខា អាចលួចមានទំនាក់ទំនងអ្វីមួយ ជាមួយប្រមុខគណបក្សប្រជាជនកម្ពុជាសម្ដេច ហ៊ុន សែន ក្រោយពីមានសារសំឡេងសន្ទនាគ្នា ដែលត្រូវបានបែកធ្លាយតាមរយៈគណនីហ្វេសប៊ុក «សីហា» កន្លងមក ៕
Tag:
សួង សុភ័ណ្ឌ
CNRP
គណបក្សអំណាចខ្មែរ
© រក្សាសិទ្ធិដោយ thmeythmey.com