ជាតិ
សេដ្ឋកិច្ច
AirAsia បើកជើងហោះត្រង់ពីទីក្រុងកូឡាឡាំពួ មកខេត្តព្រះសីហនុ រូបភាពពី Cambodia Airports
× ក្រុមហ៊ុនអាកាសចរ AirAsia ដែលមានមូលដ្ឋាននៅប្រទេសម៉ាឡេស៊ីបានបើកជើងហោះហើរត្រង់ទីក្រុងកូឡាឡាំពួ-ខេត្តព្រះសីហនុ ចាប់ពីថ្ងៃទី៩ខែសីហាឆ្នាំនេះ តទៅ។
បើតាមសេចក្ដីប្រកាសព័ត៌មានរបស់ក្រុមហ៊ុន Cambodia Airpots នៅថ្ងៃទី៩ខែសីហា AirAsia បានបើកជើងហោះហើរ ៤ថ្ងៃក្នុងមួយសប្ដាហ៍ គឺថ្ងៃចន្ទ ពុធ សុក្រ និងថ្ងៃអាទិត្យ មកកាន់ព្រលានយន្តហោះខេត្តព្រះសីហនុ។ ការបើកជើងហោះហើរថ្មីនេះ នឹងតភ្ជាប់គោលដៅខេត្តព្រះសីហនុ ទៅក្នុងបណ្ដាញគោលដៅជាង ១២០ របស់ក្រុមហ៊ុនអាកាសចរមួយនេះ។
ខេត្តព្រះសីហនុជាទិសដៅថ្មី ខណៈ AirAsia មានជើងហោះហើរពីកូឡាឡាំពួ មកកាន់ភ្នំពេញ និងខេត្តសៀមរាប។ ហើយកាលពីខែមិថុនាឆ្នាំ២០១៦ AirAsia បានសម្ពោធជើងហោះហើររវាងទីក្រុងហូជីមិញ និងខេត្តព្រះសីហនុ។
នៅក្នុងឆ្នាំ២០១៦ អាកាសយន្តដ្ឋានអន្តរជាតិខេត្តព្រះសីហនុទទួលបានអ្នកដំណើរជាង ១៥ម៉ឺននាក់ ក្នុងចំណោមអ្នកធ្វើដំណើរជាង ៧លាននាក់ដែលឆ្លងកាត់ព្រលានយន្តហោះអន្តរជាតិរបស់កម្ពុជា។ នេះបើតាមរបាយការណ៍ក្នុងសេចក្ដីប្រកាសព័ត៌មាន៕
© រក្សាសិទ្ធិដោយ thmeythmey.com