ទ័ពឡាវដកចេញពីកម្ពុជាអស់ហើយ

ជាតិ

នយោបាយជាតិ

ទ័ពឡាវដកចេញពីកម្ពុជាអស់ហើយ

13, Aug 2017 , 12:24 pm

រូបភាព

នៅខាងស្តាំ គឺ លោក គន់ គីម នៅក្នុងកិច្ចប្រជុំ ត្រៀមទទួលបញ្ជាពីប្រមុខរដ្ឋាភិបាល ទាក់ទងនឹងទាហានឡាវនៅខេត្តស្ទឹងត្រែង

ដោយ: ថ្មីៗ

កងទ័ពឡាវទាំង ៤ កងពល ដែលបានចូលមកដីកម្ពុជានៅតំបន់អូរអាឡៃ ក្នុងស្រុកសៀមប៉ាង ខេត្តស្ទឹងត្រែង បានដកចេញពីកម្ពុជាអស់ហើយ កាលពីល្ងាចថ្ងៃទី ១២ ខែសីហា។

ព័ត៌មាននៃការចាកចេញរបស់ទាហានឡាវនេះ ត្រូវបានអគ្គមេបញ្ជារងនៃកងយោធពលខេមរភូមិន្ទ លោក គន់ គីម ប្រាប់ដល់សារព័ត៌មាន Fresh News កាលពីល្ងាចថ្ងៃ ១២ ខែសីហា។ លោក គន់ គីមបញ្ជាក់យ៉ាងនេះថា៖« មិនមាននៅសេសល់ទៀតទេ កងទ័ពឡាវបានដកចេញម្តងមួយកងៗ រហូតដល់ពេលនេះកងទី៤ហើយ»។

ការដកទ័ពនេះ ធ្វើឡើងទៅតាមការសន្យារបស់លោកនាយករដ្ឋមន្ត្រីឡាវ ថោនលន់ ស៊ីស៊ូលីត នៅក្នុងសន្និសីទសារព័ត៌មានជាមួយសម្តេច ហ៊ុន សែន ពីទីក្រុងវៀងច័ន្ទ កាលពីព្រឹកថ្ងៃទី ១២ ខែសីហា។ លោកនាយករដ្ឋមន្ត្រីឡាវ ដែលបានសន្យាថា រូបលោកបានបញ្ជាឲ្យអាជ្ញាធរខ្លួន ដកទ័ពឡាវចេញពីខេត្តស្ទឹងត្រែង ដោយមិនឲ្យហួសពីព្រឹកថ្ងៃទី ១៣ ខែសីហា។ ការសន្យារបស់លោក ថោនលន់ ស៊ីស៊ូលីត ក៏កើតឡើងក្រោយពីសម្តេចនាយករដ្ឋមន្ត្រី ហ៊ុន សែន ធ្វើដំណើរទៅជួបពិភាក្សាជាមួយលោកនៅទីក្រុងវៀងច័ន្ទស្តីពីបញ្ហាទាហានឡាវ ដែលចូលមកឈរជើងនៅក្នុងទឹកដីខេត្តស្ទឹងត្រែងអស់រយៈពេលជាង ៤ ខែមកហើយនោះ៕