អន្តរជាតិ
កងទ័ពឥណ្ឌា និងចិនប៉ះទង្គិចគ្នាមួយប៉្រាវនៅតាមព្រំដែន ក្រោយកងទ័ពចិនគប់ដុំថ្មដាក់ឥណ្ឌា កងទ័ពចិន និងកងទ័ពឥណ្ឌាឈរជើងនៅបណ្តាយព្រំដែន (រូបភាព៖ AFP)
× កងទ័ពឥណ្ឌា និងចិនបានប៉ះទង្គិចគ្នាមួយប្រ៉ាវ ជាថ្មីម្ដងទៀត បន្ទាប់ពីកងទ័ពចិនគប់ដុំថ្មដាក់កងទ័ពឥណ្ឌា នៅថ្ងៃពុធទី ១៦ ខែសីហានេះ។ ប៉ុន្តែការប៉ះទង្គិចគ្នាលើកនេះគ្មានការប្រើអាវុធទេ។ កងទ័ពចិន និងកងទ័ពឥណ្ឌាប៉ះទង្គិចគ្នាគ្មានប្រើអាវុធនេះកើតញឹកញយចាប់តាំងពីពេលជម្លោះព្រំដែនឡើងកម្ដៅចាប់ពីខែមិថុនា។
ថ្ងៃពុធទី ១៦ ខែសីហា កងទ័ពចិនបានគប់ដុំថ្មដាក់កងទ័ពឥណ្ឌាដែលឈរជើងនៅជិតបឹង Pangong Lake រហូតបង្កឲ្យមានការប៉ះទង្គិចរវាងកងទ័ពទាំងសងខាងដែរ ប៉ុន្តែគ្មានការប្រើអាវុធឡើយ។ ការប៉ះទង្គិចគ្នាលើកនេះ ធ្វើឲ្យជម្លោះព្រំដែនរវាងឥណ្ឌា និងចិនដែលទើបកាន់តែឡើងកម្ដៅចាប់ពីខែមិថុនាកាន់តែតានតឹងថែមទៀត។
ទីភ្នាក់ងារព័ត៌មានAFP បានស្រង់សម្ដីមន្ត្រីក្រសួងការពារជាតិឥណ្ឌាម្នាក់ដែលសុំមិនបញ្ចេញឈ្មោះ ថា៖«កងទ័ពចិនព្យាយាមចូលទឹកដីឥណ្ឌាពីរដង តែត្រូវកងទ័ពឥណ្ឌាបណ្ដេញទៅវិញ។ កងទ័ពចិនបានគប់ដុំថ្មដាក់កងទ័ពឥណ្ឌា រហូតបង្កឲ្យមានការប៉ះទង្គិចរវាងកងទ័ពទាំងពីរ ប៉ុន្តែបច្ចុប្បន្នស្ថានភាពស្ងប់ វិញហើយក្រោយមានការសម្របសម្រួល»។
យោងតាមប្រភពព័ត៌មានដដែល ប៉ូលិសប្រចាំរដ្ឋភាគខាងជើងឥណ្ឌា Jammu និង Kashmir ការប៉ះទង្គិចរវាងកងទ័ពទាំងសងខាងនៅតាមព្រំដែនកើតឡើងជាញឹកញាប់ ជាពិសេសនៅចំរដូវក្ដៅ។ចំណែកឯ ការប៉ះទង្គិចចុងក្រោយនៅថ្ងៃពុធនេះមានរយៈពេលវែង ប៉ុន្តែសំណាងវាគ្មានការប្រើអាវុធនោះទេ។
គួរបញ្ជាក់ដែរថា នេះជាការប៉ះទង្គិចចុងក្រោយអំឡុងពេលជម្លោះព្រំដែនឥណ្ឌា និងចិនកើនកម្ដៅម្ដងទៀតនៅតំបន់ខ្ពង់រាបហិមាល័យចាប់តាំងពីខែ មិថុនាមក។ ស្ថានភាពជម្លោះព្រំដែនរវាងប្រទេសទាំងពីរតានតឹងឡើងវិញ ដោយសារកងទ័ពចិនចាប់ផ្ដើមសាងសង់ផ្លូវនៅលើទឹកដីជាប់ជម្លោះជាមួយប៊ូតង់។ប៉ុន្តែ ឥណ្ឌាដែលជាសម្ព័ន្ធមិត្តជិតស្និទ្ធជាមួយប៊ូតង់នោះបានបញ្ជូនទ័ពទៅរារាំងនិងបញ្ឈប់ការសាងសង់នេះ បង្កឲ្យមានការចោទប្រកាន់ពីសំណាក់ចិនថា ឥណ្ឌាឈ្លានពានចូលដែនដីខ្លួន។
ដោយឡែក ចិនបានបញ្ជាក់ដែរថា ឥណ្ឌាត្រូវដកទ័ពចេញមុនពេលមានកិច្ចចរចាផ្លូវការជាមួយចិន។ប៉ុន្តែ ឥណ្ឌាបានឆ្លើយតបវិញថា ភាគីទាំងសងខាងគួរតែដកទ័ពចេញទាំងអស់គ្នា។
សូមជម្រាបដែរថា តាមពិតទៅឥណ្ឌានិងចិនមានជម្លោះព្រំដែនយូរមកហើយ។ ភាគីទាំងពីរធ្លាប់បានប្រយុទ្ធគ្នាមួយប្រ៉ាវនៅឆ្នាំ១៩៦២។កាលពីឆ្នាំ២០១៤ក៏មានការប្រឈមមុខរវាងកងទ័ពឥណ្ឌា និងកងទ័ពចិនផងដែរ ព្រោះកងទ័ពចិនបានចូលដែនដីដែលឥណ្ឌាអះអាងថាជារបស់ខ្លួន។ក្រោយមក ការប្រឈមមុខរវាងកងទ័ពទាំងពីរមានភាពធូរស្រាលវិញបន្ទាប់ពីដំណើរទស្សនកិច្ចរបស់លោកប្រធានាធិបតីចិន ស៊ី ជិនភីងទៅកាន់ប្រទេសឥណ្ឌា៕
Tag:
ចិន
Pangong Lake
ឥណ្ឌា
© រក្សាសិទ្ធិដោយ thmeythmey.com