ពីនេះ ពីនោះ
ព័ត៍មានសុខភាព
ទារកថ្លោសពេកមិនមែនជារឿងល្អឡើយ តើអ្វីទៅធ្វើឲ្យទារកថ្លោសបែបនេះ?
× ទារកដែលកើតមកធំជាង ឬមានទម្ងន់ធ្ងន់ជាងធម្មតាត្រូវបានគេឲ្យឈ្មោះថា Macrosomia ដែលមានទម្ងន់ធ្ងន់ជាង ៤គីឡូក្រាម ដោយមិនគិតអំពីរយៈពេលដែលគេនៅក្នុងពោះម្តាយឡើយ។
ទោះបីជាយ៉ាងណាក៏ដោយ ការដែលទារកកើតមកធំ ឬថ្លោសបែបនេះពេក វាមិនមែនជារឿងល្អចំពោះសុខភាពគេនោះទេ។ មានន័យថាគេអាចប្រឈមនឹងជំងឺច្រើនជាងទារកធម្មតា។ តើកត្តាអ្វីខ្លះទៅដែលធ្វើឲ្យស្ត្រីដែលជាម្តាយកំពុងតែពរពោះនោះ ប្រឈមនឹងកូនកើតមកថ្លោសបែបនេះទៅ?
ម្តាយមានជំងឺទឹកនោមផ្អែម
ស្ត្រីដែលត្រៀមកើតជំងឺទឹកនោមផ្អែម និងជំងឺទឹកនោមផ្អែមប្រភេទទី១ គឺប្រឈមខ្ពស់នឹងកូនកើតមកថ្លោសខ្លាំងណាស់។ ប៉ុន្តែបើសិនជាកម្រិតជាតិស្ករក្នុងឈាមត្រូវបានគ្រប់គ្រងល្អតាមរយៈរបបអាហារ និងរបៀបរស់នៅ នោះការប្រឈមមុខក៏ថយចុះតាមគ្នាដែរ។
ម្តាយកំពុងតែធាត់ស្រាប់
ការប្រឈមនឹងកូនថ្លោសពេកច្រើនតែកើតមានជាញឹកញាប់នៅពេលម្តាយជាអ្នកពរពោះនោះធាត់ដែរ។ ដូច្នេះចូរព្យាយាមសម្រកទម្ងន់សិនមុននឹងសម្រេចចិត្តយកកូន។ ចូរញ៉ាំអាហារណាដែលផ្តល់សុខភាពក្នុងពេលមានផ្ទៃពោះ។ ការឡើងទម្ងន់ខ្លាំងពេកក្នុងពេលមានផ្ទៃពោះក៏ជាកត្តាប្រឈមុខមួយដែរ។
អាយុម្តាយ
ស្ត្រីដែលមានផ្ទៃពោះក្នុងវ័យចាប់ពី ៣៥ឆ្នាំឡើងទៅ ទំនងជាងាយមានបញ្ហាកូនកើតមកថ្លោសខ្លាំងណាស់។
ស្ថានភាពជំងឺក្នុងខ្លួន
បើសិនជាអ្នកមានជំងឺអ្វីមួយដែលទាក់ទងនឹងបេះដូង ជាតិស្ករក្នុងឈាម ឬកង្វះគ្រាប់ឈាម នោះវាអាចនឹងប៉ះពាល់ដល់ទំហំរបស់ទារកក្នុងផ្ទៃបាន។
មានផ្ទៃពោះចាស់ខែ
ការប្រឈមនឹងកូនកើតមកថ្លោសពេកនៅពេលដែលការមានផ្ទៃពោះចេះតែបន្តលើសថ្ងៃដែលត្រូវកើតចាប់ពី ២សប្តាហ៍ឡើងទៅ។
ការមានផ្ទៃពោះប្រកបដោយសុខភាពល្អគឺជាអ្វីដែលមនុស្សគ្រប់គ្នាប្រាថ្នាចង់បាន។ ដូច្នេះចូរតាមដាននូវអ្វីដែលអ្នកញ៉ាំផងក្នុងពេលមានផ្ទៃពោះ។ អ្វីដែលសំខាន់ទៀតនោះគឺត្រូវរស់នៅឲ្យមានភាពសកម្ម និងហាត់ប្រាណទៀងទាត់ដើម្បីចៀសផុតពីការប្រឈមនឹងកូនកើតមកថ្លោសពេក៕
ត្រួតពិនិត្យដោយ www.health.com.kh
© រក្សាសិទ្ធិដោយ thmeythmey.com