អន្តរជាតិ
រកឃើញនំដែលកប់ក្នុងទឹកកកអស់១០៧ឆ្នាំនៅអង់តាកទិច ប៉ុន្តែគ្មានអ្នកហ៊ានភ្លក់ឡើយ
× នំខេករសជាតិផ្លែឈើ ដែលមានអាយុកាលជាង១សតវត្សរ៍ទៅហើយនោះ ត្រូវបានរកឃើញនៅក្នុងតំបន់ទឹកកកអង់តាកទិច កាលពីពេលថ្មីៗកន្លងមក។ តាមរូបភាពដែលផ្សាយដោយ nzaht.org នំនោះមានការវេចខ្ចប់នៅល្អ។ ទោះបីជាយ៉ាងណាក៏ដោយ ក្រុមអ្នកដែលរកឃើញ មិនហ៊ានភ្លក់រសជាតិនំកាលពី១០៧ឆ្នាំមុននោះឡើយ។
នៅក្នុងការរុករកមួយ ក្រុមស្រាវជ្រាវ Antarctic Heritage Trust (AHT) នៅប្រទេសនូវែលសេឡង់ បានប្រទះឃើញនំខេកមួយ ដែលមានការវេចខ្ចប់យ៉ាងល្អ។ ការស្រាវជ្រាវបានបង្ហាញនំនេះ ជារបស់ក្រុមរុករកនៅតំបន់ Cape Adare ដែលបានបាត់កាលពីខែកុម្ភៈ ឆ្នាំ១៩១១ ។
លោក Lizzie Meek អ្នកគ្រប់គ្រងក្រុម AHT បានអះអាងថា៖ «រយៈពេលតែសប្តាហ៍ប៉ុណ្ណោះ យើងរកបានឃើញវត្ថុជាច្រើននៅ Cape Adare ហើយការរកឃើញឃើញនំនេះ គឺជារឿងមួយដ៏គួរឲ្យភ្ញាក់ផ្អើល»។
អ្នកស្រាវជ្រាវបានវាយតម្លៃថា នំខេកនេះ ជាម្ហូបអាហារប្រកបដោយថាមពលមួយដែលសមស្របទៅនឹងលក្ខខណ្ឌនៅតំបន់ទឹកកក អង់តាកទិច។ ទោះបីជាយ៉ាងណាក៏ដោយ គ្មានអ្នកស្រាវជ្រាវណាម្នាក់ហ៊ានភ្លក់រសជាតិវានោះឡើយ៕
© រក្សាសិទ្ធិដោយ thmeythmey.com