ជាតិ
នយោបាយជាតិ
រាជបណ្ឌិត្យសភា នឹងចងក្រងសៀវភៅអំពីតំបន់ព្រំដែនកម្ពុជា-ឡាវ ដើម្បីទុកជាប្រវត្តិសាស្រ្ត
× ភ្នំពេញ៖ រាជបណ្ឌិត្យកម្ពុជា នឹងចងក្រងសៀវភៅ និយាយអំពីតំបន់ព្រំដែនកម្ពុជា-ឡាវ ដើម្បីទុកជាឯកសារប្រវត្តិសាស្ត្រ បង្ហាញពីជោគជ័យកម្ពុជា ដែលបានប្រើនយោបាយការទូត ដេញឡាវឲ្យចេញពីទឹកដីនៅតំបន់អូអាឡៃ ។
ប្រធានរាជបណ្ឌិត្យសភា លោក សុខ ទូច បាននិយាយថា សៀវភៅទំនាស់ព្រំដែនកម្ពុជា-ឡាវ នេះ មានចំនួនជាង១០០ទំព័រ ហើយត្រូវបោះពុម្ភផ្សាយនៅរយៈពេល២ខែខាងមុខនេះ។ បើតាមលោក សុខ ទូច សៀវភៅព្រំដែនកម្ពុជា-ឡាវ នេះ គឺនឹងរៀបរាប់អំពីសកម្មភាពឈ្លានពានរបស់កងកម្លាំងប្រដាប់អាវុធឡាវ ក្នុងតំបន់អូអាឡៃប្រទេសកម្ពុជា ។ ជាពិសេសសកម្មភាពកម្ពុជា ដែលបានបណ្ដេញទាហានឡាវ ឲ្យចេញពីទឹកដីដោយសន្តិវិធី ដើម្បីទុកជាប្រវត្តិសាស្ត្រនៃនយោបាយការទូតរបស់រដ្ឋាភិបាលកម្ពុជា។
លោក សុខ ទូច បានបញ្ជាក់ដូច្នេះថា៖«ខ្ញុំធ្វើដើម្បីប្រវត្តិសាស្ត្រ ព្រោះតួនាទីរបស់រាជបណ្ឌិត្យសភា ដែលបានប្រកាសថា រាជបណ្ឌិត្យសភា ដើរតួនាទីជាអ្នកស្រាវជ្រាវផ្ដល់អនុសាស្ត្រ និងយុទ្ធសាស្ត្រដល់ភាគីពាក់ព័ន្ធ។ ដូច្នេះយើងបានគោរព និងដើរតួនាទីនេះ»។
លោក សុខ ទូច ដែលបានដឹកនាំក្រុមការងារចុះសិក្សាស្រាវជ្រាវនៅតំបន់ទំនាស់កម្ពុជា-ឡាវ នោះ ចាត់ទុកការបណ្ដេញឡាវចេញពីទឹកដីកម្ពុជានេះ គឺជាជ័យជម្នះពិតប្រាកដ ដោយមិនមែនជារឿងសប្បនិម្មិត ដែលរដ្ឋាភិបាលបង្កើតឡើង ដើម្បីកេងចំណេញនយោបាយអ្វីនោះឡើយ។ មូលហេតុដែលប្រធានរាជបណ្ឌិត្យសភា ហ៊ានអះអាងបែបនេះ ព្រោះលោកមានទឡ្ហីករណ៍មួយចំនួន ដែលបង្ហាញពីសកម្មភាពឡាវឈ្លានពានទឹកដីកម្ពុជា រួមមាន ឡាវបានជីកលេណដ្ឋានត្រៀមប្រយុទ្ធជាមួយកម្ពុជា, សង់ផ្ទះ ចិញ្ចឹមសត្វ (ស្បៀង) និងកាត់ផ្ដាច់ប្រភពទឹក មិនឲ្យកម្ពុជាប្រើប្រាស់ជាដើម។
ឆ្លើយតបនឹងសំនួររបស់អ្នកសារព័ត៌មានជុំវិញនយោបាយការទូតរដ្ឋាភិបាលនេះ លោក សុខ ទូច បាននិយាយថា ត្បិតនយោបាយរដ្ឋាភិបាលទន់ភ្លន់ជាមួយឡាវ តែមិនមែនមានន័យថា កម្ពុជាកំសាក គោរពឡាវឡើយ ពោលគឺវាជានយោបាយទន់ភ្លន់ តែម៉ឹងម៉ាត់ក្នុងការការពារដែនអធិបតេយ្យភាពខ្លួន ដែលអាចយកឈ្នះលើភាគីឡាវដោយសន្តិវិធី។
គួរបញ្ជាក់ថា ភាគីឡាវ បានបញ្ជូនកម្លាំងទ័ពឈ្លានពានចូលទឹកដីកម្ពុជា អស់រយៈពេល៤ខែ នៅតំបន់អូតាង៉ាវ និងតំបន់អូអាឡៃ ក្រោមហេតុផលសុំចូលត្រួតពិនិត្យលើខ្សែបន្ទាត់ព្រំដែន ស្របពេលដែលកម្ពុជាកំពុងសាងសងផ្លូវនៅក្នុងខេត្តស្ទឹងត្រែង ជាប់ព្រំដែនតំបន់អាត្តពឺ ប្រទេសឡាវ។ ដោយសារតែមិនអាចទ្រាំនិងទង្វើឈ្លានពានរបស់ឡាវនេះ រដ្ឋាភិបាលកម្ពុជា បានដាក់ឱសានវាទ៦ថ្ងៃ ឲ្យភាគីឡាវដកកងទ័ពចេញពីប្រទេសកម្ពុជា មុននឹងអាចកើតមានការប៉ះទង្គិចគ្នាជាយថហេតុ។ លើសពីនេះសម្ដេចនាយករដ្ឋមន្ត្រី ហ៊ុន សែន ក៏បានទៅជួបចរចាជាមួយនាយករដ្ឋមន្ត្រីឡាវ លោក ថង់លន់ ស៊ីសូលីត ដោះស្រាយបញ្ហានេះដោយសន្តិវិធីផងដែរ។ តាមរយៈការចរចារវាងប្រមុខរដ្ឋាភិបាលទាំងពីរ ភាគីឡាវក៏បានសម្រេចដកកងទ័ពឡាវចេញពីតំបន់អូតាង៉ាវ និងអូអាឡៃ នៃប្រទេសកម្ពុជា កាលពីថ្ងៃទី១៣ សីហា ដើម្បីបញ្ចៀសការប្រឈមមុខដោយកងកម្លាំងជាមួយគ្នា ៕
Tag:
សុខ ទូច
ព្រំដែន
កម្ពុជា
ឡាវ
© រក្សាសិទ្ធិដោយ thmeythmey.com