អន្តរជាតិ
វៀតណាម ថៃចុះកិច្ចព្រមព្រៀងដប់រួមគ្នាដើម្បីពង្រឹងកិច្ចសហប្រតិបត្តិការសេដ្ឋកិច្ច នាយករដ្ឋមន្ត្រីថៃ ប្រាយុទ្ធ ចាន់អូចា និងនាយករដ្ឋមន្ត្រីវៀតណាម ង្វៀង សួនហ្វ៊ុក
× ក្នុងដំណើរទស្សនកិច្ចផ្លូវការរបស់នាយករដ្ឋមន្ត្រីវៀតណាមដែលចាប់ផ្តើមនៅថ្ងៃព្រហស្បតិ៍ទី ១៧ ខែសីហា ថៃ និងវៀតណាមបានសម្រេចចុះកិច្ចព្រមព្រៀងទ្វេភាគីចំនួនដប់ដែលផ្តោតលើកិច្ចសហប្រតិបត្តិតការពាណិជ្ជកម្ម វិនិយោគ បច្ចេកវិទ្យា និងវិទ្យាសាស្ត្រ។ ក្រៅពីពង្រឹងទំនាក់ទំនងទ្វេភាគី មេដឹកនាំថៃ និងវៀតណាមក៏ផ្លាស់ប្តូរយោបល់គ្នាពាក់ព័ន្ធបញ្ហាសន្តិសុខនិងស្ថិរភាពតំបន់ផងដែរ។
នាយករដ្ឋមន្ត្រីវៀតណាម លោក ង្វៀង សួនហ្វ៊ុក (Nguyen Xuan Phuc) ចាប់ផ្តើមដំណើរ ទស្សនកិច្ចផ្លូវការរយៈពេលបីថ្ងៃទៅកាន់ប្រទេសថៃថ្ងៃព្រហស្បតិ៍ទី ១៧ ខែសីហា។ ដំណើរទស្សនកិច្ចនេះធ្វើឡើងតាមការអញ្ជើញរបស់នាយករដ្ឋមន្ត្រីថៃប្រាយុទ្ធ ចាន់អូចា ដើម្បីរឹតបន្តឹងចំណងមិត្តភាព និងកិច្ចសហប្រតិបត្តិការទ្វេភាគី។
យោងតាមសារព័ត៌មានថៃ The Nation នាយករដ្ឋមន្ត្រី ង្វៀងសួនហ្វ៊ុក និង នាយករដ្ឋមន្ត្រីថៃ ប្រាយុទ្ធ ចាន់អូចា បានធ្វើជាអធិបតីក្នុងការចុះហត្ថលេខាលើកិច្ចព្រមព្រៀងចំនួនដប់ ដែលគ្របដណ្តប់លើវិស័យ សេដ្ឋកិច្ចពាណិជ្ជកម្ម វិទ្យាសាស្ត្រ បច្ចេកវិទ្យា និងទូរគមនាគមន៍ជាដើមផង។ អ្វីដែលសំខាន់ភាគីទាំងពីរបានសម្រេចបង្កើតខេត្តបងប្អូនស្រីរវាង ខេត្តត្រាត និងខេត្ត Ca Mau។
ក្រៅពីការចុះកិច្ចព្រមព្រៀងរវាងរដ្ឋាភិបាលទាំងពីរ ក្រុមហ៊ុនវៀតណាម និងថៃ ក៏បានសម្រេចចុះកិច្ចព្រមព្រៀងរួមគ្នាដែរ ហើយក្នុងចំណោមក្រុមហ៊ុនទាំងនោះមានក្រុមហ៊ុនស៊ីម៉ង់ត៍ ក្រុមហ៊ុន ហ្កាសនិងប្រេងថែមទៀតផង។
បន្ទាប់ពីធ្វើជាអធិបតីក្នុងការចុះហត្ថលេខាកិច្ចព្រមព្រៀងទ្វេភាគី លោក ប្រាយុទ្ធ និងលោកសួនហ្វ៊ុក បានជជែកពិភាក្សាគ្នាផងដែរពាក់ព័ន្ធគ្រប់គ្រងទន្លេមេគង្គ។ មេដឹកនាំទាំងពីរយល់ស្របថា វាចំាបាច់ត្រូវមានការគ្រប់គ្រងទន្លេមេគង្គប្រកបដោយប្រសិទ្ធភាពដើម្បីធានាការប្រើប្រាស់ដោយនិរន្តរភាព និងអាចទាញប្រយោជន៍សេដ្ឋកិច្ច និងការពារបរិស្ថានផងដែរ។
ពាក់ព័ន្ធបញ្ហាសន្តិសុខវិញនោះ មេដឹកនាំទាំងពីរបានពិភាក្សាពីស្ថានភាពជម្លោះសមុទ្រចិនខាងត្បូងព្រោះវៀតណាមជាភាគីជម្លោះមួយផង។ លោកទាំងពីទទួលស្គាល់ថា ការរក្សាសន្តិសុខ ស្ថិរភាព និងសន្តិភាព ជាពិសេសសេរីភាពនៃការធ្វើនាវាចរណ៍ និងហោះហើរនៅក្នុងតំបន់សមុទ្រចិនខាងត្បូងជារឿងមិនអាចខ្វះបានឡើយ។
លោក ប្រាយុទ្ធ និងលោក សួនហ្វ៊ុក បានបង្ហាញជំហរគាំទ្រនិងអំពាវនាវឲ្យបណ្តាភាគីពាក់ព័ន្ធបន្តអនុវត្តសេចក្តីថ្លែងការណ៍ស្តីពីគូភាគីសមុទ្រចិនខាងត្បូងដែលត្រូវបានបានបង្កើតឡើងឆ្នាំ ២០០២ ឲ្យបានពេញលេញនិងមានប្រសិទ្ធភាព និងគោរពច្បាប់អន្តរជាតិជាពិសេច្បាប់សមុទ្រឆ្នាំ ១៩៨២។
Tag:
ង្វៀង សួនហ្វ៊ុក
ប្រាយុទ្ធ ចាន់អូចា
វៀតណាម
ថៃ
© រក្សាសិទ្ធិដោយ thmeythmey.com