អន្តរជាតិ
ប៉ូលិសបាញ់សម្លាប់ឧក្រិដ្ឋជនគ្រឿងញៀន ២៥ នាក់ទៀតនៅម៉ានីល ក្រោយ ឌូទើតេ បញ្ជាឲ្យសម្លាប់បន្ថែម រូបភាព៖Public Radio International
× ក្រោយបាញ់សម្លាប់ជនសង្ស័យជាឧក្រិដ្ឋជនគ្រឿងញៀន ៣២នាក់ ប៉ូលិសហ្វីលីពីនបានបាញ់ជនសង្ស័យ ២៥ នាក់ផ្សេងទៀតក្នុងប្រតិបត្តិការបង្ក្រាបគ្រឿងញៀនក្រុងម៉ានីលថ្ងៃព្រហស្បតិ៍ ទី ១៧ ខែសីហា។ អ្នកនាំពាក្យប៉ូលិសជាតិហ្វីលីពីនបានអះអាងថា ការសម្លាប់ឧក្រិដ្ឋជនទាំងនេះជាការការពារខ្លួនតែប៉ុណ្ណោះ។
ជនសង្ស័យជាឧក្រិដ្ឋជនគ្រឿងញៀន ២៥ នាក់ទៀតហើយត្រូវបានប៉ូលិសបាញ់សម្លាប់ក្នុងប្រតិបត្តិការបង្ក្រាបគ្រឿងញៀនក្នុងក្រុងម៉ានីលនៅថ្ងៃព្រហស្បតិ៍ទី១៧ខែសីហា ក្រោយពេលប្រធានាធិបតីហ្វីលីពីន រ៉ូឌ្រីហ្គោ ឌូទើតេ អនុញ្ញាតិឲ្យសម្លាប់បន្ថែមទៀត។
ការបាញ់សម្លាប់ជនសង្ស័យគ្រឿងញៀនច្រើននាក់ជាថ្មីនេះកើតឡើងបន្ទាប់ ប៉ូលិសហ្វីលីពីនបើកប្រតិបត្តិការទ្រង់ទ្រាយធំបង្ក្រាបគ្រឿងញៀននៅខេត្ត Bulacan ដោយជនសង្ស័យអស់ ៣២ នាក់ផងដែរ។
អ្នកនាំពាក្យប៉ូលិសក្រុងម៉ានីលលោក Erwin Margarejo បាននិយាយដូច្នេះថា៖«វាជាប្រតិបត្តិការស្របពេលគ្នារបស់ប៉ូលិស ហើយជនសង្ស័យជាឧក្រិដ្ឋជនគ្រឿងញៀនទាំង២៥នាក់នេះ ត្រូវសម្លាប់នៅក្នុងប្រតិបត្តិការផ្សេងៗគ្នានៅទីកន្លែង១៨ផ្សេងគ្នាទូទាំងរដ្ឋធានីម៉ានីល»។
ចំណែកឯអ្នកនាំពាក្យប៉ូលិសជាតិហ្វីលីពីនលោក Dionardo Carlos បានអះអាងថា ការសម្លាប់ឧក្រិដ្ឋជនក្នុងប្រតិបត្តិការបង្ក្រាបគ្រឿងញៀនទាំងនៅខេត្ត Bulacan និងក្រុង ម៉ានីល នោះ គ្រាន់តែជាការការពារខ្លួនប៉ុណ្ណោះ។ អ្នកនាំពាក្យរូបនេះបានចោទសួរទៅវិញថា៖« តើគេអាចបន្ទោសប៉ូលិសបានទេ ប្រសិនជាអ្នកចាប់ផ្ដើមការបាញ់ប្រហារមុនជាពួកឧក្រិដ្ឋជន?»។
ដោយឡែក កាលពីថ្ងៃពុធទី ១៦ ខែសីហា លោកឌូទើតេ បានសរសើរប៉ូលិសដែលសម្លាប់ឧក្រិដ្ឋជន៣២ នាក់ក្នុងខេត្តBulacan ។ លោកថែមទាំងបាននិយាយទៀតថា បើសិនប៉ូលិសអាចសម្លាប់ឧក្រិដ្ឋជនបាន ៣២ នាក់ជារៀងរាល់ថ្ងៃ នោះឧក្រិដ្ឋកម្មគ្រឿងញៀននៅហ្វីលីពីននឹងត្រូវកាត់បន្ថយ។
ទោះជាបង្ក្រាបគ្រឿងញៀនបានធ្វើឲ្យប៉ូលិសសម្លាប់អស់ឧក្រិដ្ឋជនអស់ជាច្រើនក្ដី លោក ឌូទើតេ នៅតែ ចេញមុខធានាការពារក្រុមប៉ូលិសក្នុងប្រតិបត្តិការសង្គ្រាមគ្រឿងញៀនរបស់លោក។
គួរបញ្ជាក់ដែរថា បើតាមទិន្នន័យរដ្ឋាភិបាលហ្វីលីពីន ចាប់តាំងពីលោកប្រធានាធិបតីរូបនេះឡើងកាន់តំណែងមកដល់ពាក់កណ្ដាលឆ្នាំ២០១៦ ឧក្រិដ្ឋជនជាង៣៥០០នាក់ហើយត្រូវបានសម្លាប់ក្នុងសង្គ្រាមគ្រឿងញៀនរបស់លោក។
សូមជម្រាបដែរថា បើតាមមន្ត្រីសិទិ្ធមនុស្សអន្តរជាតិប្រចាំនៅហ្វីលីពីន លោកWilnor Papa ចំនួនអ្នកស្លាប់ក្នុងសង្គ្រាមគ្រឿងញៀនក្នុងសប្ដាហ៍នេះបានកើនឡើងខ្លាំង ក្រោយមានការអនុញ្ញាតិរបស់លោក ឌូទើតេ ឲ្យសម្លាប់បន្ថែមទៀតដែរ៕
Tag:
រ៉ូឌ្រីហ្គោ ឌូទើតេ
ឧក្រិដ្ឋជន២៥នាក់
ឌូទើតេ
© រក្សាសិទ្ធិដោយ thmeythmey.com