កម្ពុជាស្ថិតក្នុងចំណោមប្រទេស១០លើពិភពលោក ដែលពលរដ្ឋចំណាយប្រាក់ហោប៉ៅលើផ្នែកសុខភាព

ជាតិ

សេដ្ឋកិច្ច

កម្ពុជាស្ថិតក្នុងចំណោមប្រទេស១០លើពិភពលោក ដែលពលរដ្ឋចំណាយប្រាក់ហោប៉ៅលើផ្នែកសុខភាព

19, Aug 2017 , 11:58 am

រូបភាព

ដោយ:

ភ្នំពេញ៖ តំណាងធនាគារពិភពលោកបានថ្លែងថា ពលរដ្ឋកម្ពុជាបានចំណាយប្រាក់ហៅប៉ៅរបស់ខ្លួនយ៉ាងច្រើនដើម្បីទទួលបានសេវាសុខភាព។

របាយការណ៍ចុងក្រោយមួយរបស់ធនាគារពិភពលោកបានសរសេរថា ប្រជាជនប្រមាណ ៦,៣ ភាគរយនៃចំនួនប្រជាជនសរុប បានចំណាយប្រាក់យ៉ាងច្រើនទៅលើសេវាសុខភាពក្នុងឆ្នាំ២០១៣ ហើយ ៣,១ ភាគរយ ជាប់បំណុលគេក្នុងការទូទាត់លើការចំណាយសុខភាព។ តួលេខនេះត្រូវបានបង្ហាញនៅក្នុងរបាយការណ៍ដែលមានចំណងជើងថា «កម្ពុជា រក្សាកំណើនរឹងមាំ ដើម្បីអត្ថប្រយោជន៍ទាំងអស់គ្នា» ហើយដែលត្រូវបានផ្សព្វផ្សាយកាលពីថ្ងៃទី១៧ខែសីហានេះ។

«កម្ពុជាស្ថិតក្នុងចំណោមប្រទេសចំនួន១០លើពិភពលោក ដែលចំណាយប្រាក់ហោប៉ៅលើសេវាសុខភាព ដោយត្រូវចំណាយ ៦០ភាគរយនៃប្រាក់សរុបដែលចាយលើផ្នែកសុខភាព»។ នេះជាការរកឃើញរបស់ធនាគារពិភពលោក។

លោក Miguel Eduardo Sanchez សេដ្ឋវិទូរបស់ធនាគារពិភពលោក បានថ្លែងថា ពលរដ្ឋកម្ពុជា ត្រូវចំណាយប្រាក់ក្នុងប្រទេស ដោយគ្មានការធានារ៉ាប់រងសុខភាព។ លោកបន្ថែមថា ពលរដ្ឋកម្ពុជាបានចំណាយប្រាក់ក្នុងហោប៉ៅជាច្រើន ឆ្លងដែនទៅប្រទសថៃ និងវៀតណាម ដើម្បីស្វែងរកការព្យាបាលដោយត្រឹមត្រូវ និងមានទំនុកចិត្ត។

ពាក់ព័ន្ធបញ្ហានេះ អ្នកស្រី Inguna Dobraja អ្នកគ្រប់គ្រងធនាគារពិភពលោកប្រចាំប្រទេសកម្ពុជា បានថ្លែងថា មូលហេតុដែលធ្វើឲ្យពលរដ្ឋក្រីក្រចំណាយលុយក្នុងហោប៉ៅ គឺបណ្តាលមកពីពួកគេមិនបានយល់ដឹងពីសិទ្ធិរបស់ខ្លួន ដែលត្រូវទទួលបានសេវាសុខាភិបាលដោយមិនបង់ប្រាក់។ បញ្ហានេះ អ្នកស្រី ស្នើឲ្យភាគីពាក់ព័ន្ធទាំងអស់ ចូលរួមផ្សព្វផ្សាយ និងពន្យល់ពលរដ្ឋក្រីក្រកម្ពុជា ឲ្យបានយល់ដឹងពីសិទ្ធិរបស់ពួកគេ ដើម្បីឲ្យពលរដ្ឋលែងចំណាយប្រាក់ក្នុងហោប៉ៅសម្រាប់សេវាសុខភាព។

របាយការណ៍របស់ធនាគារពិភពលោក បានបញ្ជាក់ថា កម្ពុជាមានប្រព័ន្ធគាំពារសង្គមនៅទន់ខ្សោយនៅឡើយ ដោយក្នុងនោះកម្ពុជាបានចំណាយតិចជាង០,១ភាគរយនៃផលទុនសរុបក្នុងស្រុក (ផសស) របស់ខ្លួន លើជំនួយសង្គម ធៀបនឹងមធ្យមភាគពិភពលោក ១,៦ ភាគរយ៕