កីឡាជាតិ
ជាតិ
ស៊ីហ្គេម៖ ក្រោយចាញ់ហ្វីលីពីន វៀតណាម និង ថៃ U22កម្ពុជា បន្តចាញ់ទីម័រខាងកើត
ខ្សែប្រយុទ្ធ នួន បូរី ប្រជែងយកបាល់ពីកីឡាករទីម័រខាងកើត។ រូបថត NOCC
×![]()
ដោយ: ថ្មីៗ
ក្រុមកីឡាបាល់ទាត់ជម្រើសជាតិអាយុក្រោម២២ឆ្នាំកម្ពុជា ត្រឡប់ទៅរកកំណត់ត្រាដ៏ជូរចត់ក្នុងព្រឹត្តិការណ៍កីឡាស៊ីហ្គេម។ សម្រាប់ការប្រកួតនៅក្នុងពូល B នៃព្រឹត្តិការណ៍កីឡាតំបន់អាស៊ី-អាគេ្នយ៍លើកទី២៩នេះ កម្ពុជា បានបន្តចាញ់ទីម័រខាងកើត ក្នុងលទ្ធផល ១-០ ហើយក៏ជាបរាជ័យ៤លើកជាប់ៗគ្នាផងដែរ។
U22 កម្ពុជា និងទីម័រខាងកើត ប្រកួតគ្នាដើម្បីបង្គ្រប់កិច្ចប៉ុណ្ណោះនៅក្នុងពូល B នៃព្រឹត្តិការណ៍កីឡាស៊ីហ្គេមលើកទី២៩នៅប្រទេសម៉ាឡេស៊ី បន្ទាប់ពីក្រុមទាំងពីរ បានចាញ់បីលើកជាប់គ្នារៀងៗខ្លួន។ នាជំនួបនៅលើទីលាន UM Arena ក្រុងគូឡាឡាំពួរកាលពីល្ងាចថ្ងៃអង្គារ ទី២២ ខែសីហា កីឡាករទីម័រខាងកើត Gumario Augusto Fe បានស៊ុតបាល់បញ្ចូលទីពីរចម្ងាយនៅនាទី៥៨ ដោយអ្នកចាំទី កែវ សុសិលា មិនអាចសង្គ្រោះបាននោះឡើយ។ គ្រាប់បាល់បញ្ចូលទីរបស់ Gumario ជាគ្រាប់ដំបូងរបស់ទីម័រខាងកើត និងក៏ជាជ័យជម្នះលើកដំបូងនៅក្នុងពូល B របស់ពួកគេផងដែរ។
U22 កម្ពុជាដែលស្ថិតក្រោមការដឹកនាំបង្វឹករបស់គ្រូប្រេស៊ីល Leonardo Vitorino ក្លាយជាក្រុមតែមួយគត់នៅក្នុងពូល B ដែលគ្មានពិន្ទុរាប់ ខណៈក្រុមនីមួយៗនៅសល់ការប្រកួតមួយនៅក្នុងដៃ។ នាការប្រកួតកន្លងមក កម្ពុជា បានចាញ់ហ្វីលីពីន ២-០ នៅថ្ងៃបើកឆាក បន្តចាញ់វៀតណាម ៤-១ ចាញ់ថៃ ៣-០ មុននឹងចាញ់ទីម័រខាងកើត ១-0 ។
នៅថ្ងៃព្រហស្បតិ៍ ទី២៥ ខែសីហា កម្ពុជាត្រូវប្រកួតជាមួយឥណ្ឌូណេស៊ី ខណៈទីម័រខាងកើតជួបហ្វីលីពីន។ ជំនួបទាំងពីរគូនេះ ធ្វើឡើងមុនការប៉ះគ្នារវាងវៀតណាម និងថៃ នាថ្ងៃដដែល។ បើទោះបីជាកម្ពុជា ហាលអាវ និងចាញ់៤លើកក៏ដោយ ប៉ុន្តែពួកគេត្រូវតែបន្តការព្យាយាមដើម្បីឲ្យមានពិន្ទុរាប់ហ្នឹងគេ។ សម្រាប់ឥណ្ឌូណេស៊ី ពួកគេត្រូវការឈ្នះជាច្រើនគ្រាប់លើកម្ពុជា ដើម្បីដណ្តើមកៅអីទៅវគ្គពាក់កណ្តាលផ្តាច់ព្រ័ត្រ។ ក្នុងករណីកម្ពុជាឈ្នះឥណ្ឌូណេស៊ី វៀតណាម និងថៃ ត្រូវចាប់ដៃគ្នាទៅកាន់វគ្គបន្ត ទោះជាការប្រកួតរបស់ពួកគេមានលទ្ធផលបែបណាក៏ដោយ។
រីឯនៅក្នុងពូល A មីយ៉ាន់ម៉ា និងម៉ាឡេស៊ី មានកៅអីរួចហើយនៅវគ្គពាក់កណ្តាលផ្តាច់ព្រ័ត្រ ខណៈសិង្ហបុរី ឡាវ និងព្រុយណេត្រូវហាលអាវ។ ជំនួបនៅរសៀលថ្ងៃពុធនេះ ឡាវ ប៉ះ ម៉ាឡេស៊ី រីឯសិង្ហបុរី ជួបព្រុយណេ។ ចំពោះម្ចាស់ផ្ទះម៉ាឡេស៊ី ពួកគេអាចទទួលបានចំណាត់ថ្នាក់លេខ១ក្នុងពូល ប្រសិនបើពួកគេឈ្នះ ឬស្មើជាមួយឡាវ៕
Tag:
SEA Games 2017
U22 កម្ពុជា
© រក្សាសិទ្ធិដោយ thmeythmey.com
