ជាតិ
កំណែវិញ្ញាសាបាក់ឌុប ចាប់ផ្ដើមនៅថ្ងៃអាទិត្យនេះ
× ភ្នំពេញ៖ កំណែវិញ្ញាសាប្រឡងបាក់ឌុប នឹងចាប់ផ្តើមនៅថ្ងៃអាទិត្យ ទី២៧ ខែសីហានេះ នៅតាមមណ្ឌលកំណែក្នុងរាជធានីភ្នំពេញ ដែលក្រសួងអប់រំបានកំណត់។ គណៈកម្មការអត្រាកំណែវិញ្ញាសា នឹងចំណាយពេល៤ថ្ងៃ កែសន្លឹកកិច្ចការសិស្ស ខណៈលទ្ធផលនឹងប្រកាសនៅថ្ងៃទី១២ ខែកញ្ញា នៅមណ្ឌលក្នុងរាជធានីភ្នំពេញ និងខេត្តកណ្ដាលនិងនៅថ្ងៃទី ១៣ កញ្ញា នៅមណ្ឌលតាមបណ្ដាខេត្ត។
គណៈកម្មការអត្រាកំណែវិញ្ញាសាប្រឡងសញ្ញាបត្រមធ្យមសិក្សាទុតិយភូមិ នឹងចាប់ផ្ដើមកែសន្លឹកវិញ្ញាសាបេក្ខជននៅថ្ងៃទី ២៧ សីហានេះ នៅតាមមណ្ឌលកំណែក្នុងរាជធានីភ្នំពេញ ដែលក្រសួងអប់រំ យុវជន និងកីឡា បានកំណត់។ លោក រស់ សាលីន អ្នកនាំពាក្យក្រសួងអប់រំ យុវជន និងកីឡា ដែលបានប្រាប់សារព័ត៌មានថ្មីៗដូច្នេះ និងបញ្ជាក់បន្ថែមថា កំណែវិញ្ញាសាបេក្ខជន មានរយៈពេល៤ថ្ងៃ ពីថ្ងៃទី២៧ ដល់ថ្ងៃទី៣០ ខែសីហា។
អ្នកនាំពាក្យរូបនេះ ក៏បញ្ជាក់ផងដែរថា ក្រសួងអប់រំ យុវជន និងកីឡា នឹងបើកកិច្ចប្រជុំ នៅរសៀលថ្ងៃទី ២៣ ខែសីហានេះ ដើម្បីណែនាំដល់ក្រុមអត្រាកំណែ ជុំវិញដំណើរការកែសន្លឹកវិញ្ញាសារបស់បេក្ខជន។ នៅថ្ងៃទី២៤ ខែសីហា ក្រសួង រៀបចំបែងចែកមណ្ឌលកំណែនៅក្នុងរាជធានីភ្នំពេញ និងនៅថ្ងៃសុក្រ គណៈកម្មការអត្រាកំណែ នឹងកាត់ក្បាល ដាក់លេខសម្គាល់ លើសន្លឹកកិច្ចការបេក្ខជននីមួយៗ។
បើតាម លោក រស់ សាលីន ក្នុងដំណើរការកែវិញ្ញាសានេះ ក៏មានការចូលរួមពីអ្នកសង្កេតការណ៍អង្គភាពប្រឆាំងអំពើពុករលួយដែរ រីឯបន្ទប់កំណែនីមួយៗ មានបំពាក់កាមេរ៉ាសុវត្ថិភាព និងមិនអនុញ្ញាតឲ្យក្រុមអត្រាកំណែ ប្រើទូរសព្ទពេលកែកិច្ចការបេក្ខជនឡើយ។
គណៈកម្មការអត្រាកំណែ ដែលប្រព្រឹត្តកំហុសក្នុងដំណើរការកែសន្លឹកកិច្ចការបេក្ខជន នឹងត្រូវទទួលកំហុសតាមបទប្បញ្ញត្តិ និងកម្រិតវិន័យដែលក្រសួងបានចែង ដូចដំណើរការសំណេរដែរ។ លោក រស់សាលីន បន្ថែមប្រាប់សារព័ត៌មានថ្មីៗទៀតថា កំហុសឆ្គងទាំងនោះ មានដូចជាថតអត្រាកំណែបង្ហោះលើបណ្ដាញសង្គម ឬការកែខុសអត្រាកំណែ និងការមិនគោរពតាមភារកិច្ចជាដើម។
សូមបញ្ជាក់ថា ការប្រឡងបាក់ឌុបឆ្នាំ២០១៧នេះ មានបេក្ខជនដាក់ពាក្យប្រឡងចំនួន ១០១,៤១០នាក់ ចែកចេញជា ១៧៨មណ្ឌល និងចំនួន៤,០៩៣ បន្ទប់ប្រឡង នៅទូទាំង២៥រាជធានី-ខេត្ត។ ក្រសួងអប់រំ យុវជន និងកីឡា បានវាយតម្លៃថា ដំណើរការប្រឡងសញ្ញាបត្រមធ្យមសិក្សាទុតិយភូមិឆ្នាំ២០១៧នេះ បញ្ចប់ទៅដោយរលូន គ្មានភាពមិនប្រក្រតីអ្វីគួរឲ្យកត់សម្គាល់ឡើយ ខណៈក្រសួងអះអាងបន្តទៀតថា ស្ទើរតែគ្មានសោះឡើយ បេក្ខជនដែលយកសំណៅឯកសារ ឬវត្ថុហាមឃាត់ មកតាមខ្លួន។ ការប្រព្រឹត្តកំហុសឆ្គង ទាំងបេក្ខជន និងអនុរក្ស និងអ្នកពាក់ព័ន្ធផ្សេងទៀត ក៏មានតិចតួចបំផុតដែរ។ លទ្ធផលប្រឡង នឹងត្រូវប្រកាស នៅថ្ងៃទី១២ ខែកញ្ញា នៅមណ្ឌលក្នុងរាជធានីភ្នំពេញ និងខេត្តកណ្ដាលនិងនៅថ្ងៃទី ១៣ កញ្ញា នៅមណ្ឌលតាមបណ្ដាខេត្ត៕
© រក្សាសិទ្ធិដោយ thmeythmey.com