អន្តរជាតិ
ប្រមុខការពារជាតិអាមេរិកថា ក្រុមរដ្ឋឥស្លាមរត់ផាសក្រញាំ ខណៈទ័ពអ៊ីរ៉ាក់សម្រុករំដោះក្រុង Tal Afar កងទ័ពអ៊ីរ៉ាក់ធ្វើដំណើរឆ្ពោះទៅកាន់ទីក្រុង Tal Afar នៅភាគខាងជើងប្រទេស (រូបភាព៖ Xinhua)
× រដ្ឋមន្ត្រីការពារជាតិអាមេរិក ជេម ម៉ាធីស នៅថ្ងៃទី២២ ខែសីហា បានធ្វើទស្សនកិច្ចដោយមិនប្រកាសមុនទៅកាន់អ៊ីរ៉ាក់ ដើម្បីលើកទឹកចិត្ត និងបង្ហាញការប្ដេជ្ញាចិត្តរបស់អាមេរិកក្នុងការជួយគាំទ្រអ៊ីរ៉ាក់ ខណៈដែលកងទ័ពអ៊ីរ៉ាក់កំពុងសម្រុកវាយរំដោះទីក្រុង Tal Afar ពីដៃក្រុមរដ្ឋឥស្លាម។ កងទ័ពអ៊ីរ៉ាក់ ដែលមានជំនួយពីសកម្មជនស៊ីអ៊ីតផងនោះ បានកាន់កាប់តំបន់ជាច្រើនជុំវិញទីក្រុង ទោះជាត្រូវរងការវាយបករបស់ពួកជ្រុលនិយមក្ដី។
កងកម្លាំងពិសេសអ៊ីរ៉ាក់ ដែលហ្វឹកហ្វឺនដោយកងទ័ពអាមេរិក រួមនឹងកម្លាំងប្រយុទ្ធច្រើនក្រុមទៀតបានកាន់កាប់តំបន់ជាយក្រុង Tal Afar ក្នុងប្រតិបត្តិការរំដោះទីក្រុងភាគខាងជើងនេះពីការគ្រប់គ្រងរបស់ក្រុមជ្រុលនិយមរដ្ឋឥស្លាម។ ស្របពេលគ្នានោះ ប្រមុខការពារជាតិអាមេរិក ជេម ម៉ាធីស ក៏ធ្វើដំណើរស្ងាត់ៗទៅកាន់រដ្ឋធានីបាកដាដ ដើម្បីពិនិត្យស្ថានការណ៍ និងផ្ដល់កម្លាំងចិត្តដល់កងទ័ពអ៊ីរ៉ាក់ ដែលកំពុងតស៊ូរំដោះទឹកដីមកវិញ។
នៅទីក្រុងបាកដាដ លោក ម៉ាធីស បានជួបជាមួយនាយករដ្ឋមន្ត្រីអ៊ីរ៉ាក់ Haider al-Abadi នៅថ្ងៃទី២២ ខែសីហា។ ក្រោយជំនួបនេះ ប្រមុខការពារជាតិអាមេរិកបាននិយាយថា ក្រុមជ្រុលនិយមរដ្ឋឥស្លាមកំពុងរត់ហើយ ស្របពេលដែលកម្លាំងចម្រុះអ៊ីរ៉ាក់កំពុងប្រមូលកម្លាំងនៅខាងក្រៅទីក្រុង Tal Afar ។ យ៉ាងណាមិញ លោក ម៉ាធីស មិនទាន់បញ្ជាក់ថា សមរភូមិមួយនេះនឹងទទួលជ័យជម្នះនៅពេលណាឡើយ ដ្បិតក្រុមសរដ្ឋឥស្លាមនៅបន្តប្រយុទ្ធការពារនៅឡើយដែរ។
យោងតាមសារព័ត៌មាន Al Jazeera លោក ម៉ាធីស បញ្ជាក់ថា សន្តិសុខរបស់ប្រជាជនអ៊ីរ៉ាក់ប្រសើរឡើងខ្លាំង ហើយទីក្រុងច្រើនត្រូវបានរំដោះជាបន្តបន្ទាប់។ លោកបន្តថា ទោះជាពេលវេលារបស់ក្រុមជ្រុលនិយមខើចខ្លីក៏ដោយ ក៏ពួកគេមិនទាន់បោះបង់ដែរ ហើយសង្គ្រាមនេះនឹងមិនចប់នៅពេលឆាប់ៗដែរ។ មកទល់ពេលនេះ សកម្មជនរដ្ឋឥស្លាមប្រមាណមួយពាន់នាក់ កំពុងប្រយុទ្ធតទល់កម្លាំងចម្រុះអ៊ីរ៉ាក់ដែលសម្រុកចូលទីក្រុង Tal Afar ។
យោធាអ៊ីរ៉ាក់និយាយថាកម្លាំងទ័ពចម្រុះកំពុងសម្រុកទីក្រុងតាមទិសខាងលិច និងឦសាន ដោយបានគ្រប់គ្រងសង្កាត់ជាច្រើន ទោះជារងការបាញ់ផ្លោងពីសំណាក់សកម្មជនរដ្ឋឥស្លាមក្ដី។ Tal Afar ស្ថិតនៅចម្ងាយ៧០គីឡូម៉ែត្រភាគខាងលិចទីក្រុង Mosul ដែលទើបតែត្រូវបានរំដោះពេលថ្មីនេះ។ ក្រុមរដ្ឋឥស្លាមបានគ្រប់គ្រងទីក្រុងនេះតាំងពីឆ្នាំ២០១៤ ហើយនៅពេលនេះក្រុមនេះបន្តគ្រប់គ្រងផ្នែកខាងលិច និងខាងត្បូងទីក្រុងនៅឡើយ។
ខណៈការវាយប្រយុទ្ធកំពុងធ្វើឡើងក្ដៅគគុក ប្រជាជនរាប់ពាន់នាក់ដែលរស់នៅក្នុងទីក្រុងនេះបានរត់ភៀសខ្លួនរតទីមានសុវត្ថិភាព។ ប្រជាជនអ៊ីរ៉ាក់ត្រូវចំណាយពេលរាប់ម៉ោងដើម្បីគេចពីការវាយប្រហាររវាងកម្លាំងរដ្ឋាភិបាល និងក្រុមជ្រុលនិយម ខណៈជនភៀសខ្លួនខ្លះមិនមានសម្លៀកបំពាក់ត្រឹមត្រូវឡើយ។ ចាប់តាំងពីចុងសប្ដាហ៍មុនមក មនុស្សរាប់ពាន់នាក់បានទៅដល់កន្លែងមានសុវត្ថិភាពដែលរៀបចំដោយអង្គការសហប្រជាជាតិ៕
Tag:
អាមេរិក
អ៊ីរ៉ាក់
ISIS
James Mattis
© រក្សាសិទ្ធិដោយ thmeythmey.com