ជាតិ
បទវិភាគ
និស្សិតគួរគិតអ្វីខ្លះ មុននឹងសម្រេចចិត្តធ្វើការងារស្ម័គ្រចិត្តឲ្យបានត្រឹមត្រូវ?
× បច្ចុប្បន្ន និស្សិតមានការចាប់អារម្មណ៍យ៉ាងខ្លាំង លើការងារស្ម័គ្រចិត្ត។ ពួកគេយល់ថា ការងារនេះ នឹងអាចកសាងសមត្ថភាពភាពជាអ្នកដឹកនាំ ការធ្វើការងារជាក្រុម ភាពក្លាហាន និងឱកាសទទួលអាហារូប ករណ៍ទៅក្រៅប្រទេស ក៏ដូចជាមានការងារល្អនាពេលអនាគតជាដើម។ ផ្ទុយមកវិញ បើនិស្សិតមិនបានធ្វើការងារស្ម័គ្រចិត្តមួយដ៏ត្រឹមត្រូវទេ ពួកគេនឹងខាតពេលវេលា និងមិនបានសម្រេចគោលបំណងដែលពួកគេបានរំពឹងទុកពីការងាស្ម័គ្រចិត្តជាដើម។ តើនិស្សិតគួរគិតអ្វីខ្លះ មុននឹងសម្រេចចិត្តធ្វើការងារស្ម័គ្រចិត្តឲ្យបានត្រឹមត្រូវ?
បច្ចុប្បន្ន យុវជន សិស្ស និស្សិត ដែលចាប់អារម្មណ៍ធ្វើការងារស្ម័គ្រចិត្តកើនឡើង។ ពួកគេធ្វើការមិនយកកម្រៃ ក្រោមហេតុផលអភិវឌ្ឍន៍ខ្លួនឯង និងជួយសង្គម។ ដើម្បីកុំឲ្យការចំណាយពេលវេលាធ្វើការងារស្ម័គ្រចិត្តក្លាយជាអសាបង់ យុវជន សិស្ស និស្សិត ត្រូវកំណត់គោលដៅខ្លួនឯងឲ្យច្បាស់ គិតគូរពីលទ្ធភាព និងពេលវេលាដែលខ្លួនមាន។ ម្យ៉ាងទៀត ពួកគេ ត្រូវស្ម័គ្រចិត្តធ្វើការងារណា ដែលត្រូវនឹងជំនាញដែលពួកគេកំពុងសិក្សាដើម្បីអភិវឌ្ឍសមត្ថភាព និងជំនាញបានរហ័ស។ ខាងក្រោមនេះ ជាគន្លឺះខ្លះៗដើម្បីឲ្យយុវជន សិស្ស និស្សិត គិតគូរ ដើម្បីកុំឲ្យខកចិត្តបន្ទាប់ពីធ្វើការស្ម័គ្រចិត្ត៖
ទី១ ត្រូវកំណត់គោលដៅខ្លួនឯងឲ្យច្បាស់ តើចង់ធ្វើការងាររដ្ឋ ឬការងារឯកជន? បើចង់ធ្វើការងារក្នុងវិស័យឯកជន គួរចំណាយពេលធ្វើការងារស្ម័គ្រចិត្តឲ្យត្រូវតាមជំនាញ និងស្របគោលដៅជីវិត ព្រោះដើម្បីចូលធ្វើការក្នុងវិស័យនេះ តាមរយៈការដាក់ពាក្យ ឆ្លងកាត់ការសម្ភាស និងទាមទារបទពិសោធន៍ការងារ ច្រើន។ ប៉ុន្តែបើ ចង់ធ្វើការងារក្នុងវិស័យរដ្ឋវិញ និស្សិតគួរតែសិក្សាពីជំនាញរបស់ខ្លួនឲ្យពូកែ ជាងធ្វើការងារស្ម័គ្រចិត្តព្រោះថា ការចូលបម្រើការងាររាជការឆ្លងកាត់ការប្រឡង។
ទី២ ត្រូវគិតពីលទ្ធភាព និងពេលវេលាដែលខ្លួនមាន។ និស្សិតដែលមានជីវភាពខ្វះខាត មិនគួរទៅស្ម័គ្រចិត្តទាំងជីវភាពខ្លួនលំបាកនោះទេ។ ស្ថិតក្នុងលក្ខខណ្ឌនេះ ពួកគេគួរតែស្វែងរកការងារដែលមានចំណូលយកមកផ្គត់ផ្គង់ជីវភាព និងការសិក្សារបស់ខ្លួនជាមុនសិន មុននឹងឆ្លៀតពេលធ្វើការងារស្ម័គ្រចិត្ត។ បច្ចុប្បន្ន មាននិស្សិតច្រើន បានធ្វើការងារស្ម័គ្រចិត្តទាំងខ្លួនឯងមានជីវភាពលំបាក ហើយការធ្វើបែបនេះ ធ្វើឲ្យប៉ះពាល់ដល់សុខភាព ការសិក្សា និងអនាគតរបស់ពួកគេ។
ទី៣ ត្រូវស្ម័គ្រចិត្តឲ្យត្រូវជំនាញដែលខ្លួនសិក្សា និងត្រូវកំណត់ផលរំពឹងទុកដែលខ្លួននឹងទទួលបានពីការងារស្ម័គ្រចិត្ត។ ម្យ៉ាងទៀត នៅអំឡុងធ្វើការងារស្ម័គ្រចិត្តនោះ និស្សិតត្រូវបែងចែកពេលវេលាសិក្សា និងធ្វើការឲ្យច្បា់លាស់ ចៀសវាងខាតពេលវេលា និងប៉ះពាល់ដល់ការសិក្សាទៀតនោះ។
ដ្បិតតែជាការងារស្ម័គ្រចិត្ត និស្សិតក៏ត្រូវប្រឹងប្រែងធ្វើការ ឲ្យពីកម្លាំងកាយចិត្តដែរ ព្រោះការងារបង្រៀនយើងឲ្យស្គាល់សង្គមច្បាស់ជាងមុន មានសមត្ថភាពទំនាក់ទំនង ចេះធ្វើការងារ មានភាពជាអ្នកដឹកនាំជាដើម។
ជារួម រៀនផង ធ្វើការស្ម័គ្រចិត្តផង គឺជារឿងដ៏ល្អ ប៉ុន្តែមុននឹងសម្រេចចិត្តធ្វើការងារស្ម័គ្រចិត្ត និស្សិតត្រូវកំណត់គោលដៅខ្លួនឯងឲ្យច្បាស់ គិតគូរពីលទ្ធភាព និងពេលវេលាដែលខ្លួនមាន។ ម្យ៉ាងទៀត ពួកគេត្រូវស្ម័គ្រចិត្តធ្វើការងារណា ដែលត្រូវនឹងជំនាញដែលពួកគេកំពុងសិក្សា ដើម្បីអភិវឌ្ឍសមត្ថភាព និងជំនាញបានរហ័ស៕
Tag:
និស្សិត
ការងារស្ម័គ្រចិត្ត
© រក្សាសិទ្ធិដោយ thmeythmey.com