លោក ប្រាក់ សុខុន ថាបស្ចិមលោកខ្លះ នាំកម្ពុជាធ្លាក់ក្នុងមហន្តរាយ

ជាតិ

លោក ប្រាក់ សុខុន ថាបស្ចិមលោកខ្លះ នាំកម្ពុជាធ្លាក់ក្នុងមហន្តរាយ

25, Sep 2017 , 3:17 pm

រូបភាព

រូបថតពីអង្គការសហប្រជាជាតិ

ដោយ: លាង ដឺលុច (Leang Delux)

មហាសន្និបាតអង្គការសហប្រជាជាតិលើកទី៧២ បានផ្តល់វេទិកាដល់ប្រមុខការទូតកម្ពុជាលោក ប្រាក់ សុខុន រិះគន់ប្រទេសមហាអំណាចខ្លះ អង្គការអន្តរជាតិខ្លះរបស់អង្គការសហប្រជាជាតិថាបានបំពេញការងារដោយលំអៀងទៅគណបក្សប្រឆាំង ក្នុងវិស័យប្រជាធិបតេយ្យ និងការងារសិទ្ធិមនុស្ស។ ទន្ទឹមនឹងការពន្យល់អំពីករណី បិទអង្គការNDI ការប្រកាសបិទទ្វាររបស់ក្រុមហ៊ុនសារព័ត៌មានបរទេស និងការចាប់ខ្លួនប្រធានគណបក្សប្រឆាំងនៅកម្ពុជា ប្រមុខការទូតខ្មែរ បានប្រាប់សន្និបាត អ.ស.ប ថា ប្រទេសបស្ចឹមលោកមួយចំនួនបាននាំកម្ពុជាទៅរកសោកនាដកម្ម។

លោករដ្ឋមន្ត្រីការបរទេស ប្រាក់ សុខុន ដែលតំណាងរដ្ឋាភិបាលកម្ពុជាបានប្រើមហាសន្និបាតអង្គការសហប្រជាជាតិ ដើម្បីបរិហារប្រទេសមហាអំណាច និងអង្គការអន្តរជាតិដែលឃ្លាំមើលការអនុវត្តប្រជាធិបតេយ្យ និងសិទ្ធិមនុស្សនៅកម្ពុជា។ នៅក្នុងសេចក្តីថ្លែងការណ៍មួយ ពាក់កណ្តាលនៃផ្នែកខាងលើដែលទាក់ទងនឹងបញ្ហារួមរបស់ពិភពលោក ត្រូវបានលោករដ្ឋមន្ត្រីអានជាភាសាអង់គ្លេស ប៉ុន្តែពាក់កណ្តាលទៀតនៃសេចក្តីថ្លែងការណ៍ដែលនិយាយអំពីការអនុវត្តលទ្ធិប្រជាធិបតេយ្យ និងសិទ្ធិមនុស្សនៅកម្ពុជា ត្រូវបានលោករដ្ឋមន្ត្រីអានជាភាសាបារាំង។

និយាយពីប្រទេសកម្ពុជា លោករដ្ឋមន្ត្រីមិនខ្លាចនឹងលើកឡើងអំពីហេតុការណ៍នយោបាយក្តៅចុងក្រោយមួយចំនួនដែលបានធ្វើឲ្យកម្ពុជាស្ថិតនៅលើទំព័រសារព័ត៌មានអន្តរជាតិនោះឡើយ ដូចជា ការសម្រេចបិទអង្គការ NDI ដែលលោករដ្ឋមន្ត្រីអះអាងថា អង្គការនេះជាប់ពាក់ព័ន្ធនឹងគណបក្សនយោបាយបរទេសហើយគាំទ្រគណបក្សប្រឆាំងក្រោមស្លាកនៃការបង្រៀនផ្នែកប្រជាធិបតេយ្យ និងបានរំលោភច្បាប់។ បន្ទាប់មក ទាក់ទងនឹងការប្រកាសបិទរបស់ក្រុមហ៊ុនសារព័ត៌មានបរទេស លោក ប្រាក់ សុខុន បានដាក់បន្ទុកទៅលើការមិនបង់ពន្ធជូនរដ្ឋរបស់ក្រុមហ៊ុនសារព័ត៌មាននេះ។ ហើយករណីក្តៅជាងគេចុងក្រោយ គឺការចាប់ខ្លួនលោក កឹម សុខា ប្រធានគណបក្សសង្គ្រោះជាតិនោះ ត្រូវបានលោកប្រមុខការទូតខ្មែរ បញ្ជាក់ប្រាប់មហាសន្និបាតថា មេគណបក្សប្រឆាំងរូបនេះបានសារភាពនៅក្នុងឯកសារវីដេអូមួយថា ខ្លួនជាឧបករណ៍នយោបាយរបស់មហាអំណាចមួយ ដើម្បីផ្តួលរំលំរដ្ឋាភិបាល។

«តើប្រទេសណាមួយ ដែលយោគយល់ចំពោះអកប្បកិរិយារបស់រដ្ឋាភិបាលបរទេសដូចនេះ?»។ លោករដ្ឋមន្ត្រីការបរទេសកម្ពុជាចោទសួរយ៉ាងដូច្នេះ។

ការចាត់វិធានរបស់អាជ្ញាធរកម្ពុជាលើករណីករណីទាំងអម្បាលមាន តាមច្បាប់បញ្ញត្តិរបស់កម្ពុជា មិនមែនជាមូលហេតុគ្រប់គ្រាន់ដែលលោករដ្ឋមន្ត្រីការបរទេសកម្ពុជាលើកយកមកពន្យល់ពិភពលោកនោះឡើយ។ នៅមានពិសោធន៍អតីតកាលទៀត។

លោក ប្រាក់ សុខុន រំឮកយ៉ាងដូច្នេះថា៖«ប្រវត្តិសាស្ត្ររបស់ប្រទេសខ្ញុំ បានចារឲ្យយើងស្គាល់ពីមេរៀនសំខាន់មួយ។ នៅពេលណាយើងបង្ខំចិត្តដើរតាមផ្លូវដែលកំណត់ដោយមហាអំណាចបស្ចិមលោកខ្លះ ប្រទេសកម្ពុជាត្រូវបានទាញឲ្យធ្លាក់ទៅក្នុងគ្រោះមហន្តរាយ និងទៅក្នុងសោកនាដកម្មដ៏អាក្រក់កាលពីសតវត្សរ៍កន្លងទៅ។ ការបង្ហាត់បង្ហាញមួយចំនួនដែលតម្រូវដោយភាគីខាងក្រៅតែងតែបង្កើតជាបញ្ហា តែមិនមែនជាដំណោះស្រាយឡើយ»។

មកដល់ត្រង់នេះ លោកប្រមុខការទូតកម្ពុជាបានទាញចំណាប់អារម្មណ៍មហាសន្និបាតអង្គការសហប្រជាជាតិឲ្យដឹងថា គឺរដ្ឋាភិបាលនៃគណបក្សកាន់អំណាចរបស់លោកដែលដឹកនាំដោយនាយករដ្ឋមន្ត្រី ហ៊ុន សែន ដែលបានរកសន្តិភាពពេញលេញនៅក្នុងឆ្នាំ១៩៩៨ឲ្យកម្ពុជា។

និយាយពីបញ្ហាសិទ្ធិមនុស្សវិញ លោក ប្រាក់ សុខុន បានរិះគន់ការពិនិត្យមើលស្ថានភាពនៃការអនុវត្តសិទ្ធិមនុស្សនៅកម្ពុជាថា«ប្រែប្រួលទៅតាមឱកាសនយោបាយរបស់ប្រទេសមហាអំណាចមួយចំនួន និងរបស់ស្ថាប័ននៃអង្គការសហប្រជាជាតិ ក៏ដូចជាអង្គការអន្តរជាតិនានាដែលធ្វើការក្នុងវិស័យនេះដែរ»។

ថ្លែងនៅថ្ងៃទី២២ខែកញ្ញានៅបុរីញូយ៉ក លោកទេសរដ្ឋមន្ត្រី ប្រាក់ សុខុន បានលើកឡើងយ៉ាងដូច្នេះ៖«បញ្ហាសិទ្ធិមនុស្ស និងប្រជាធិបតេយ្យ ត្រូវបានលើកឡើងតែនៅពេលណាដែលមានប្រយោជន៍ពិតប្រាកដសម្រាប់មហាអំណាច។ បើមិនដូច្នេះទេ គឺមានតែភាពស្ងាត់ស្ងៀម»។

សម្រាប់លោករដ្ឋមន្ត្រីការបរទេសកម្ពុជា បើនិយាយអំពីរបាយការណ៍របស់អ្នករាយការណ៍ពិសេសស្តីពីសិទ្ធិមនុស្សវិញ វាគឺជារបាយការណ៍លំអៀង។ លោករដ្ឋមន្ត្រីបានបញ្ជាក់យ៉ាងដូច្នេះ៖«យើងគឺផ្ទាំងស៊ីបនៃការរិះគន់ឥតឈប់ឈរចំពោះហេតុការណ៍ដែលត្រូវបានគេស្រង់ដោយអន្លើៗ និងវិនិច្ឆ័យដោយមិនគ្រប់ជ្រុងជ្រោយ។ របាយការណ៍ទាំងនោះតែងតែស្តីបន្ទោសរដ្ឋាភិបាល ហើយលើកតម្កើងក្រុមអ្នកប្រឆាំងថាជាអ្នកលះបង់ដើម្បីប្រជាធិបតេយ្យ និងសិទ្ធិមនុស្ស»។ លោកប្រមុខការទូតខ្មែរបន្តលើកឡើងទៀតថា៖«របាយការណ៍ទាំងនោះតែងតែត្រូវបានសរសេរឡើងដោយដាក់បន្ទុកលើរដ្ឋាភិបាល តែផ្ទុយទៅវិញអកប្បកិរិយាពិរុទ្ធ និងខុសច្បាប់របស់ក្រុមអ្នកប្រឆាំងមិនដែលត្រូវបានលើកឡើងនោះឡើយ ឬដោយកម្រ»៕