អន្តរជាតិ
×![]()
ដោយ: តន ចាន់រិទ្ធារ៉ា
នាយករដ្ឋមន្ត្រីជប៉ុន ស៊ីនហ្សូ អាបេ នឹងប្រកាសរំលាយរដ្ឋសភានៅថ្ងៃទី២៨ ខែកញ្ញាខាងមុខ ដើម្បីបើកផ្លូវដល់ការបោះឆ្នោតមុនអាណត្តិនៅខែតុលា។ លោក អាបេ ដែលកំពុងកើនឡើងប្រជាប្រិយភាព ទំនងជាឆក់យកឱកាសដែលប្រជាប្រិយភាពរបស់បក្សប្រឆាំងកំពុងធ្លាក់ចុះ ដើម្បីដណ្ដើមយកជ័យជម្នះក្នុងការបោះឆ្នោតលើកនេះ និងបន្តដឹកនាំជប៉ុនទៀត។ ប៉ុន្តែលោកក៏រងការរិះគន់ខ្លាំងដែរជុំវិញផែនការនេះ ព្រោះស្ថានការណ៍នៅឧបទ្វីបកូរ៉េមិនសូវស្រួលស្រាប់ផង។
នាយករដ្ឋមន្ត្រីជប៉ុន ស៊ីនហ្សូ អាបេ នៅថ្ងៃទី២៥ ខែកញ្ញា បានប្រកាសរៀបចំការបោះឆ្នោតមុនអាណត្តិ។ សភាជាន់ទាបរបស់ជប៉ុន ដែលនឹងបើកកិច្ចប្រជុំវិសាមញ្ញនៅថ្ងៃទី២៨ ខែកញ្ញាខាងមុខ ក៏ត្រូវរំលាយចោលដើម្បីបើកផ្លូវដល់ការបោះឆ្នោតតែម្ដង។ លោក អាបេ សង្ឃឹមខ្ពស់ក្នុងការទទួលជ័យជម្នះក្នុងបោះឆ្នោតដែលគ្រោងរៀបចំនៅចុងខែតុលា ព្រោះប្រជាប្រិយភាពកើនឡើងខ្ពស់ ឯបក្សប្រឆាំងវិញកំពុងរង្គោះរង្គើដែលនេះជាឱកាសល្អសម្រាប់លោក។
បើតាមទីភ្នាក់ងារព័ត៌មាន Reuters លោក អាបេ មានកិច្ចប្រជុំមួយជាមួយបណ្ដាថ្នាក់ដឹកនាំបក្សកាន់អំណាចប្រជាធិបតេយ្យសេរី (LDP) នៅថ្ងៃទី២៥ ខែកញ្ញា ហើយលោកក៏ប្រកាសពីផែនការរបស់លោកក្នុងជំនួបនោះតែម្ដង។ នេះបើតាមការលើកឡើងរបស់សមាជិកជាន់ខ្ពស់បក្ស LDP ។ ការចំណាយលើវិស័យអប់រំ និងការថែទាំកុមារ ជំហរលើបញ្ហាកូរ៉េខាងជើង និងការកែប្រែរដ្ឋធម្មនុញ្ញ គឺជាគោលនយោបាយសំខាន់របស់លោក អាបេ ក្នុងពេលឃោសនាពេលនេះ។
ក្នុងការស្ទាបស្ទង់ដែលរៀបចំដោយសារព័ត៌មាន ប្រចាំថ្ងៃ Nikkei ប្រជាជនជប៉ុនចំនួន៤៤ភាគរយនឹងបោះឆ្នោតឲ្យបក្ស LDP ខណៈបក្សប្រឆាំងប្រជាធិបតេយ្យ និងបក្សថ្មីថ្មោងរបស់អភិបាលក្រុងតូក្យូទទួលបានការគាំទ្រ៨ភាគរយដូចគ្នា។ ជាមួយគ្នានេះ ប្រជាប្រិយភាពរបស់លោក អាបេ ផ្ទាល់ ក៏កើនដល់ជាង៥០ភាគរយ បើប្រៀបធៀបទៅនឹងការគាំទ្រដែលមានត្រឹមជាង៣០ភាគរយកាលពីខែកក្កដាកន្លងទៅ។
ជាមួយនឹងផែនការរំលាយសភា និងការរៀបចំការបោះឆ្នោតនេះ នាយករដ្ឋមន្ត្រីរូបនេះ ក៏ប្រឈមមុខការបាត់បង់សំឡេងភាគច្រើនពីរភាគបីនៅរដ្ឋសភាដែលកំពុងមានក្នុងដៃសព្វថ្ងៃនេះ។ បក្ស LDP និងសម្ព័ន្ធមិត្ត រំពឹងថាអាចរក្សាសំឡេងភាគច្រើនដដែល ទោះជាការបាត់បង់សំឡេងពីរភាគបី នឹងប៉ះពាល់ដល់មហិច្ឆតាធ្វើវិសោធនកម្មរដ្ឋធម្មនុញ្ញដើម្បីពង្រីកអំណាចយោធាជប៉ុនក្ដី។ ប៉ុន្តែកាលៈទេសៈបច្ចុប្បន្នពិតជាអំណោយផលខ្លាំងសម្រាប់លោក អាបេ ជាជាងការរង់ចាំដល់ការផុតអាណត្តិក្នុងឆ្នាំ២០១៨។
យ៉ាងណាមិញ ក្រុមអ្នករិះគន់បានលើកឡើងថា ផែនការរបស់លោក អាបេ អាចបង្កជាចន្លោះប្រហោងអំណាចក្នុងប្រទេស ចំពេលដែលកូរ៉េខាងជើងកំពុងបន្តទង្វើគឃ្លើនម្ដងជាពីរដងនោះ។ មួយវិញទៀត លោក អាបេ ក៏អាចជួបបរាជ័យដ៏ភ្ញាក់ផ្អើលក្នុងការបោះឆ្នោតដែលគេជឿថាអាចរៀបចំនៅថ្ងៃទី២២ ខែតុលាទៀតផង ទោះជាប្រជាប្រិយភាពរបស់លោកកើនខ្ពស់ឡើងវិញក៏ដោយចុះ៕
នាយករដ្ឋមន្ត្រីជប៉ុន ស៊ីនហ្សូ អាបេ នៅថ្ងៃទី២៥ ខែកញ្ញា បានប្រកាសរៀបចំការបោះឆ្នោតមុនអាណត្តិ។ សភាជាន់ទាបរបស់ជប៉ុន ដែលនឹងបើកកិច្ចប្រជុំវិសាមញ្ញនៅថ្ងៃទី២៨ ខែកញ្ញាខាងមុខ ក៏ត្រូវរំលាយចោលដើម្បីបើកផ្លូវដល់ការបោះឆ្នោតតែម្ដង។ លោក អាបេ សង្ឃឹមខ្ពស់ក្នុងការទទួលជ័យជម្នះក្នុងបោះឆ្នោតដែលគ្រោងរៀបចំនៅចុងខែតុលា ព្រោះប្រជាប្រិយភាពកើនឡើងខ្ពស់ ឯបក្សប្រឆាំងវិញកំពុងរង្គោះរង្គើដែលនេះជាឱកាសល្អសម្រាប់លោក។
បើតាមទីភ្នាក់ងារព័ត៌មាន Reuters លោក អាបេ មានកិច្ចប្រជុំមួយជាមួយបណ្ដាថ្នាក់ដឹកនាំបក្សកាន់អំណាចប្រជាធិបតេយ្យសេរី (LDP) នៅថ្ងៃទី២៥ ខែកញ្ញា ហើយលោកក៏ប្រកាសពីផែនការរបស់លោកក្នុងជំនួបនោះតែម្ដង។ នេះបើតាមការលើកឡើងរបស់សមាជិកជាន់ខ្ពស់បក្ស LDP ។ ការចំណាយលើវិស័យអប់រំ និងការថែទាំកុមារ ជំហរលើបញ្ហាកូរ៉េខាងជើង និងការកែប្រែរដ្ឋធម្មនុញ្ញ គឺជាគោលនយោបាយសំខាន់របស់លោក អាបេ ក្នុងពេលឃោសនាពេលនេះ។
ក្នុងការស្ទាបស្ទង់ដែលរៀបចំដោយសារព័ត៌មាន ប្រចាំថ្ងៃ Nikkei ប្រជាជនជប៉ុនចំនួន៤៤ភាគរយនឹងបោះឆ្នោតឲ្យបក្ស LDP ខណៈបក្សប្រឆាំងប្រជាធិបតេយ្យ និងបក្សថ្មីថ្មោងរបស់អភិបាលក្រុងតូក្យូទទួលបានការគាំទ្រ៨ភាគរយដូចគ្នា។ ជាមួយគ្នានេះ ប្រជាប្រិយភាពរបស់លោក អាបេ ផ្ទាល់ ក៏កើនដល់ជាង៥០ភាគរយ បើប្រៀបធៀបទៅនឹងការគាំទ្រដែលមានត្រឹមជាង៣០ភាគរយកាលពីខែកក្កដាកន្លងទៅ។
ជាមួយនឹងផែនការរំលាយសភា និងការរៀបចំការបោះឆ្នោតនេះ នាយករដ្ឋមន្ត្រីរូបនេះ ក៏ប្រឈមមុខការបាត់បង់សំឡេងភាគច្រើនពីរភាគបីនៅរដ្ឋសភាដែលកំពុងមានក្នុងដៃសព្វថ្ងៃនេះ។ បក្ស LDP និងសម្ព័ន្ធមិត្ត រំពឹងថាអាចរក្សាសំឡេងភាគច្រើនដដែល ទោះជាការបាត់បង់សំឡេងពីរភាគបី នឹងប៉ះពាល់ដល់មហិច្ឆតាធ្វើវិសោធនកម្មរដ្ឋធម្មនុញ្ញដើម្បីពង្រីកអំណាចយោធាជប៉ុនក្ដី។ ប៉ុន្តែកាលៈទេសៈបច្ចុប្បន្នពិតជាអំណោយផលខ្លាំងសម្រាប់លោក អាបេ ជាជាងការរង់ចាំដល់ការផុតអាណត្តិក្នុងឆ្នាំ២០១៨។
យ៉ាងណាមិញ ក្រុមអ្នករិះគន់បានលើកឡើងថា ផែនការរបស់លោក អាបេ អាចបង្កជាចន្លោះប្រហោងអំណាចក្នុងប្រទេស ចំពេលដែលកូរ៉េខាងជើងកំពុងបន្តទង្វើគឃ្លើនម្ដងជាពីរដងនោះ។ មួយវិញទៀត លោក អាបេ ក៏អាចជួបបរាជ័យដ៏ភ្ញាក់ផ្អើលក្នុងការបោះឆ្នោតដែលគេជឿថាអាចរៀបចំនៅថ្ងៃទី២២ ខែតុលាទៀតផង ទោះជាប្រជាប្រិយភាពរបស់លោកកើនខ្ពស់ឡើងវិញក៏ដោយចុះ៕
Tag:
ជប៉ុន
ស៊ីនហ្សូ អាបេ
© រក្សាសិទ្ធិដោយ thmeythmey.com
