ជាតិ
ប្រាក់ឈ្នួលឆ្នាំ២០១៨៖ សហជីពកំណត់១៧៦ដុល្លារ ខណៈនិយោជក និងរដ្ឋាភិបាលអាចដំឡើងជាង១៦០ដុល្លារ រូបពីហ្វេសប៊ុកក្រសួងការងារនិងបណ្ដុះបណ្ដាលវិជ្ជាជីវៈ
× ភ្នំពេញ៖ ក្នុងកិច្ចប្រជុំចរចាប្រាក់ឈ្នួលកម្មករកម្មការិនីរវាងភាគីសហជីព និយោជក និងក្រសួងការងារ ភាគីទាំងបីនៅមិនទាន់ចុះសម្រុងគ្នានៅឡើយទេ ជុំវិញការដំឡើងប្រាក់ឈ្នួលជូនកម្មករកម្មការិនីក្នុងវិស័យវាយនភ័ណ្ឌ កាត់ដេរ និងផលិតស្បែកជើង។ ការមិនទាន់ចុះសម្រុងគ្នានេះ ដោយសារខាងសហជីពនៅតែប្រកាន់ជំហរយកលេខប្រាក់ឈ្នួលអប្បបរិមាណ១៧៦ដុល្លារ ខណៈនិយោជកនិងរដ្ឋាភិបាលកំណត់តួលេខដំឡើងប្រាក់ឈ្នួលជាង១៦០ដុល្លារ។
កិច្ចប្រជុំអំពីការដំឡើងប្រាក់ឈ្នួលជូនកម្មករកម្មការនីឆ្នាំ២០១៨ នៅទីស្តីការក្រសួងការងារ និងបណ្តុះបណ្តាលវិជ្ជាជីវៈនៅព្រឹកថ្ងៃទី២៥ ខែកញ្ញានេះ មិនទាន់មានលទ្ធផលអ្វីឡើយ ក្រៅតែពីការជជែកគ្នាតឹងសរសៃកររវាងភាគីសហជីព និយោជក និងភាគីក្រសួងការងារ។ ភាគីសហជីព បានប្រកាន់ជំហរយកលេខអប្បបរិមាណ ១៧៦,២៣ដុល្លារ ឯភាគីថៅកែរោងចក្រប្រកាន់ជំហរត្រឹម១៦១ដុល្លារ ខណៈរដ្ឋាភិបាល បានកំណត់យក១៦២,៦៧ដុល្លារ។ នេះបើតាម លោក អាត់ ធន់ ប្រធានសម្ព័ន្ធសហជីព ប្រជាធិបតេយ្យកម្មករកាត់ដេរ ដែលបានចូលរួមប្រជុំនេះ។
ថ្លែងប្រាប់សារព័ត៌មានថ្មីៗ លោក អាត់ ធន់ បានបញ្ជាក់ថា៖ «តួលេខ១៧៦នេះ យើងអត់ចុះទៀតទេ យើងចង់ឲ្យរដ្ឋាភិបាលផ្តល់ប្រាក់ឈ្នួលជូនកម្មករឲ្យបានសមរម្យ។ ភាគីទាំង៣ នឹងប្រជុំម្តងទៀតនៅថ្ងៃទី២៩ ខែកញ្ញាម្ដងទៀត ហើយបើមិនទាន់សម្រេចទេ នឹងប្រជុំម្តងទៀតនៅថ្ងៃទី ៣ ខែតុលា និងថ្ងៃទី៥ ខែតុលា ហើយប្រសិនបើមិនត្រូវរ៉ូវគ្នាទេ គឺមានតែក្រុមប្រឹក្សាការងារតែប៉ុណ្ណោះដែលជាអ្នកសម្រេចចុងក្រោយ»។
ក្រៅពីទាមទារប្រាក់ឈ្នួលអប្បបរិមាណនេះ លោក អាត់ ធន់ បានស្នើឲ្យរដ្ឋាភិបាល និងនិយោជក ផ្តល់ប្រាក់បាយថ្ងៃត្រង់ និងប្រាក់ធ្វើដំណើរជូនកម្មករបន្ថែមទៀត ព្រមទាំងសម្រួលផ្នែកបរិស្ថាននៅក្នុងរោងចក្រ កុំឲ្យកម្មករដួលសន្លប់ដូចមានករណីជាច្រើនកន្លងមក។
ដោយឡែក ក្រសួងការងារ និងបណ្តុះបណ្តាលវិជ្ជាជីវៈ បានសរសេរនៅលើទំព័រហ្វេសប៊ុករបស់ខ្លួនក្រោយពីកិច្ចប្រជុំនេះថា ការពិភាក្សាប្រាក់ឈ្នួលអប្បបរិមាណផ្នែកវាយនភ័ណ្ឌ កាត់ដេរ និងផលិតស្បែកជើង សម្រាប់ឆ្នាំ២០១៨ នៅថ្ងៃទី២៥ ខែកញ្ញានេះ គឺមានភាពចាស់ទុំ ហើយ ភាគីនីមួយៗ បានបញ្ជាក់ពីគោលជំហរផ្លូវការ និងហេតុផលបឋមក្នុងការសម្រេចយកតួលេខរបស់ភាគីនីមួយៗ។
ទាក់ទងនឹងការដំឡើងប្រាក់ខែនេះ នាយករដ្ឋមន្ត្រី ហ៊ុន សែន ធ្លាប់បានបញ្ជាក់ថា រដ្ឋាភិបាល នឹងដំឡើងប្រាក់ខែគោលសម្រាប់កម្មកររោងចក្រជាង១៦០ដុល្លារ នៅក្នុងឆ្នាំ២០១៨ខាងមុខ។ ថ្លែងក្នុងពិធីសំណេះសំណាលជាមួយកម្មកររោងចក្រនៅសួនឧស្សាហកម្មកាណាឌីយ៉ា កាលពីថ្ងៃទី៦ កញ្ញា សម្ដេចនាយករដ្ឋមន្ត្រី ហ៊ុន សែន បាននិយាយថា ប្រាក់ឈ្នួលអប្បបរិមាជាង ១៦០ដុល្លារ គឺស្ថិតនៅក្នុងកម្រិតមួយ ដែលរដ្ឋាភិបាលអាចមានលទ្ធភាពផ្ដល់ជូនកម្មកររោងចក្រ។ បើតាមនាយករដ្ឋមន្ត្រី ហ៊ុន សែន ប្រាក់ខែកម្មកររោងចក្រ នឹងដំឡើងជារៀងរាល់ឆ្នាំ។
ក្រៅពីនេះរដ្ឋាភិបាល ក៏មានគោលនយោបាយជាច្រើនសម្រាប់ផ្តល់ជាអត្ថប្រយោជន៍ដល់កម្មករកម្មការិនី ដូចជា ការផ្តល់សេវារថយន្តក្រុងសាធារណៈឥតគិតថ្លៃរយៈពេល ២ឆ្នាំ ចាប់ពីខែសីហា ឆ្នាំ២០១៧ ដល់ខែសីហា ឆ្នាំ២០១៩ ,ការសម្រេចផ្តល់ប្រាក់ខែ ១២០% សម្រាប់សម្រួលកម្មការិនីនៅពេលឆ្លងទន្លេ ,បេឡាជាតិរបបសន្តិសុខសង្គម នឹងផ្តល់ប្រាក់ឧបត្ថម្ភ៤០ម៉ឺនរៀលដល់កម្មការិនីដែលសម្រាលកូនបានម្នាក់ បើមានកូនភ្លោះពីរនាក់ទទួលបាន ៨០ម៉ឺនរៀល ហើយបានកូនភ្លោះបីនាក់ទទួលបាន ១២០ម៉ឺនរៀល, ការមិនឲ្យបង់ប្រាក់ថ្លៃសុខភាពរបស់បេឡាជាតិរបបសន្តិសុខសង្គម ដោយប្រគល់ការបង់នេះទៅឲ្យថែកែ១០០ភាគរយ និងការមិនយកពន្ធលើប្រាក់អត្ថប្រយោជន៍ផ្សេងៗជាដើម។
សូមបញ្ជាក់ថា ឆ្នាំ២០១៧នេះ ប្រាក់ឈ្នួលអប្បបរិមាណរបស់កម្មករកម្មការិនីវិស័យវាយនភ័ណ្ឌ កាត់ដេរ និងផលិតស្បែកជើង គឺទទួលបាន១៥៣ដុល្លារ។ ប្រាក់ខែកម្មករ ១៥៣ដុល្លារនេះ បង្ហាញថា កម្មករកម្ពុជាមានលទ្ធភាពទទួលប្រាក់បៀវត្សខ្ពស់ជាងកម្មករនៅប្រទេសមីយ៉ាន់ម៉ា (៧៩ដុល្លារ) ឡាវ (១១០ដុល្លារ) បង់ក្លាដេស (៦៧ដុល្លារ) ស្រីលង្ការ (៦៧ដុល្លារ) ឥណ្ឌា (៧៧ដុល្លារ) ប៉ាគីស្ថាន (១៣៤ដុល្លារ) ខណៈដែលកម្មកររោងចក្រនៅប្រទេសវៀតណាមទទួលបានប្រាក់ខែចន្លោះពី ១១៣ដុល្លារទៅ១៦០ដុល្លារ ប្រទេសថៃ (២៥០ដុល្លារ) និងម៉ាឡេស៊ី (៣០០ដុល្លារ) ។ នេះបើតាមនាយករដ្ឋមន្ត្រី ហ៊ុន សែន ៕
Tag:
កម្មករ
ប្រាក់ឈ្នួល
© រក្សាសិទ្ធិដោយ thmeythmey.com