អន្តរជាតិ
នយោបាយអន្តរជាតិ
×![]()
ចិនចាប់ផ្តើមបង្កើនការត្រួតពិនិត្យប្រព័ន្ធអ៊ីនធឺណិតដោយបិទបណ្តាញសង្គម WhatApp នៅសប្តាហ៍នេះ។ ចំណាត់ការនេះត្រូវបានដាក់ចេញប៉ុន្មានសប្តាហ៍ប៉ុណ្ណោះមុនការមកដល់នៃសមាជបក្សកុម្មុយនីស្តចិនលើកទី ១៩។ ប្រជាជនចិនមួយចំនួនក៏បានត្អូញត្អែរចំពោះការបិទបណ្តាញសង្គមមួយនេះដែរ។
អាជ្ញាធរចិនចាប់ផ្តើមបិទកម្មវិធីបណ្តាញសង្គម WhatsApp ដើម្បីពង្រឹងការត្រួតពិនិត្យប្រព័ន្ធអ៊ីនធឺណិត មុនសមាជបក្សកុម្មុយនីស្តចិនមកដល់នៅថ្ងៃទី១៨ ខែតុលាខាងមុខ។ ចិនបានសម្រេចចិត្តបែបនេះព្រោះ WhatsApp មានបច្ចេកវិទ្យារក្សាទិន្នន័យអ្នកប្រើប្រាស់ រួចផុតពីការត្រួតពិនិត្យតាមរយៈកម្មវិធីGreat Firewall របស់អាជ្ញាធរចិនផង។
នៅឆ្នាំ២០១៧ ចិនបានពង្រឹងបទបញ្ញត្តិគ្រប់គ្រងបណ្ដាញទូរគមនាគមន៍របស់ខ្លួនដោយអនុម័តច្បាប់ថ្មី។ ច្បាប់ថ្មីនេះតម្រូវឲ្យក្រុមហ៊ុនបច្ចេកវិទ្យានៅចិនទាំងអស់ត្រូវរក្សាទិន្នន័យរបស់អ្នកប្រើប្រាស់នៅចិន ហើយរឹតត្បិតកម្មវិធីមួយចំនួនទៀតផង។ បណ្តាញសង្គមមួយចំនួនដូចជា Facebook និងTwitter ក៏ត្រូវបានហាមឃាត់នៅចិនដែរ។
បើតាមទីភ្នាក់ងារព័ត៌មានAFP ចិនតែងតែពង្រឹងការត្រួតពិនិត្យបណ្តាញសង្គមរាល់ពេលដែលមានព្រឹត្តិការណ៍ជាតិសំខាន់ៗកើតឡើង។ ជាក់ស្ដែងដូចជា សមាជបក្សកុម្មុយនីស្តលើកទី ១៩ នៅថ្ងៃទី១៨ខែតុលាខាងមុខ ដែលជាពេលលោកប្រធានាធិបតីស៊ី ជីនភីង ត្រូវគេបោះឆ្នោតឲ្យបន្តដឹកនាំចិនក្នុងរយៈពេលប្រាំឆ្នាំខាងមុខទៀត។
ដោយឡែក ប្រជាជនចិនមួយចំនួនដែលជាអ្នកប្រើកម្មវិធី WhatsApp បានត្អូញត្អែរចំពោះការបិទនេះដែរ។ ប្រជាជនទាំងនោះកត់សម្គាល់ថា ខ្លួនប្រាកដជាពិបាកទាក់ទងជាមួយអតិថិជនបរទេស បើសិនWhatsApp ត្រូវបានបិទនោះ។ ប្រសិនជាគ្មានកម្មវិធីផ្ញើសារដែលល្អទេនោះ ប្រសិទ្ធភាពនៃឧស្សាហកម្មនិងពាណិជ្ជកម្មបរទេសក៏នឹងត្រូវកាត់បន្ថយដូចគ្នា៕
Tag:
ចិន
WhatApp
ស៊ី ជីនភីង
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
