រថយន្ត
សាកលវិទ្យាល័យមួយនៅអារ៉ាប៊ីសាអូឌីតនឹងបើកបង្រៀនជំនាញយានយន្តសម្រាប់ស្ត្រី
× បន្ទាប់ពីព្រះមហាក្សត្រអារ៉ាប៊ីសាអូឌីត Salman bin Abdulaziz Al Saud ប្រកាសផ្ដល់សិទ្ធិឲ្យស្ត្រីមានសិទ្ធិបើកបររថយន្តដោយខ្លួនឯង សាកលវិទ្យាល័យដ៏ល្បីល្បាញមួយ បានលើកឡើងភ្លាមៗពីគម្រោងបណ្តុះបណ្តាលជំនាញយានយន្តពិសេសសម្រាប់ស្ត្រី។ នេះបើតាមការផ្សាយរបស់ទីភ្នាក់ងារព័ត៌មាន AFP។
នៅឆ្នាំក្រោយ អាជ្ញាធរអារ៉ាប៊ីសាអូឌីត នឹងដកបម្រាមស្តីពីការហាមឃាត់ស្ត្រីក្នុងការបើកបរ តាមរយៈព្រះរាជក្រឹត្យមួយដែលឡាយព្រះហស្តលេខាដោយព្រះមហាក្សត្រ Salman bin Abdulaziz Al Saud កាលពីថ្ងៃទី២៦ ខែកញ្ញា។
បើទោះបីជាគេមិនទាន់បានដឹងពីកាលបរិច្ចេទច្បាស់លាស់ក៏ដោយ ប៉ុន្តែការប្រកាសផ្ដល់សិទ្ធិដល់ស្ត្រីក្នុងការបើកបរនេះ ថាជាផ្នែកមួយនៃទស្សនវិស័យឆ្នាំ២០៣០ សំដៅកែទម្រង់សង្គម និងសេដ្ឋកិច្ច ខណៈ ដែលអារ៉ាប៊ីសាអូឌីតរងការិះគន់យ៉ាងខ្លាំងលើការបិទសិទ្ធិស្ត្រីភេទ តាមរយៈការអនុវត្តច្បាប់ឥស្លាម Sharia ដ៏តឹងរ៉ឹង។
ក្រោយទទួលបានដំណឹងមិនបានមួយសប្តាហ៍ផង សាកលវិទ្យាល័យ Princess Nourah Bint Abdulrahman University ដែលមានមូលដ្ឋាននៅទីក្រុងរីយ៉ាដ បានប្រកាសបើកវគ្គជំនាញយានយន្តសម្រាប់ស្ត្រី ពីព្រោះសាកលវិទ្យាល័យនេះ ជាគ្រឹះស្ថានបណ្តុះបណ្តាលស្ត្រីដ៏ធំបំផុតនៅលើពិភពលោក។
បើតាមគម្រោងរបស់អាជ្ញាធរអារ៉ាប៊ីសាអូឌីត ស្ត្រីទំនងជាទទួលបានសិទ្ធិបើកបរដោយខ្លួនឯងឡើងវិញ ចាប់ពីខែមិថុនា ឆ្នាំ២០១៨ ខាងមុខ ដូច្នេះក្រុមហ៊ុនផលិតរថយន្ត កំពុងត្រៀមខ្លួនទទួលអតិថិជនថ្មី ដែលប្រកបដោយសក្តានុពលខ្ពស់។
សាកលវិទ្យាល័យ Princess Nourah Bint Abdulrahman University បានសរសេរនៅលើគណនី Twitter របស់ខ្លួនថា សាលាបណ្តុះបណ្តាលជំនាញយានយន្តសម្រាប់ស្ត្រី នឹងលេចចេញជារូបរាងឡើងនាពេលខាងមុខ ប៉ុន្តែសាលាកំពុងពិភាក្សាជាមួយអាជ្ញាធរពាក់ព័ន្ធ។
ការផ្តល់សិទ្ធិស្ត្រីឲ្យបើកបរខ្លួនឯងនេះ ជាការសម្រេចចិត្តជាប្រវត្តិសាស្ត្រមួយសម្រាប់អារ៉ាប៊ីសាអូឌីត ហើយក៏មានឥទ្ធិពលខ្លាំងផ្នែកសេដ្ឋកិច្ចផងដែរ ដោយក្រៅពីទទួលបានភ្ញៀវជាស្ត្រី ក្រុមហ៊ុនផលិតយានយន្តដូចជា Nissan, Chevrolet និង Ford ជាដើមនោះ នឹងជ្រើសបុគ្គលិកនារី កាន់តែច្រើនផងដែរ៕
© រក្សាសិទ្ធិដោយ thmeythmey.com