ជាតិ
សង្គមជាតិ
×![]()
ភ្នំពេញ៖ សម្ដេចនាយករដ្ឋមន្ត្រី ហ៊ុន សែន អំពាវនាវឲ្យប្រជាពលរដ្ឋពហិការទិញបន្លែ ដែលមានសារជាតិគីមីយកទៅបរិភោគ។ នាយករដ្ឋមន្ត្រី បានបញ្ជាក់ថា មូលហេតុដែលបន្លែជាតិគីមី នាំចូលទីផ្សារកាន់តែច្រើននោះ ក៏ព្រោះតែប្រជាពលរដ្ឋនៅតែបន្តការគាំទ្រទិញពីឈ្មួញ ដូច្នេះបញ្ហានេះមិនអាចបន្ទោសរដ្ឋាភិបាលបានឡើយ។
ថ្លែងក្នុងពិធីសម្ពោធសណ្ឋាគារ និងរមណីយដ្ឋានសុខា សៀមរាប នៅព្រឹកថ្ងៃទី២ តុលានេះ សម្ដេចនាយករដ្ឋមន្ត្រី ហ៊ុន សែន បានលើកឡើងដូច្នេះថា៖«កន្លងទៅតែងតែឮនិយាយ ហើយសំណូមពរមករដ្ឋាភិបាល។ ខ្ញុំបានស្ដាប់ឮហើយនូវសំឡេងអំពាវនាវរបស់ប្រជាជនថា កុំឲ្យនាំចូលនូវបន្លែបង្ការ ដែលមានជាតិគីមី ឬក៏អ្នកដាំដែលប្រើប្រាស់ជាតិគីមីច្រើនហើយយកមកលក់នៅលើទីផ្សារ ខ្ញុំសូមផ្ដាំផ្ញើត្រឡប់ទៅវិញថា សូមមេត្តាកុំទិញនូវអ្វីដែលមានជាតិគីមីទៅគឺចប់បាត់ទៅហើយ។ បញ្ហាវានៅត្រង់កន្លែងនេះ ដោយតែយើងសម្រុកទៅទិញបន្លែជាតិគីមីនេះ ដូច្នេះគេចេះតែលក់តទៅទៀតហើយ រួចហើយមកតែចោទរដ្ឋាភិបាល ហើយចុះខ្លួនឯងអ្នកទទួលទាននេះមិនគិតមើលផង…»។
ជាមួយគ្នាប្រមុខរដ្ឋាភិបាល ជំរុញឲ្យប្រជាពលរដ្ឋដែលប្រកបរបរកសិកម្ម ត្រូវចូលរួមដាំដុះបន្លែសរីរាង្គ ការផលិតនិងការចញ្ចឹមសត្វ ដោយគ្មានជាតិគីមី សម្រាប់ផ្គត់ផ្គង់តម្រូវការទីផ្សារបច្ចុប្បន្ន ដើម្បីកាត់បន្ថយការប៉ះពាល់ដោយសារការបរិភោគបន្លែមានជាតិគីមីនេះ។ បន្ថែមពីនាយករដ្ឋមន្ត្រី ហ៊ុន សែន បានស្នើឲ្យអ្នកអាជីវកម្ម និងអ្នកផ្ដល់សេវាកម្មទេសចរណ៍ គប្បីត្រូវធានាសុវត្ថិភាពចំណីអាហារគ្មានជាតិគីមីដល់ភ្ញៀវទេសចរ ក្នុងទិសដៅចៀសវាងការបង្កឲ្យមានផលប៉ះពាល់ដល់សុខភាពពួកគេ។ បើតាមនាយករដ្ឋមន្ត្រី ហ៊ុន សែន កន្លងមកមិនទាន់មានករណីដែលបង្កឲ្យភ្ញៀវទេសចរ មានបញ្ហាសុខភាពដោយសារការទទួលទានចំណីអាហារឡើយ៕
Tag:
សម្តេច ហ៊ុន សែន
បន្លែគីមី
© រក្សាសិទ្ធិដោយ thmeythmey.com
