ជាតិ
វិទ្យុថ្មីៗ
នយោបាយជាតិ
ពីក្នុងពន្ធនាគារ ឯ.ឧ កឹម សុខា ផ្ញើសារប្រាប់អ្នកគាំទ្រថា «សូមកុំតក់ស្លុត!»
× ថ្ងៃទី៣ ខែកញ្ញា ដល់ថ្ងៃទី៣ ខែតុលា គឺរយៈពេល១ខែគត់ដែលប្រធានគណបក្សសង្គ្រោះជាតិ ត្រូវបានចាប់ខ្លួន និងឃុំខ្លួននៅក្នុងពន្ធនាគារត្រពាំងផ្លុង។ តាមរយៈសារលិខិតមួយចុះកាលពីល្ងាចថ្ងៃទី២ ខែតុលា ឯកឧត្តម កឹម សុខា នៅតែច្រានចោលការចោទប្រកាន់ទៅលើខ្លួនទាក់ទងនឹងអំពើក្បត់ជាតិ ហើយជំរុញពលរដ្ឋបន្តចូលរួមក្នុងសកម្មភាពនយោបាយដើម្បីការផ្លាស់ប្តូរ។
«ខ្ញុំ កឹម សុខា ពុំដែលបាន និងក៏មិនមានផែនការណាមួយធ្វើឲ្យប្រជាពលរដ្ឋខ្មែរស្លាប់ ឬធ្វើឲ្យបាត់បង់អធិបតេយ្យបូរណភាពទឹកដី និងធនធានធម្មជាតិខ្មែរឡើយ។ ផ្ទុយទៅវិញ ខ្ញុំតែងតែទាមទារឲ្យមានការដោះស្រាយដោយអហិង្សា តាមរយៈការបោះឆ្នោតដោយសេរី ត្រឹមត្រូវ និងយុត្តិធម៌»។ នេះជាសំណេររបស់ឯកឧត្តម កឹម សុខា ដែលកំពុងស្ថិតនៅក្នុងពន្ធនាគារត្រពាំងផ្លុង ខេត្តត្បូងឃ្មុំ។
មួយខែគត់នៃការឃុំខ្លួន ក្រោមការចោទប្រកាន់ពីបទ «សន្ទិដ្ឋិភាពជាមួយបរទេស» ដែលមានន័យថា ជាអំពើក្បត់ជាតិ ប្រធានគណបក្សសង្គ្រោះជាតិនៅតែបន្តអះអាងថា ខ្លួនមិនបានធ្វើឲ្យខុសឡើយ ហើយវាជាការមួលបង្កាច់ទាំងស្រុង។ លោកថា ការសម្រុកចូលគេហដ្ឋានលោកពាក់កណ្តាលអាធ្រាត្រ ជាការរំលោភច្បាប់ និងអភ័យឯកសិទ្ធិសភា ជាពិសេសរដ្ឋធម្មនុញ្ញ។
«សូមកុំតក់ស្លុត!»។ នេះជាសារសំខាន់របស់មេបក្សប្រឆាំង ដើម្បីលើកទឹកចិត្តពលរដ្ឋខ្មែរ ជាពិសេសអ្នកគាំទ្រឲ្យបន្តចូលរួមក្នុងចលនាផ្លាស់ប្តូរ តាមរយៈការបោះឆ្នោត ដោយលោកបានអះអាងថា ការផ្លាស់ប្តូរដែលខ្មែរចង់បាននោះ គឺសម្រេចបានពាក់កណ្តាលហើយ។ លោកបានសរសេរថា៖ «ទោះរូបការយខ្ញុំត្រូវជាប់ឃុំ តែគ្មាននរណាម្នាក់អាចឃុំឧត្តមគតិខ្ញុំបានឡើយ»។
ជាមួយគ្នានេះ ឯកឧត្តម កឹម សុខា បានអំពាវនាវដល់សហគមន៍អន្តរជាតិចាត់វិធានការសកម្មភាពជាក់ស្តែងដើម្បីជួយសង្គ្រោះកម្ពុជា ដោយលោកវាយតម្លៃថា លទ្ធិប្រជាធិបតេយ្យកម្ពុជាបានធ្លាក់នៅដង្ហើមចុងក្រោយហើយ។
ប្រធានគណបក្សប្រឆាំង ក៏បានស្នើទៅសមត្ថកិច្ច រាជរដ្ឋាភិបាល និងតុលាការឲ្យពិចារណាឡើងវិញលើការចោទប្រកាន់លើរូបខ្លួន ដោយលោកបានលើកឡើងថា នេះមិនមែនជាយុទ្ធសាស្ត្រដែលធ្វើឲ្យខ្មែរណាម្នាក់ទទួលបានប្រយោជន៍យូរអង្វែងឡើយ។ លោកបានសរសេរយ៉ាងដូច្នេះថា៖ «ខ្ញុំមិនមែនជាសត្រូវរបស់លោកអ្នក ខ្ញុំជាគូប្រជែងមានតួនាទីកែលំអរជាតិ ដោយការរិៈគន់ និងប្រជែងយកការគាំទ្រពីប្រជាពលរដ្ឋ»។
នាពិធីសម្ពោធសណ្ឋាគារសុខាសៀមរាបកាលពីព្រឹកថ្ងៃទី២ ខែតុលា សម្តេចនាយករដ្ឋមន្ត្រី ហ៊ុន សែន បានមានប្រសាសន៍ថា ករណីឯកឧត្តម កឹម សុខា មិនមែនបញ្ចប់ត្រឹមការចាប់ខ្លួន ប្រធានគណបក្សសង្គ្រោះជាតិម្នាក់នោះទេ ពោលគឺអាចឈានទៅរកការចាប់ខ្លួនអ្នកពាក់ព័ន្ធមួយចំនួនទៀត។ សម្ដេច ហ៊ុន សែន បានបញ្ជាក់ថា ករណីឯកឧត្តម កឹម សុខា ដែលរដ្ឋាភិបាលចាត់ទុកជាអំពើក្បត់ជាតិនេះ មានការរៀបចំជាប្រព័ន្ធ ដែលត្រូវតាមដាននឹងចាប់ខ្លួនបន្តទៀត៕
© រក្សាសិទ្ធិដោយ thmeythmey.com