លោក សុន ឆ័យ ជាអ្នកនាំពាក្យគណបក្សសង្គ្រោះជាតិ

ជាតិ

នយោបាយជាតិ

លោក សុន ឆ័យ ជាអ្នកនាំពាក្យគណបក្សសង្គ្រោះជាតិ

05, Oct 2017 , 10:12 am

រូបភាព

លោក សុន ឆ័យ ទទួលបន្ទុកជាអ្នកនាំពាក្យបក្សសង្គ្រោះជាតិ

ដោយ: ម៉ៅ សុផា

ភ្នំពេញ៖ ស្ថិតក្នុងស្ថានការណ៍នាពេលនេះ រាល់ព័ត៌មានទាំងអស់ ដែលទាក់ទងនឹងគណបក្សសង្គ្រោះជាតិ គឺត្រូវឆ្លងកាត់លោក សុន ឆ័យ។ តំណាងរាស្ត្រនិងជាមន្ត្រីជាន់ខ្ពស់នៃគណបក្សសង្គ្រោះជាតិរូបនេះ ត្រូវបានតែងតាំង ជាអ្នកនាំពាក្យគណបក្ស។

ការតែងតាំងនេះ គឺស្របពេលដែលអ្នកនាំពាក្យគណបក្សសង្គ្រោះជាតិទាំងពីររូប គឺលោក យឹម សុវណ្ណ និងលោក យ៉ែម បុញ្ញឫទ្ធិ កំពុងតែនៅក្រៅប្រទេស។ «ហ្នឹងហើយ យើង បានតែងតាំងឯកឧត្តម សុន ឆ័យ ជាអ្នកនាំពាក្យហើយ។ រាល់ព័ត៌មាន សូមទាក់ទងទៅគាត់ចុះ»។ នេះជាការអះអាងរបស់លោក ម៉ៅ មុន្នីវណ្ណ តំណាងរាស្ត្រមួយរូបនៃគណបក្សសង្គ្រោះជាតិ ដែលបានប្រាប់សារព័ត៌មានថ្មីៗ តាមទូរសព្ទ នៅព្រឹកថ្ងៃទី៥ ខែតុលា ឆ្នាំ២0១៧។

យ៉ាងណា លោក ម៉ៅ មុន្នីវណ្ណ ពុំបានបញ្ជាក់នោះទេ ថាគណបក្សសង្គ្រោះជាតិ តែងតាំងលោក សុន ឆ័យ ជាអ្នកនាំពាក្យអចិន្ត្រៃយ៍ ឬក៏បណ្ណោះអាសន្ន។ បច្ចុប្បន្ន លោក សុន ឆ័យ មានតំណែងជាអភិបាលនៃក្រុមតំណាងរាស្ត្រគណបក្សសង្គ្រោះជាតិ។ តំណែងនេះ អាចចាត់ទុកថា ជាប្រធាននៃក្រុមតំណាងរាស្ត្រគណបក្សសង្គ្រោះជាតិ។
សារព័ត៌មានថ្មីៗ ពុំអាចសុំការបញ្ជាក់ផ្ទាល់ពីលោក សុន ឆ័យ នោះទេ ដោយសារតែហៅទូរសព្ទចូលដែរ តែលោក មិនបានទទួល៕