ជាតិ
បទយកការណ៍ / បទសម្ភាសន៍
រថយន្ត
ទោះជាថ្លៃប្រហែលរថយន្ត តែយុវវ័យជិះម៉ូតូធំ ព្រោះតែស្រឡាញ់ ចង់អួតពីភាពហ៊ឺហា ទាន់សម័យ
× ប្រភេទម៉ូតូដែលមានកម្លាំងចាប់ពី ២៥០CC ឡើងទៅ ត្រូវចាត់ទុកជាប្រភេទម៉ូតូធុនធំ។ ម៉ូតូធំ មានតម្លៃខ្ពស់ប្រហាក់ប្រែលនឹងរថយន្ត និងក៏មានប្រភេទថ្លៃជាងរថយន្តដែរ ប៉ុន្តែវាក៏នៅកំពុងពេញនិយមក្នុងស្រទាប់អ្នកប្រើប្រាស់ដែលភាគច្រើនបំផុតជាយុវវ័យ។ ពួកគេប្រើប្រាស់ម៉ូតូធំ ដោយសារតែចង់បង្ហាញពីភាពហ៊ឺហា ភាពទាន់សម័យ ការស្រឡាញ់ ពេញចិត្ត និងភាពស្ទុះលឿន រហ័សរបស់វា។
លោក យៀង សុធា បុគ្គលិកក្រុមហ៊ុនឯកមួយនៅភ្នំពេញ បានបញ្ជាក់ប្រាប់សារព័ត៌មាន thmeythmey.com ថាបើទោះជាលោកមានឡានមួយគ្រឿងទៅហើយក្តី ប៉ុន្តែលោកបានទិញម៉ូតូម៉ាក CB1 ជាប្រភេទម៉ូតូ ដែលមានកម្លាំងម៉ាស៊ីន 400cc មួយគ្រឿងថែមទៀត ដើម្បីជិះទៅធ្វើការ។ បញ្ហាចរាចរណ៍នៅក្រុងភ្នំពេញ ជាមូលហេតុចម្បង ដែលធ្វើឲ្យយុវជនរូបនេះ ចំណាយពេលតិចជាងជិះឡាន នៅពេលជិះម៉ូតូធំមួយនេះ។ លោក យៀង សុធា ក៏បានបញ្ជាក់ដែរថា លោកបានផ្លាស់ប្តូរប្រភេទធំនេះ ៣ទៅ៤គ្រឿងឯណោះក្នុងមួយឆ្នាំ ដោយសារចង់ដឹងពីលក្ខណៈពិសេសនៃប្រភេទម៉ូតូដោយឡែកពីគ្នានេះ។ លោក សុធា បញ្ជាក់បន្ថែមដូច្នេះ៖ខ្ញុំចង់ស្គាល់ថា តើការជិះម៉ូតូធំៗទាំងអស់នេះ មានលក្ខណៈយ៉ាងដែរ ហើយ មួយឆ្នាំៗ ខ្ញុំប្តូរពី៣ទៅ៤គ្រឿងឯណោះ ដោយសារម៉ូតូខ្លះ ពិបាកឌុបអ្នកណាម្នាក់ពីក្រោយ»។
អ្នកជិះម៉ូតូធំ កម្លាំងម៉ាស៊ីន 400cc ម្នាក់ទៀត គឺលោក កឹង កក្កដា ក៏លើកឡើងពីងាយស្រួល លឿនរហ័ស ក្នុងពេលធ្វើដំណើរទៅមកណាដោយសារម៉ូតូធំនេះដែរ។ ទោះជាវាថ្លៃប្រហាក់ប្រហែលឡាន ប៉ុន្តែលោក កក្កដា អះអាងថា លោក ស្រលាញ់ ចូលចិត្តម៉ូតូធំ ជាងឡាន និងយល់ថាខ្លួនកាន់តែសង្ហារ ឡូយឆាយ នៅពេលគេជិះម៉ូតូធំនេះ។ លើសពីនេះ គឺទាក់ទងនឹងសុត្ថិភាព។ យុវជន កក្កដា បន្ថែម៖« ការដែលទិញម៉ូតូធំនេះ ដោយវាជិះទៅមានសុវត្ថិភាព មិនខ្លាចចោរលួច ឬប្លន់ ហើយមិនមានអ្នកណាហ៊ានមើលងាយ។ ម្យ៉ាងវាលឿនទាន់ចិត្តចង់ទៅណាមកណា ពេលណាក៏បាន»។
ទន្ទឹមនឹងការនិយមជិះម៉ូតូធំ កាន់តែច្រើន ហាងលក់ម៉ូតូធំ ក៏រីកសាយព្រោងព្រាតដែរនៅកម្ពុជា។ តាមលោក ថារ៉ូ ម្ចាស់ហាងលក់ម៉ូតូធំមួយ នៅខាងជើងរបងវត្ដសំពៅមាស បានប្រាប់សារព័ត៌មាន thmeythmey.com ថាអ្នកទិះម៉ូតូធំពីហាងរបស់គាត់ភាគច្រើនជាយុវវ័យ ដែលមានឫកពារឡូយឆាយ។ ម្ចាស់ហាងលក់ម៉ូតូ ដដែល បញ្ជាក់ថា ម៉ូតូធំ អាចមានតម្លៃចាប់ពីជាង២ពាន់ដុល្លារ ទៅជាង៥ពាន់ដុល្លារ និងមានប្រភេទថ្លៃជាងរថយន្តផងក៏មាន អាស្រ័យលើម៉ាកដែលនាំចូល។
បើទោះជាមានប្រភេទម៉ូតូធំខ្លះ វាថ្លៃជាងរថយន្តក៏ដោយ ប៉ុន្តែនៅតែមានអ្នកប្រើប្រាស់ដែលភាគច្រើនជាយុវវ័យ ដោយសារតែពួកគេស្រឡាញ់ និងចង់បង្ហាញពីភាពហ៊ឺហា ទាន់សម័យ គួបផ្សំនឹងភាពលឿនរហ័ស និងសុវត្ថិភាព៕
© រក្សាសិទ្ធិដោយ thmeythmey.com