ជាតិ
សិល្បះ
×![]()
ដោយ: ថ្មីៗ
កុមារា ពេជ្រ ថៃ បានក្លាយជាម្ចាស់ពានក្នុងកម្មវិធីប្រឡងចម្រៀងកុមារ The Voice Kids Cambodia របស់ទូរទស្សន៍ហង្សមាស ប្រចាំឆ្នាំ២០១៧ ដែលមានប្រាក់រង្វាន់១០០លានរៀល និងការឧបត្ថម្ភជាច្រើនផ្សេងទៀត។ ពេជ្រ ថៃ ទទួលបានសំឡេងគាំទ្រច្រើនជាងបេក្ខជន៥នាក់ទៀតនាការប្រកួតផ្តាច់ព្រ័ត្រនៅរាត្រីថ្ងៃសៅរ៍ ទី១៤ ខែតុលា។
នៅក្នុងកម្មវិធី ដែលមានការចូលរួមផងដែរពីសំណាក់លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន និងភរិយា បេក្ខជនទាំង៦នាក់ បានបើកឆាកដោយច្រៀងរួមគ្នា។ បន្ទាប់មកពួកគេបានបកស្រាយចម្រៀងម្នាក់១បទនៅវិញ្ញាសាទី១ ។
សម្រាប់កូនក្រុមរបស់កញ្ញា សុគន្ធ នីសា កុមារី ឃុយ ម៉ីហៀង អាយុ១២ឆ្នាំ មកពីខេត្តកំពង់ស្ពឺ ច្រៀងបទ «ខ្យល់កំពូលភ្នំ» កុមារី ណូ ឈូស៊ីវហេង អាយុ៧ឆ្នាំ នៅរាជធានីភ្នំពេញ ច្រៀងបទ «Let it go»។
ចំណែកកូនក្រុមលោក ព្រាប សុវត្ថិ វិញ កុមារា ឡុង លីងគ័ង្គ អាយុ១២ឆ្នាំ មកពីខេត្តតាកែវ បកស្រាយបទ «បងពីមុនឆ្កួតបាត់ហើយ» កុមារា ពេជ្រ ថៃ អាយុ១២ឆ្នាំ មកពីខេត្តបាត់ដំបង ច្រៀងបទ «អាណែតមាសបង»។
ងាកទៅកូនក្រុមរបស់កញ្ញា ឱក សុគន្ធកញ្ញា ឯណោះវិញ កុមារី រ៉ន ចាន់ឌីន អាយុ១២ឆ្នាំ មកពីខេត្តកំពង់ស្ពឺ ច្រៀងបទ «ស្រីណាមិនយំ» កុមារី សុខ សុជាតា អាយុ១២ឆ្នាំ ពីរាជធានីភ្នំពេញ ច្រៀងបទ «ផ្លូវស្នេហ៍បែកបាក់»។
ឈានដល់វិញ្ញាសាទី២ បេក្ខជនត្រូវបានតម្រូវឲ្យច្រៀងជាមួយគ្រូបង្វឹករបស់ខ្លួន។ ឡុង លីងគ័ង្គ និង ពេជ្រ ថៃ ចាប់ដៃគ្នាច្រៀងជាមួយ លោក ព្រាប សុវត្ថិ នូវបទចម្រៀងដែលមានចំណងជើងថា «ថ្នម»។ បន្ទាប់មក កញ្ញា សុគន្ធ នីសា ច្រៀងបទ «Sweet តែដំបូង» ជាមួយ ឃុយ ម៉ីហៀង និង ណូ ឈូស៊ីវហេង ដែលជាកូនក្រុមរបស់ខ្លួន។ ចុងក្រោយ ជាការបកស្រាយបទ «គ្មានថ្ងៃអូនមិនយំ» របស់កញ្ញា ឱក សុគន្ធកញ្ញា ជាមួយ រ៉ន ចាន់ឌីន និង សុខ សុជាតា។
ក្រៅរង្វាន់លើកទឹកចិត្តជាច្រើនផ្សេងទៀត បេក្ខជនវគ្គផ្តាច់ព្រ័ត្រទាំង៦នាក់ សុទ្ធតែទទួលបានការឧបត្ថម្ភបន្ថែមពីសម្តេចនាយករដ្ឋមន្ត្រី ហ៊ុន សែន ក្នុងម្នាក់ៗចំនួន ៣០០០ដុល្លារអាមេរិកផងដែរ៕
Tag:
The Voice Kids Cambodia
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
