ជាតិ
អ្នកច្បាប់អន្តរជាតិម្នាក់បារម្ភពីនីតិរដ្ឋនៅកម្ពុជា លោក សុខ ឥសានថា ជាមតិលំអៀងកាន់ជើងបក្សប្រឆាំង
× ភ្នំពេញ៖ ទីប្រឹក្សានៃគណៈកម្មការអ្នកច្បាប់អន្តរជាតិ (International Commission of Jurists) បានរិះគន់ថា សេចក្តីស្នើច្បាប់ចំនួន៤ ដែលអនុម័តដោយក្រុមតំណាងរាស្ត្រគណបក្សប្រជាជនកម្ពុជា គឺជាការបំបិទសំឡេងគណបក្សប្រឆាំង ដែលអាចនាំឲ្យអន្តរាយដល់នីតិរដ្ឋកម្ពុជា។
លោក Kingsley Abbott ទីប្រឹក្សាជាន់ខ្ពស់ផ្នែកច្បាប់អន្តរជាតិរបស់គណៈកម្មការអ្នកច្បាប់អន្តរជាតិ (ICJ) ដែលមានការិយាល័យនៅទីក្រុងបាងកក បានកត់សម្គាល់ថា រដ្ឋាភិបាលកម្ពុជា កំពុងប្រើប្រាស់ប្រព័ន្ធច្បាប់ធ្វើជា«អាវុធ» ដោយមានការពឹងអាស្រ័យទៅលើអង្គចៅក្រម និងព្រះរាជអាជ្ញា ដែលគ្មានឯករាជ្យពេញលេញនោះ ដើម្បីបំបិទសំឡេងបក្សប្រឆាំង ដែលនាំឲ្យអន្តរាយដល់លទ្ធិប្រជាធិបតេយ្យ និងនីតិរដ្ឋកម្ពុជា។ សម្រាប់លោក វាគឺជាក្តីព្រួយបារម្ភមួយ ដែលរដ្ឋាភិបាលបានប្រើប្រាស់ប្រព័ន្ធច្បាប់ ដើម្បីពង្រឹងអំណាចខ្លួន ក្រោមហេតុផលថាការពារនីតិរដ្ឋស្របច្បាប់ឲ្យមានប្រសិទ្ធិភាពនេះ។
មន្ត្រីប្រឹក្សាច្បាប់ជាន់ខ្ពស់អន្តរជាតិរបស់ICJ រូបនេះ បានចេញសេចក្តីថ្លែងការណ៍ នៅថ្ងៃទី១៨ តុលានេះ ដោយរិះគន់ការធ្វើវិសោធនកម្មច្បាប់កម្ពុជា យ៉ាងដូច្នេះថា៖«ការកំណែទម្រង់ខ្លឹមសារច្បាប់កាលពីពេលថ្មីៗនេះ គឺជាបណ្ដោយខ្សែបន្ទាត់ ដែលរដ្ឋាភិបាលកម្ពុជានាំគ្នាអនុម័តដោយឥតអៀនខ្មាស់ ឬក៏ជាការកែប្រែច្បាប់ដោយមានគោលបំណងច្បាស់លាស់ ក្នុងការរំលោភបំពានដោយស្របច្បាប់ទៅលើក្រុមប្រឆាំង ឬក្រុមតំណាងប្រជាធិបតេយ្យទន់ខ្សោយនៅកម្ពុជាបច្ចុប្បន្ននេះ»។
ជាមួយគ្នានេះលោក Kingsley Abbott បានបន្ថែមថា នីតិរដ្ឋគឺមិនមែនគ្រាន់តែជាការអនុម័ត និងអនុវត្តច្បាប់នោះទេ ប៉ុន្តែវាសំដៅទៅលើកំណត់សេចក្តីព្រាងច្បាប់ ដែលមានប្រសិទ្ធភាពស្របតាមច្បាប់សិទ្ធិមនុស្សអន្តរជាតិដោយគ្មានការរើសអើងជាដើម។
អ្នកនាំពាក្យគណបក្សប្រជាជនកម្ពុជា លោក សុខ ឥសាន ចាត់ទុកថាជាការបញ្ចេញមតិរបស់បណ្តាស្ថាប័ន និងបណ្តាប្រទេសក្នុងពិភពលោកលើបញ្ហាប្រទេសកម្ពុជានេះ គ្មានអានុភាព និងវិសាលភាពគ្របដណ្តប់មកលើប្រទេសកម្ពុជាទេ ។ លោកថា ការបញ្ចេញមតិរបស់បណ្ដាប្រទេសទាំងនោះ គ្រាន់តែជាមតិលំអៀង កាន់ជើងគណបក្សប្រឆាំងប៉ុណ្ណោះ ។
អ្នកនាំពាក្យរូបនេះ បានបកស្រាយដូច្នេះថា៖«កម្ពុជា ជារដ្ឋឯករាជ្យ មានអធិបតេយ្យ ស្មើសិទ្ធិ ស្មើភាព ជាមួយបណ្តាប្រទេសលើសកលលោក គោរពគ្នាទៅវិញទៅមក មិនជ្រៀតជ្រែកកិច្ចការផ្ទៃក្នុងផងគ្នា ដូចមានចែងក្នុងធម្មនុញ្ញ អសប ក៏ដូចជាធម្មនុញ្ញអាស៊ាន ។ កម្ពុជាមានសិទ្ធិដោះស្រាយកិច្ចការផ្ទៃក្នុងរបស់ខ្លួនតាមច្បាប់កម្ពុជា មិនយកច្បាប់បណ្តាប្រទេសមកអនុវត្តទេ។ ការធ្វើវិសោធនកម្មច្បាប់នានា គឺជាសំណូមពរ និងតម្រូវការចាំបាច់របស់សង្គមកម្ពុជា ឲ្យស្របតាមដំណាក់កាលនិងសភាពការណ៏ថ្មី ដោយស្របតាមរដ្ឋធម្មនុញ្ញ និងនីតិវិធី បទបទញ្ជាផ្ទៃក្នុងរដ្ឋសភា ជាធរមាន»។
ជុំវិញការកែប្រែច្បាប់ទាក់ទងនឹងការបែងចែងអាសនៈរបស់គណបក្សមួយ ដែលត្រូវរំលាយ ទៅឲ្យគណបក្សដទៃនេះ ត្រូវបានលោក ជាម យៀប តំណាងរាស្ត្រគណបក្សប្រជាជនកម្ពុជា បានអះអាង ក្នុងរដ្ឋសភាកាលពីថ្ងៃទី១៦ តុលាថា ការកែប្រែនេះ នឹងធ្វើឲ្យច្បាប់ក្នុងប្រទេសកម្ពុជា មានភាពពេញលេញ ដើម្បីអនុវត្តឲ្យបានសមស្របទៅតាមសភាពការណ៍ជាក់ស្តែងនាពេលបច្ចុប្បន្ន ពោលគឺគ្មានចេតនាចង់បំផ្លិចបំផ្លាញបុគ្គល ឬគណបក្សណាមួយឡើយ ។
គួរបញ្ជាក់ថា នៅពេលនេះព្រឹទ្ធសភា កំពុងពិនិត្យសេចក្តីស្នើសុំឲ្យធ្វើវិសោធនកម្មច្បាប់ទាំង៤ ទាក់ទងនឹងការយកអាសនៈនៃគណបក្សមួយ ដែលត្រូវបានរំលាយឲ្យគណបក្សដទៃ៕
Tag:
ICJ
CNRP
ច្បាប់
Kingsley Abbott
© រក្សាសិទ្ធិដោយ thmeythmey.com